ಸಂಪಾದಕೀಯ್:
ಜಿವಿತಾಕ್ ರೂಪ್ ಹಾಡುಂಕ್ ಉಜ್ಯಾಂತ್ ಲಾಸುನ್ ವೆಚಿ ಆಶಾ
ಉಜ್ಯಾಕ್ ಕೆದಳಾ, ಕಶೆಂ ಆಮಿ ಬಲಿ ಜಾತಾಂವ್ ಸಾಂಗುಂಕ್ ಜಾಯ್ನಾ. ಜಶೆಂ ಸೊನೆಂ ಉಜ್ಯಾಂತ್ ಭಸ್ಮಲ್ಯಾ ಉಪ್ರಾಂತ್ ತಾಕಾ ಏಕ್ ರೂಪ್ ದಿವ್ಯೆತಾ, ತಶೆಂ ಉಜ್ಯಾಂತ್ ಲಾಸ್ಲ್ಯಾ ಉಪ್ರಾಂತ್ ಮನ್ಶಾಕಯ್ ಏಕ್ ಆಕಾರ್ ಯೆತಾ. ಪುಣ್ ತ್ಯಾ ಉಜ್ಯಾಂತ್ಲ್ಯಾನ್ ಪಾಶಾರ್ ಜಾಂವ್ಚಿ ಪಿಡಾ, ಜಲ್ಮಾಕ್ ಆಯಿಲ್ಲ್ಯಾ ಕೊಣಾಯ್ಕಿ ಯೆಂವ್ಚಿ ನ್ಹಯ್. ದೆಕುನಚ್ ಕಾಂಯ್ ಕವಿ ಹಾಂಗಾಸರ್ ಮ್ಹಣ್ತಾ ಜಾಂವ್ಕ್ ಪುರೊ: "ಭೊಂವ್ತಿಂ ಕೊಣ್ ನಾ ಆಸುಂ".
ಜಿವಿತಾಂತ್ ಪಿಕಲ್ಲ್ಯಾ ಮನ್ಶಾಕ್, ಉಜೊ ಕೆದಳಾ ಕಸೊ ಆಪ್ಣಾಕ್ ಗ್ರಾಸುಂಕ್ ಯೆತಾ ಮ್ಹಳ್ಳೆಂ ಕಳಿತ್ ಆಸುಂಕ್ ಜಾಯ್. ತೊ ಆಯಿಲ್ಲ್ಯಾ ವೆಳಾರ್ ತಾಕಾ ಪಾಲ್ವೊನ್ ಸೊಡ್ಚೆಂ ಉದಕ್ ತಾಚೆಲಾಗಿಂ ತಯಾರ್ ಕರುನ್ ದವ್ರಿಲ್ಲೆಂ ಆಸುಂಕ್ ಜಾಯ್. ಉಜ್ಯಾವಿಣೆಂ, ಜೊಡಲ್ಲ್ಯಾ ತಶೆಂ ಆಪ್ಣಾಯಿಲ್ಲ್ಯಾ ಅನ್ಭೋಗಾನ್ ಮನ್ಶಾನ್ ಆಪ್ಣಾಚ್ಯಾ ವ್ಯಕ್ತಿತ್ವಾಕ್ ಆಕಾರ್ ದೀಂವ್ಕ್ ಸಾಧ್ಯ್ ಆಸಾ. ಕೊಣಾಕ್ ಭಸ್ಮುಂಕ್ ಖುಶಿ ಆಸಾ ತೊ ಭಸ್ಮುನ್ ವಚುಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಗಿಮೆ ಉಜೊ
ತ್ಯಾ ದೀಸ್ ದೊನ್ಪಾರಾಂ..
ಗಿಮೆಚೆ ಧಗಿ ಮಧೆಂ ಸಕ್ಕಡ್ ಹುನ್‌ಹುನ್ ಆಸ್ತಾಂ
ಕಂಪ್ಯೂಟರಾ ಮುಕಾರ್ ಬಸುನ್ ಕಿತೆಂ ಕಿತೆಂ
ಕಿಸವ್ನ್ ಆಸ್ತಾಂ.....
