ಸಂಪಾದಕೀಯ್:
ನಿತಳ್ ನಿತಳ್ ಮ್ಹಣುನ್ ಕಸ್ತಾಳ್ ಕರ್ನ್ ವೆಚೆ ಮನೀಸ್
ಸ್ವಚ್ಛ್ ಭಾರತ್ ಅಭಿಯಾನಾಚೆ ಪಾಟ್‍ಭುಂಯ್ಚೆರ್ ಎರಿಕ್ ಸೋನ್ಸ್ ಹಾಣೆಂ ಬರಯಿಲ್ಲಿ ಹಿ ಕವಿತಾ ಜನೆರ್ ಮ್ಹಯ್ನ್ಯಾಂತ್ ಬಾರ್ಕೂರಾಂತ್ ಚಲಲ್ಲ್ಯಾ 'ಕವಿತಾ ಫೆಸ್ತ್' ಸಂದರ್ಭಾರ್ ತಾಣೆಂಚ್ ವಾಚಲ್ಲಿ. ನಿತಳಾಯೆಚ್ಯಾ ನಿಬಾನ್ ಜೆಂ 'ಗಲೀಜ್' ಚಲ್ತಾ, ತೆಂ ಉಕ್ಲುನ್ ದಾಕಯ್ತಾನಾ, ಆನ್ಯೇಕೆ ವಾಟೆನ್ ವೆಗ್ಳ್ಯಾ ನಮುನ್ಯಾಚೆಂ ಕಸ್ತಾಳ್ ಕವಿನ್ ಭಾಯ್ರ್ ಘಾಲಾಂ. ಹೆಂ ಕಸ್ತಾಳ್ ನಿತಳ್ ಕರುಂಕ್ ಕೊಣಾಯ್ಕಿ ಕಸಲೀಯ್ ಖಂತ್, ಹುಸ್ಕೊ ನಾತಲ್ಲ್ಯಾವಿಶಿಂ ತೊ ಶಿಣುನ್ ಆಸಾ.
ಕವಿತಾ ವಾಚುನ್ ವೆತಾನಾ, ಬದ್ಲಲ್ಲ್ಯಾ ಆಮ್ಚ್ಯಾ ಸಮಾಜಾಂತ್ ಜಿಂ ಅನಪೇಕ್ಷಿತ್ ಘಡಿತಾಂ ಘಡುನ್ ಆಸಾತ್, ತಿಂ ಎಕಾ ಫಾಟ್ಲ್ಯಾನ್ ಏಕ್ ಕವಿನ್ ಧರುನ್ ದವರ್‍ಲ್ಯಾಂತ್ -ಕೆಮರಾಂತ್ ಪಿಕ್ಚರ್ ಧರ್ನ್ ದವರಲ್ಲೆಬರಿ.
ಆಮ್ಚೆ ಕವಿ ಸಮಾಜಾಂತ್ಲ್ಯಾ ಸಮಸ್ಯಾಂಕ್ ಕಶೆ ಸ್ಪಂದನ್ ಕರ್‍ತಾತ್ ಮ್ಹಳ್ಳ್ಯಾಕ್ ಹಿ ಕವಿತಾ ಗೊವಾಯ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಭಾರತ್ ಮಾತ್ರ್ ಸ್ವಚ್ಛ್ ಆಸುಂ
ಪ್ರಧಾನಿ ಝಾಡಿ, ಬಿಸ್ಪ್‌ಯಿ ಧರಿ
ಸಾರಣ್ ತಿ ಭಾಗಿ ಖರಿ
ರಾಜ್‌ರಸ್ತೊ ಸೊಭ್ಲೊ ಖಿಣಾನ್
ತಸ್ವಿರ್‍ಯಾಂಚೆಂ ಕ್ಲಿಕ್ಕಿ ಸೊಭಾಣ್
ಭಾಷಣ್ ಸಂಪ್ಲೆಂ, ಅನಾಥ್ ಭಾಸೊ
ಭಾರತ್ ಮಾತ್ರ್ ಸ್ವಚ್ಛ್ ಆಸುಂ.
ಚುಂಗ್ಡಿ ಸಿಗ್ರೆಟ್ ಮೆಳ್ಚೆಬರಿ ನಾ
ಪ್ಯಾಕೆಟಿ ಶಿವಾಯ್ ದುಸ್ರಿ ವಾಟ್ ನಾ
ಧುವ್ರಾ ಮ್ಹೆಳೆಂ, ಪೊಪಿಸ್ ಕಾಳೆಂ
ಖೊಂಕ್ಲೆ ಸಾಂಗಾತ್, ಥಿಂಪಿಯಾ ತಳೆಂ
ಹರ್ಧ್ಯಾಘುಡ್ ಲಾಸುನ್ ವಚುಂ
ಭಾರತ್ ಮಾತ್ರ್ ಸ್ವಚ್ಛ್ ಆಸುಂ.
