ಸಂಪಾದಕೀಯ್:
ಜೀವ್ ಆಸ್ತಾನಾ ನಾತಲ್ಲೊ ಮೋಗ್ ಮೆಲ್ಯಾ ಉಪ್ರಾಂತ್ ಕಿತ್ಯಾಕ್?
ಮನ್ಶಾಚ್ಯಾ ದೊಡ್ತ್ಯಾ ಸ್ವಭಾವಾಚೆರ್ ಬೋಟ್ ಜೊಕ್ಚಿ ಕವಿತಾ ಹಾಂಗಾ ಆಸಾ. ಜೀವಂತ್ ಆಸ್ತಾನಾ ಕರುಂಕ್ ಜಾಯ್ ಆಸಲ್ಲೆಂ ಕಾಮ್, ದಿವ್ಯೆತಾ ಜಾಲ್ಲೊ ಮೋಗ್, ಹಾಡುಂಯೆತಾ ಜಾಲ್ಲೊ ಹಾಸೊ - ಮೆಲ್ಯಾ ಉಪ್ರಾಂತ್ ಖಂಯ್ಚ್ಯಾ ಕರ್ಮಾ ಖಾತೀರ್? ಆಯ್ಚ್ಯಾ ದಿಸಾ ಆಪ್ಣಾಚ್ಯಾ ಉಲೊವ್ಣ್ಯಾಚೊ ಅರ್ಥ್ ಜರ್ ತುಕಾ ಗಮನಾ, ತರ್ ಮೆಲ್ಯಾ ಉಪ್ರಾಂತ್ ತುಂವೆಂ ತಾಂಚೊ ಅರ್ಥ್ ಸೊಧುಂಕ್ ವಚುನ್, ಪಶ್ಚಾತ್ತಾಪಾಚಿ ದುಖಾಂ ಗಳೊಂವ್ಚ್ಯಾಂತ್ ಕಿತೆಂ ಫಾಯ್ದೊ ಮ್ಹಣುನ್ ಹೆ ಕವಿತೆಂತ್ಲಿ ನಾಯಕಿ ವಿಚಾರ್‍ತಾ.
ಮಾಗೀರ್ ತಿ ಕೊಣಾಕ್ ಬೋಟ್ ಜೊಕ್ತಾ? ಕೊಣಾಕ್ ಶಿಟ್ಕಾಯ್ತಾ? ಜಾಂವ್ಕ್ ಪುರೊ ತಿಚ್ಯಾ ಮೊಗಾಚ್ಯಾ ಮನ್ಶಾಕ್ - ಘೊವಾಕ್, ಆಪ್ಲ್ಯಾ ಚಲ್ಯಾಕ್ ಮ್ಹಣ್ಜೆ ಪುತಾಕ್, ಜಾಂವ್ಕ್ ಪುರೊ ಆಪ್ಲ್ಯಾ ಮೋಗ್ ಕರ್‍ಣಾರಾಕ್.
ಸಗ್ಳಿ ಕವಿತಾ ಎಕೆ ಸ್ತ್ರೀಯೆಚಿಂ ಭೊಗ್ಣಾಂ ಮ್ಹಳ್ಯಾರ್ ಕಿತೆಂ ಮ್ಹಣುನ್ ಆಮ್ಕಾಂ ಸಾಂಗ್ತಾತ್. ರೂಪಾಲಿನ್ ಆಪ್ಣಾಕ್ ಕಿತೆಂ ಭೊಗ್ಲಾಂ ತೆಂ ಸೊಂಪ್ಯಾ ಉತ್ರಾಂನಿ ಕವಿತೆಂತ್ ವಿಣ್ಲಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಜರ್ ತುಕಾ ಮ್ಹಜಿ ಯಾದ್ ಜಾಯ್ನಾ
ಹಾಂವ್ ಆಸ್ತಾನಾ ಜರ್ ತುಕಾ ಮ್ಹಜಿ ಯಾದ್ ಜಾಯ್ನಾ
ಜಾಲ್ಯಾರ್ ಹಾಂವ್ ವತಕರೂಯ್ ಮ್ಹಜಿ ಯಾದ್ ತುಂ ಕಾಡುನಾಕಾ
ಹಾಂವ್ ಆಸ್ತಾನಾ ಜರ್ ತುಂ ಮ್ಹಾಕಾ ಹಾಸೊಂವ್ಕ್ ಶಕನಾ
ಜಾಲ್ಯಾರ್ ಹಾಂವ್ ವತಕರ್ ಮಾತ್ ತುಂ ರಡನಾಕಾ
ಹಾಂವ್ ಉಲಯಲ್ಲೆಂ ತುಕಾ ಆಜ್ ಆಂವಡ್ನಾ
ಜಾಲ್ಯಾರ್ ಹಾಂವ್ ವತಕರ್ ಉಲ್ಯಾಕ್ ಮ್ಹಜ್ಯಾ ಆಶೆನಾಕಾ.
