ಸಂಪಾದಕೀಯ್:
ಸಂಸಾರಾ ಸಾಂಗಾತಾ ಪೊಂತಾಕ್ ರಾವೊನ್ ಖರ್‍ಶೆಂವ್ಚೆ ಮನೀಸ್
ಹೆಂ ಸಂಸಾರ್ ಮ್ಹಳ್ಳೆಂ ವಾಹನ್ ಇತ್ಲೆ ಸರಾಯೆನ್ ಧಾಂವೊನ್ ಆಸಾ, ತಿ ಸರಾಯ್ ಆಟಾಪುಂಕ್ ಜಾಯ್ನಾಸ್ತಾಂ ಹೊ ಮನ್ಶಾಜೀವ್ ಕಾಣ್ಶಿರ್‌ಲ್ಲ್ಯಾಂತ್, ಭಿಯಾನ್ ಥರ್ಥರ್‌ಲ್ಲ್ಯಾಂತ್ ನವಲ್ ನಾ. ಹಿ ಸರಾಯ್, ಹೊ ವೇಗ್ ಪ್ರಗತಿಚೊ ಜಾವ್ಯೆತಾ, ಅನಾಉತಾಂಚೊ ಜಾವ್ಯೆತಾ, ಭುಕೆಲ್ಲ್ಯಾ ಪೊಟಾಂಚೊ ಜಾವ್ಯೆತಾ, ಅನಿತಿಚೊ ಜಾವ್ಯೆತಾ; ಎಕಾಚ್ ಉತ್ರಾನ್ ಖರ್‍ಯಾ ಮನ್ಶಾಕ್, ಬರ್‍ಯಾ ಮನ್ಶಾಕ್ ಗಿಳುಂಕ್ ಜಾಯ್ನಾತ್‌ಲ್ಲಿ ಉಂಡಿ ಜಾವ್ಯೆತಾ.
ಕವಿನ್ ಎಕಾ ವಿಶಿಷ್ಟ್ ತಂತ್ರಾನ್ ಏಕ್ ಉಂಚ್ಲೊ ವಿಷಯ್ ವಿಣುನ್ ಹಿ ಕವಿತಾ ಬರಯಿಲ್ಲ್ಯಾನ್ ಮನ್ಶಾಕ್ ಧೊಸ್ಚ್ಯಾ ಎಕಾ ಖರ್‍ಯಾ ಸಮಸ್ಯಾಚಿ ಗಂಭೀರತಾ ಸಲೀಸಾಯೆನ್ ಹಾಂಗಾಸರ್ ಉಗ್ತಿ ಜಾಲ್ಲಿ ದಿಸ್ತಾ.
ಕಿಶೂ ಬಾರ್ಕೂರ್ ಕಥಾಕಾರ್ ಜಾವ್ನ್ ಕಿತ್ಲೊ ಬಳ್ವಂತ್‌ಕಿ, ತಸಲೀಚ್ ಶಾಥಿ ತಾಣೆ ಹೆ ಕವಿತೆದ್ವಾರಿಂ ಆಮ್ಚೆಮುಕಾರ್ ದಾಕಯ್ಲ್ಯಾ. ಹಾಂತ್ಲೊ ವಿಷಯ್ ಸಂಸಾರಾಚೆ ಖಂಯ್ಚೇಯ್ ವೆಕ್ತಿಕ್ ನಾಟ್ವೊಂಚೆ ತಸಲೊ. ತ್ಯಾದೆಕುನ್ ಹಿ ಕವಿತಾ ಸಂಸಾರಾಚ್ಯಾ ಹೆರ್ ಭಾಸಾಂಕ್ ಅನುವಾದಿತ್ ಜಾಯ್ಜಾಯ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಾಕಾ ಏಕ್ ಘಡಿ ದೆಂವೊಂಕ್ ಸೊಡಾ!
ಹೋಯ್... ಹೋಯ್... ಹೂಡ್ತ್...
ಸಂಸಾರಾಕ್ ರಾವಯಾ...
ಸಂಸಾರಾಕ್ ರಾವಯಾ
ಹಾಂವ್ ದೆಂವ್ತಾಂ
ಮಧೆಂ ರಸ್ತ್ಯಾರ್ ತರ್‌ಯ್
ಸುಶೇಗ್ ಕರ್‍ತಾಂ
ಬಿಗಿಲ್ ಫುಂಕಾ, ಬೆಲ್ ಮಾರಾ
ಮ್ಹಾಕಾ ಏಕ್ ಘಡಿ ದೆಂವೊಂಕ್ ಸೊಡಾ!