ಕಾಪ್ಡಾ ಪಾಲಂವ್ ದಿಸ್ಲ್ಯಾರ್ ಪುರೊ
ಜಾಗೊ ಮೊನ್ಜಾತೆ ಛಾರೊ
ಮಾಸಾ-ಮುದ್ಯಾ ಆಶೆ ಲಾಳ್
ವ್ಹಡಾಂ ನಾಂತ್, ಆಸಾ ಬಾಳ್
ಆವಯ್-ಭಯ್ಣ್ ನಾತೆಂ ಲಾಸುಂ
ಭಾರತ್ ಮಾತ್ರ್ ಸ್ವಚ್ಛ್ ಆಸುಂ.
ಸೊಮ್ಗೊಳಾಚೊ ಸಡಿಳ್ ಕಾಚ್
ದೇವ್ ಮನ್ಶಾಕ್ ದೇಶ್‍ದ್ರೋಹಿ ಗಾಂಚ್
ಮಾಪ್ಳೊ ಕಿರಿಸ್ತಾಂವ್ ಕರಂದಾಯ್ ತುಕಾ
ತಾಂಚ್ಯಾ ಫೆಸ್ತಾಂಕ್ ರಜಾ ದೀನಾಕಾ
ಜೆವ್ಣಾಖೊಲ್ಯಾರ್ ಲೊಳ್ಚೊ ವೊಸೊ
ಭಾರತ್ ಮಾತ್ರ್ ಸ್ವಚ್ಛ್ ಆಸುಂ
ದೆವಾ ಮಾತ್ಯಾರ್ ಕೊರೊಡಾಂ ಕುರೊವ್
ಸಫಾಯ್‌ವಾಲ್ಯಾಕ್ ಗುವಾ ಭರೊ
ಗುವಾಗುಂಡಿಯೆಂತ್ ಉಸ್ವಾಸಾ ತತ್ವಾರ್
ಗಂಗೆವೊರ್‍ನಾಂತ್ ಮಡ್ಯಾಂ ಸುಂರ್‍ಗಾರ್
ಧುವೆಕ್ ಆಂವ್ಡೆತ್ ಬಾಪಯ್ ಪಿಸೊ
ಭಾರತ್ ಮಾತ್ರ್ ಸ್ವಚ್ಛ್ ಆಸುಂ
ಶಿರೊ ಗಾಂಟಾಯ್ಲ್ಯಾರ್ ಗೆಲೆ ದೊಳೆ
ಕಾಳೊ ದುಡು ಪಾಟಿಂ? ಭೆಷ್ಟೆ ಬುಳ್ಬುಳೆ
ಮಂಗಳಾಕ್ ಗೆಲ್ಯಾಂವ್ ಉಣ್ಯಾ ಮೊಲಾರ್
ಚರಂಡಿ ಗುಂಡಿ ದೆಖೊಂಕಚ್ ವಿರಾರ್
ಪುರುಶತ್ವ್ ಪರೀಕ್ಷೆಚೆರಚ್ ತುಮ್ಚೊ ಪುಸ್ಪುಸೊ
ಭಾರತ್ ಮಾತ್ರ್ ಸ್ವಚ್ಛ್ ಆಸುಂ
ಯುವನಾಯಕಿಚೊ ಫೊಟೊ ಮೊಬಾಯ್ಲಾರ್
ಝೂಮ್ ಕರ್ನ್ ಪಳಯ್, ಹರ್ಧೆಂ ಉಬಾರ್
ಟಿಆರ್‌ಪಿ ಚಡೊಂವ್ಕ್ ಮಾಧ್ಯಮಾಂಕ್ ಜಾಯ್ ತರ್
ಉದ್ರೇಕಿತ್ ಸಂದೇಶ್, ಫಟ್ಕಿರಿ ಖಬರ್
ಉಗ್ರ್-ದಮನಾ ಪ್ರಾಸ್ ಖಂತ್, ಮೊಗಾ ಉಮ್ಯಾಚೊ
ಭಾರತ್ ಮಾತ್ರ್ ಸ್ವಚ್ಛ್ ಆಸುಂ
ಗಡಿ ದೊಂಗ್ರಾಂನಿ ಸೊಜೆರಾಂಚಿಂ ರಗ್ತಾ ಖತಾಂ
ವಿಧವ್ ಬಾಯ್ಲಾಂಚೆ ವಾಟ್ಲೆಂತ್ ದುಕಾಂ ಶಿತಾಂ
ಗಾಯೆಕ್ ಆಲ್ತಾರ್, ಮನ್ಶಾಜಿವಾಕ್ ನಾ ಥಾರೊ
ಸಮಾಜಾಕ್ ಪೆಟಯ್ ಉಜೊ, ರಸ್ತೊ ನಿತಳ್ ಜಾಲ್ಯಾರ್ ಪುರೊ
ಶ್..! ಮ್ಹೆಳೆಂ ಗಲೀಜ್ ಸಗ್ಳೆಂ ಹೆಂ ಉಲೊಂವ್ಕ್ ನಜೊ
ಭಾರತ್ ಮಾತ್ರ್ ಸ್ವಚ್ಛ್ ಆಸುಂ
ಭಾರತ್ ಮಾತ್ರ್ ಸ್ವಚ್ಛ್ ಆಸುಂ
-ಎರಿಕ್ ಸೋನ್ಸ್ ಬಾರ್ಕೂರ್
संपादकीय:
नितळ नितळ म्हणून कस्ताळ कर्न वेचे मनीस
स्वच्छ भारत अभियानाचे पाटभुंयचेर एरीक सोन्स हाणें बरयिल्ली ही कविता जनेर म्हयन्यांत बारकूरांत चलल्ल्या 'कविता फेस्त' संदरभार ताणेंच वाचल्ली. नितळायेच्या निबान जें 'गलीज' चलता, तें उकलून दाकयताना, आनयेके वाटेन वेगळ्या नमुन्याचें कस्ताळ कवीन भायर घालां. हें कस्ताळ नितळ करूंक कोणायकी कसलीय खंत, हुसको नातल्ल्याविशीं तो शिणून आसा.
