ಸಂಪಾದಕೀಯ್:
ದೆವಾಚ್ಯಾ ರಿಣಾಂತ್ ಮರಣ್ ಪಾವಲ್ಲೊ ಕವಿ ಜೆ. ಬಿ. ಮೊರಾಯಸ್
ಕವಿ ಜೆ.ಬಿ. ಮೊರಾಯಸಾಚಿ ದೇವ್ ಭಕ್ತೆಚಿ ಕವಿತಾ ಏಕ್ ಹಾಂಗಾಸರ್ ದಿಲ್ಯಾ. ಹಿ ಕವಿತಾ ಎಕ್ತೀಸ್ ವರ್ಸಾಂ ಆದಿಂ ಪರ್ಗಟ್ ಜಾಲ್ಲ್ಯಾ ತಾಚ್ಯಾ 'ಭಿತರ್‍ಲೆಂ ತುಫಾನ್' ಪುಸ್ತಕಾ ಥಾವ್ನ್ ವಿಂಚ್ಲ್ಯಾ. ತಾಚ್ಯಾಕೀ ಆದಿಂ ಕಿತ್ಲ್ಯಾ ವರ್ಸಾಂ ಆದಿಂ ತಾಣೆ ಹಿ ಕವಿತಾ ಬರಯಿಲ್ಲಿ ಖಬರ್ ನಾ. ಸಗ್ಳಿ ಕವಿತಾ ವಾಚ್ತಾನಾ ಸುರ್ಯಾಭಾಶೆನ್ ತಾಚೊ ದೇವ್ ಮ್ಹಳ್ಳೆಂ ಗಮ್ತಾ. ತಾಚ್ಯಾ ದೆವಾಕ್ ಸುರ್ಯಾಚಿ ಊಬ್. ತಾಚೆ ಧಾವೆಕ್ ತೊ ಉಜ್ಯಾಂತ್ಲೆ ಕೊಯ್ತೆಬರಿ ತಾಪುನ್ ತಾಂಬ್ಡೊ ಜಾಲಾ. ಆತಾಂ ತಾಣೆ ಆಕಾರ್ ದೀಂವ್ಕ್ ಮಾತ್ರ್ ಬಾಕಿ.
ಆಪ್ಲ್ಯಾ ಸಗ್ಳ್ಯಾ ಜಿವಿತಾಚಿ ಜಡಾಯ್ ತಾಚೆರ್ ದವರ್‍ನ್, ಮರ್ಣಾಂತ್ ಆನಿ ಜಲ್ಮಾಂತ್ ಆಪುಣ್ ತಾಚೊ ರಿಣ್ಕಾರಿ ಮ್ಹಳ್ಳೊ ಜೆ. ಬಿ. ಮೊರಾಯಸ್ ಆದ್ಲ್ಯಾ ವರ್ಸಾ ದೆವಾಧಿನ್ ಜಾಲೊ. ತ್ಯಾಚ್ ರಿಣಾಂತ್ ತೊ ಮೆಲೊ. ಪುಣ್ ಮರ್ಚೆ ಆದಿಂ ರೀಣ್ ದಿಲ್ಲ್ಯಾ ದೆವಾನ್ ಜೆ. ಬಿ. ಮೊರಾಯಸಾಕ್ ಮೊಳುನ್, ಬಡವ್ನ್ ಕವಿಚಿ ಮೂರ್ತಿ ಕರುನ್ ಜಾಲ್ಲಿ. ತ್ಯಾಚ್ ದೆಕುನ್ ಆಜಯ್ ತೊ ಆಮ್ಚೆ ಮಧೆಂ ಉರ್‍ಲಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ತುಜೊ ಹಾಂವ್ ರಿಣ್ಕಾರಿ
ಪ್ರಕಾಸ್ ತುಜೊ ದೊಳ್ಯಾಂಕ್
ತೊಪ್ತಾ ಧನಿಯಾ
ತುಜ್ಯಾ ಉಜ್ವಲ್ ಪ್ರಕಾಸಾಂತ್
ಮ್ಹಜಿ ಲ್ಹಾನ್ ಝಳಕ್ ಫಾಂಕ್ತಾಂ
ಸುರ್ಯಾಕ್ ಧರ್‍ಚ್ಯಾ
ಆರ್ಶಾಬರಿ
ಕಾಳೆಂ ಮೋಡ್ ಏಕ್
ಆಡಾಯ್ತ್ ತರ್ ಉಜ್ವಾಡ್ ತುಜೊ
ಹಾಂವ್ ಏಕ್ ಕಾಳೊಕಾಚಿ ರಾಸ್
ತುಜೆ ಧಗ್‌ಧಗೀತ್ ಉಬೆಂತ್
ಹಾಂವ್ ತಾಪ್ಲಾಂ
ಉಜ್ಯಾಂತ್ಲೆ ಕೊಯ್ತೆಬರಿ
ತಾಪುನ್ ಹಾಂವ್ ತಾಂಬ್ಡೊ ಜಾಲಾಂ
ಜಶಿ ಕೊಯ್ತಿ ಬಡವ್ನ್
ಹಾಡ್ಯೆತ್ ಜಾಯ್ ತೊ ಆಕಾರ್
ತಸೊ ಮ್ಹಾಕಾ ಬಡಯ್ ಧನಿಯಾ
ಹಾಡ್ ತುಂ ಮ್ಹಾಕಾ ರುಪಾರ್
ಕಾಳ್ಜಾಂತ್ಲಿ ಊಬ್
ನಿವೊಂಕ್ ಸೊಡಿನಾಕಾ
ತುಜೆ ಮುಟಿಂತ್ಲಿ ಮಾತಿ ಹಾಂವ್
ಬೊಟಾಂನಿ ತುಜ್ಯಾ
ದಾಂಬುನ್ ಪುಸುನ್
ಕರ್ ತುಂ ಏಕ್ ಮೂರ್ತಿ