ಆಜ್ ಮ್ಹಾಕಾ ತುಂ ಸಮ್ಜುನ್ ಘೆಂವ್ಕ್ ಶಕನಾ
ಜಾಲ್ಯಾರ್ ಮಾಗೀರ್ ಮ್ಹಜ್ಯಾ ಶಬ್ದಾಂಚೊ ಅರ್ಥ್ ತುಂ ಸೊಧುನಾಕಾ
ಮ್ಹಜೆ ಖಾತೀರ್ ಆಜ್ ಜೆಂ ಕರುಂಕ್ ಶಕನಾ
ತೆಂ ಹಾಂವ್ ವತಕರೂಯ್ ಮ್ಹಜೆ ಖಾತೀರ್ ಕರುನಾಕಾ
'ತುಂ ಆಶಿಲ್ಲೆಂ ಜಾಲ್ಯಾರ್ ಅಶೆಂ... ತುಂ ಆಶಿಲ್ಲೆಂ ಜಾಲ್ಯಾರ್ ತಶೆಂ!'
ಹಾಂವ್ ವತಕರ್ ಮಾತ್ ಕೆನ್ನಾಂಯ್ ಮ್ಹಣನಾಕಾ.
-ರೂಪಾಲಿ ಕೀರ್ತನಿ
संपादकीय:
जीव आसताना नातल्लो मोग मेल्या उपरांत कित्याक?
मनशाच्या दोडत्या स्वभावाचेर बोट जोकची कविता हांगा आसा. जीवंत आसताना करूंक जाय आसल्लें काम, दिवयेता जाल्लो मोग, हाडुंयेता जाल्लो हासो - मेल्या उपरांत खंयच्या कर्मा खातीर? आयच्या दिसा आपणाच्या उलोवण्याचो अर्थ जर तुका गमना, तर मेल्या उपरांत तुंवें तांचो अर्थ सोधुंक वचून, पश्चात्तापाचीं दुखां गळोंवच्यांत कितें फायदो म्हणून हे कवितेंतली नायकी विचारता.
मागीर ती कोणाक बोट जोकता? कोणाक शिटकायता? जावंक पुरो तिच्या मोगाच्या मनशाक - घोवाक, आपल्या चल्याक म्हणजे पुताक, जावंक पुरो आपल्या मोग करणाराक.
सगळी कविता एके स्त्रीयेचीं भोगणां म्हळ्यार कितें म्हणून आमकां सांगतात. रूपालीन आपणाक कितें भोगलां तें सोंप्या उतरांनी कवितेंत विणलां.
-मेल्विन रोडिगस
कविता:
जर तुका म्हजी याद जायना
हांव आसतना जर तुका म्हजी याद जायना
जाल्यार हांव वतकरय म्हजी याद तूं काडनाका
हांव आसतना जर तूं म्हाका हांसोवंक शकना
जाल्यार हांव वतकर मात तूं रडनाका
हांव उलयल्ले तुका आज आवडना
जाल्यार हांव वतकर उल्याक म्हज्या आशेनाका
आज म्हाका तूं समजून घेंवंक शकना
जाल्यार मागीर म्हज्या शब्दांचो अर्थ तूं सोद्नाका
म्हजे खातीर आज जें करूंक शकना
तें हांव वतकरय म्हजे खातीर करनाका
'तूं आशिल्ले जाल्यार अशें…तूं आशिल्ले जाल्यार तशें!'
हांव वतकर मात केन्नाच म्हणनाका
-रुपाली कीर्तनी