ಗಡ್ದಿರೆ ಬಾಬಾ ಕಸ್ಲಿ ಗಡ್ದಿ
ದೊಳ್ಯಾ ಕಾನಾ ನಾಕಾಂಕ್ ಚೆಪ್ಲ್ಯಾ ಗುಡ್ದಿ
ಕೋಣ್ ಎಕ್ಲೊ ಪಾಟ್ಲ್ಯಾನ್ ಲೊಟ್ತಾ
ಆನ್ಯೇಕ್ಲೊ ಮುಕ್ಲ್ಯಾನ್ ಕೊಂಕ್ತಾ
ಅಳೆ ಹಾಂಗಾ ಬೊಮ್ ಫೊಡ್ತಾತ್
ಥಂಯ್ ಪಳೆ ತೆಲಾಕ್ ಝುಜ್ತಾತ್
ಥಂಯ್ಸರ್ ಉಟ್ಲಾ ನ್ಯೂಕ್ಲಿಯರ್ ಮುರ್‍ಮುರೊ
ಹಾಂಗಾಸರ್ ಪೆಟ್ಲಾ ಜಾತಿಂಚೊ ಧುರೊ
ಕಂಡಕ್ಟರಾಚಿ ಕುರು ನಾ
ರೆಗ್ರೆರುಲಿಂಚಿ ಮೂರ್ ನಾ
ಹೆ ಗಡ್ದೆಂತ್ ಹಾಂವ್ ಸುಕ್ಲಾಂ
ಸಗ್ಳೊಚ್‌ಮುಂಗಾ ಖಂತಿನ್ ಜಿರ್‍ಲಾಂ
ಬ್ರೇಕ್ ದಾಂಬಾ, ಕಾಂಪಿಣ್ ವೊಡಾ
ಮ್ಹಾಕಾ ಏಕ್ ಘಡಿ ದೆಂವೊಂಕ್ ಸೊಡಾ!
ಸರಾಯ್ ಸಾಯ್ಬಾ ಕಸ್ಲಿ ಸರಾಯ್...
ಫುರ್‍ಸತ್ ನಾಸ್ತಾಂ ಧಾಂವ್ತಾ ಪಿರಾಯ್
ಅಳೆ ಥಂಯ್ ತೊ ಹಾತ್ ಹಾಲಯ್ತಾ
ಡ್ರಾಯ್ವರ್ ರಾವಯ್ನಾಸ್ತಾಂಚ್ ಧಾಂವ್ಡಾಯ್ತಾ
ಬೊಲ್ಯಾಗಾರ್ ಧಾಂವ್ಡಾವ್ನ್ ಹಾಡ್ತಾ
ಮುಕ್ಲೆ ಘುಂವ್ಡೆರ್ ಬೋವ್‌ಶ್ಯಾ ಧರ್‍ತಾ
ತ್ಸುನಾಮಿ, ಕಾತ್ರಿನಾ, ಧರ್‍ತೆಕಾಂಪ್ಣಿ
ಗಾಡಿಮೂರೆ ಧಾಂವ್ತಾ ಮರ್‍ಣಾಧಾಂವ್ಣಿ
ಕಂಡಕ್ಟರ್ ತೊ ಖಂಯ್ ಪಾವ್ಲಾ?
ಜಾಗೊ ನಾಸ್ತಾಂ ಬಾವ್ಡೊ ಟೊಪಾರ್ ಚಡ್ಲಾ!
ಹೆ ಸರಾಯೆನ್ ಹಾಂವ್ ಥಕ್ಲಾಂ
ಪುರಾಸಾಣೆನ್ ಪುರ್‍ತೊ ಪಿಕ್ಲಾಂ
ಸಿಗ್ನಲ್ ಪೆಟಯಾ, ಹಂಪ್ಸ್ ಬಾಂಧಾ
ಮ್ಹಾಕಾ ಏಕ್ ಘಡಿ ದೆಂವೊಂಕ್ ಸೊಡಾ!
ಹೋಯ್.. ಹೋಯ್... ಹೋಯ್
ಏಕ್ ಘಡಿ ರಾವಯಾರೆ ಸಾಯ್ಬಾ
ಹಾಂವ್ ದೆಂವ್ತಾಂ
ಮ್ಹಾಕಾ ಏಕ್ ಘಡಿ ದೆಂವೊಂಕ್ ಸೊಡಾ
ಸುಶೆಗಾಚೆ ದೋನ್ ಘೊಟ್ ಪಿಯೆಂವ್ಕ್ ಸೊಡಾ!
-ಕಿಶೂ, ಬಾರ್‍ಕುರ್