ಭಾಯ್ಲೊ ಉಜೊ ಎಕಾಚ್ಛಾಣೆಂ ಲಾಂಬ್‌ಲಾಂಬ್
ಭಾರಿಕ್ ಭಾರಿಕ್ ಜಾವ್ನ್.....
ಮ್ಹಜೆ ಭಿತರ್ ರಿಗ್ಲೊ.
ಆತಾಂ...
ಮ್ಹಜೆ ಭಿತರ್ ಮಾಸ್ ನಾ
ರೋಸ್ ನಾ, ವಾಸ್ ನಾ....
ಹಾಂವ್ ಫಕತ್ ಹಾಡಾಂ....
ಥೊಡೆ ಪಾವ್ಟಿಂ ಭಾಂಗ್ರಾ ರಂಗಾನ್, ತಾಂಬ್ಶಾ ರಂಗಾನ್,
ಪರ್ಜಳೀತ್....
ಎಕೇಕ್‌ಪಾವ್ಟಿಂ ಭುಗ್ಗ ಜಾತಾ
ಹಾಡಾಂ ಮಧ್ಲ್ಯಾನ್ ಆಗ್ಟ್ಯಾಂ ತೇಲ್
ಗುಂಡಾಯೆ ಗರ್ಭಾ ಥಾವ್ನ್ ವಯ್ರ್ ಉಸಾಳ್ತಾ.
ಕೊಣೀ ಹೆ ಉಬೆಂತ್ ಶಿಜನಾ ಜಾಂವ್.....
ಭೊಂವ್ತಿಂ ಕೋಣ್ ನಾ ಆಸುಂ ಮ್ಹಣ್ಚಿಚ್ ಮ್ಹಜಿ ಆಶಾ.
-ಸ್ಟೀವನ್ ಕ್ವಾಡ್ರಸ್ ಪೆರ್‍ಮುದೆ
संपादकीय:
जिविताक रूप हाडूंक उज्यांत लासून वेची आशा
उज्याक केदळा, कशें आमी बली जातांव सांगूंक जायना. जशें सोनें उज्यांत भस्मल्या उपरांत ताका एक रूप दिवयेता, तशें उज्यांत लासल्या उपरांत मनशाकय एक आकार येता. पूण त्या उज्यांतल्यान पाशार जांवची पिडा, जल्माक आयिल्ल्या कोणायकी येंवची न्हय. देकुनच कांय कवी हांगासर म्हणता जावंक पुरो: "भोंवतीं कोण ना आसूं".
जिवितांत पिकल्ल्या मनशाक, उजो केदळा कसो आपणाक ग्रासूंक येता म्हळ्ळें कळीत आसूंक जाय. तो आयिल्ल्या वेळार ताका पालवोन सोडचें उदक ताचेलागीं तयार करून दवरिल्लें आसूंक जाय. उज्याविणें, जोडल्ल्या तशें आपणायिल्ल्या अनभोगान मनशान आपणाच्या व्यक्तित्वाक आकार दीवंक साध्य आसा. कोणाक भसमूंक खुशी आसा तो भसमून वचूं.
-मेल्विन रोड्रीगस
कविता:
गिमे उजो
त्या दीस दोनपारां..
गिमेचे धगी मधें सककड हुनहून आसतां
कंपयूटरा मुकार बसून कितें कितें
किसवन आसतां.....
भायलो उजो एकाच्छाणें लांबलांब
भारीक भारीक जावन.....
म्हजे भितर रिगलो.
आतां...
म्हजे भितर मास ना
रोस ना, वास ना....
हांव फकत हाडां....
थोडे पावटीं भांगरा रंगान, तांबशा रंगान,
पर्जळीत....
एकेकपावटीं भुग्ग जाता
हाडां मधल्यान आगट्यां तेल
गुंडाये गरभा थावन वयर उसाळता.
कोणी हे उबेंत शिजना जांव.....
भोंवतीं कोण ना आसूं म्हणचीच म्हजी आशा.
-स्टीवन क्वाड्रस, पेर्मुदे