कविता वाचून वेताना, बदलल्ल्या आमच्या समाजांत जीं अनपेक्षीत घडितां घडून आसात, तीं एका फाटल्यान एक कवीन धरून दवरल्यांत -केमरांत पिकचर धर्न दवरल्लेबरी.
आमचे कवी समाजांतल्या समस्यांक कशे स्पंदन करतात म्हळ्ळ्याक ही कविता गोवाय.
-मेल्विन रोड्रीगस
कविता:
भारत मात्र स्वच्छ आसूं
प्रधानी झाडी, बिस्पयी धरी
सारण ती भागी खरी
राजरस्तो सोभलो खिणान
तसविऱ्याचें क्लिक्की सोभाण
भाषण संपलें, अनाथ भासो
भारत मात्र स्वच्छ आसूं.
चुंगडी सिग्रेट मेळचेबरी ना
पॅकेटी शिवाय दुसरी वाट ना
धुवरा म्हेळें, पोपीस काळें
खोंकले सांगात, थिंपिया तळें
हरध्याघुड लासून वचूं
भारत मात्र स्वच्छ आसूं.
कापडा पालंव दिसल्यार पुरो
जागो मोनजाते छारो
मासा-मुद्या आशे लाळ
व्हडां नांत, आसा बाळ
आवय-भयण नातें लासूं
भारत मात्र स्वच्छ आसूं.
सोमगोळाचो सडीळ काच
देव मनशक देशद्रोही गांच
मापळो किरिस्तांव करंदाय तुका
तांच्या फेस्तांक रजा दीनाका
जेवणाखोल्यार लोळचो वोसो
भारत मात्र स्वच्छ आसूं
देवा मात्यार कोरोडां कुरोव
सफायवाल्याक गुवा भरो
गुवागुंडियेंत उसवासा तत्वार
गंगेवोर्नांत मड्यां सुंर्गार
धुवेक आंवडेत बापय पिसो
भारत मात्र स्वच्छ आसूं
शिरो गांटायल्यार गेले दोळे
काळो दुडू पाटीं? भेश्टे बुळबुळे
मंगळाक गेल्यांव उण्या मोलार
चरंडी गुंडी देखोंकच विरार
पुरुशत्व परीक्षेचेरच तुमचो पुसपुसो
भारत मात्र स्वच्छ आसूं
युवनायकिचो फोटो मोबायलार
झूम कर्न पळय, हर्धें उबार
टिआरपी चडोवंक माध्यमांक जाय तर
उद्रेकीत संदेश, फटकिरी खबर
उग्र-दमना प्रास खंत, मोगा उम्याचो
भारत मात्र स्वच्छ आसूं
गडी दोंगरांनी सोजेरांचीं रगता खतां
विधव बायलांचे वाटलेंत दुकां शितां
गायेक आलतार, मनशाजिवाक ना थारो
समाजाक पेटय उजो, रस्तो नितळ जाल्यार पुरो
श्..! म्हेळें गलीज सगळें हें उलोवंक नजो
भारत मात्र स्वच्छ आसूं
भारत मात्र स्वच्छ आसूं
-एरीक सोन्स बारकूर