ತುಜ್ಯಾ ಮನಾ ಜೊಕ್ತಿ
ಜಲ್ಮಾಂತ್ ಹಾಂವ್ ರಿಣ್ಕಾರಿ
ಮರ್ಣಾಂತ್ ಹಾಂವ್ ರಿಣ್ಕಾರಿ
-ಜೆ. ಬಿ. ಮೊರಾಯಸ್
संपादकीय:
देवाच्या रिणांत मरण पावल्लो कवी जे. बी. मोरायस
कवी जे.बी. मोरायसाची देव भक्तेची कविता एक हांगासर दिल्या. ही कविता एकतीस वर्सां आदीं परगट जाल्ल्या ताच्या 'भितरलें तुफान' पुस्तका थावन विंचल्या. ताच्याकी आदीं कितल्या वर्सां आदीं ताणे ही कविता बरयिल्ली खबर ना. सगळी कविता वाचताना सुर्ऱ्याभाशेन ताचो देव म्हळ्ळें गमता. ताच्या देवाक सुर्याची ऊब. ताचे धावेक तो उज्यांतले कोयतेबरी तापून तांबडो जाला. आतां ताणे आकार दीवंक मात्र बाकी.
आपल्या सगळ्या जिविताची जडाय ताचेर दवरन, मरणांत आनी जल्मांत आपुण ताचो रिणकारी म्हळ्ळो जे. बी. मोरायस आदल्या वर्सा देवाधीन जालो. त्याच रिणांत तो मेलो. पूण मरचे आदीं रीण दिल्ल्या देवान जे. बी. मोरायसाक मोळून, बडवन कविची मूर्ती करून जाल्ली. त्याच देकून आजय तो आमचे मधें उरला.
-मेल्विन रोड्रीगस
कविता:
तुजो हांव रिणकारी
प्रकास तुजो दोळ्यांक
तोपता धनिया
तुज्या उज्वल प्रकासांत
म्हजी ल्हान झळक फांकतां
सुर्याक धरच्या
आरशाबरी
काळें मोड एक
आडायत तर उजवाड तुजो
हांव एक काळोकाची रास
तुजे धगधगीत उबेंत
हांव तापलां
उज्यांतले कोयतेबरी
तापून हांव तांबडो जालां
जशी कोयती बडवन
हाडयेत जाय तो आकार
तसो म्हाका बडय धनिया
हाड तूं म्हाका रुपार
काळजांतली ऊब
निवोंक सोडिनाका
तुजे मुटिंतली माती हांव
बोटांनी तुज्या
दांबून पुसून
कर तूं एक मूर्ती
तुज्या मना जोकती
जल्मांत हांव रिणकारी
मरणांत हांव रिणकारी
-जे. बी. मोरायस