ಸಂಪಾದಕೀಯ್:
ಕುರ್‍ಲ್ಯಾಂಚೊ ಸ್ವಭಾವ್ ಆನಿ ಮನ್ಶಾಂಚೊ ಮನೋಭಾವ್
ಯೆರ್‍ಲ್ಯಾಂಚೆ ಆನಿ ಕುರ್‍ಲ್ಯಾಂಚೆ ದಾಕ್ಲೆ ದೀವ್ನ್ ಮೊಗಾನ್ ಆನಿ ಮೈಪಾಸಾನ್ ಸದಾಂಕಾಳ್ ಜಿಯೆಂವ್ಕ್ ಜಾಯ್ ಮ್ಹಣುನ್ ಮನ್ಶಾಕುಳಾಕ್ ಸಂದೇಶ್ ದಿಂವ್ಚ್ಯಾಕ್ ಕವಿನ್ ಹಿ ಕವಿತಾ ಬರಯ್ಲ್ಯಾ. ಯೆರ್‍ಲಿ ಉದ್ಕಾಂತ್ ಮಾತ್ರ್ ಜಿಯೆಂವ್ಚಿ ಮಾಸ್ಳಿ. ಕುರ್‍ಲೆಕ್ - ಉದ್ಕಾಂತ್ ಮಾತ್ರ್ ನ್ಹಯ್, ಥೊಡೊ ಕಾಳ್ ಧರ್ತೆರ್, ಖಡ್ಪಾಇಡ್ಯಾಂತ್ ಜಿಯೆಂವ್ಚಿ ತಾಕತ್ ಆಸ್ತಾ. ಯೆರ್‍ಲಿ ಸೊಭಿತ್ ದಿಸ್ತಾ. ಕಾಂಟೆ ತಿಕಾ ಚಡಿತ್ ನಾಂತ್. ಕುರ್‍ಲಿ ವಾಂಕ್ಡಿ ತಿಂಕ್ಡಿ, ಕಾಂಟೆ ತಿಕಾ ನಾಂತ್ ತರೀ, ಧೊಮೊಸ್ ಆಸ್ಚೆ ದಾಂಗೆ ತಿಕಾ ಆಸಾತ್. ಖೊವ್ಳಾಂ ನಾಂತ್ ತರೀ, ಕರ್‍ಲಾಂ ಆಸಾತ್.
ಉದ್ಕಾಂತ್ಲಿ ಕಾಡ್ಲ್ಯಾ ಉಪ್ರಾಂತ್ ಯೆರ್‍ಲಿ ವಾಂಚನಾ. ಕುರ್‍ಲಿ ವಾಂಚುಂಕ್ ಸಕ್ತಾ. ಪುಣ್ ಚಡಿತ್ ಕಾಳ್ ನ್ಹಯ್. ದೆಕುನ್ ತಿ ವಯ್ರ್ ಸಕಯ್ಲ್ ದಡ್ಬಡುನ್ ಆಸ್ತಾ. ಕೊಣಾಕ್ ತಿ ಆನ್ಯೇಕ್ಲ್ಯಾಚೆ ಪಾಂಯ್ ವೊಡ್ತಾ ಮ್ಹಣ್ ಭೊಗ್ತಾ ಜಾವ್ಯೆತ್. ಕೊಣಾಕ್ ತಿ ಆಪ್ಲೊ ಜೀವ್ ವಾಂಚೊಂವ್ಚ್ಯಾ ಖಾತೀರ್ ದಡ್ಬಡ್ತಾ ಮ್ಹಣ್ ಭೊಗ್ಲ್ಯಾರೀ ನವಲ್ ನಾ.
ಮನ್ಶಾಕ್ ಭಾಸ್ ಸಮ್ಜತಾ. ಪುಣ್ ಮಾಸ್ಳೆಚಿ ಭಾಸ್ ಕೊಣಾಕ್ ಸಮ್ಜತಾ?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಯೆರ್ಲ್ಯೊ ಆನಿ ಕುರ್ಲ್ಯೊ
ಯೆರ್ಲ್ಯೊ ಜಾಯಾ ಇಶ್ಟಾಂನೊ
ಯೆರ್ಲ್ಯೊ ಜಾಯಾ ಸದಾಂಚ್
ಖಂಯ್ಚ್ಯಾಯ್ ಕಾರಣಾಕ್ ಲಾಗೊನ್
ಕುರ್ಲ್ಯೊ ಜಾಯ್ನಾಕಾತ್ ಕೆದಿಂಚ್!
ಯೆರ್ಲ್ಯೊ ಪಳೆಯಾ ಕಿತ್ಲ್ಯೊ ನಿತಳ್
ಹಾಸುನ್ ನಾಚುನ್ ಖೆಳ್ತಾತ್
ಪಳೆಂವ್ಕ್ ಸೊಬಿತ್ ತಶೆಂ ನಿರ್ಮಳ್
ಉದ್ಕಾ ರಾಶಿಂತ್ ಬಾಳ್ತಾತ್!
ಕುರ್ಲ್ಯೊ ಪಳೆಯಾ ತ್ಯೊ ಕುರ್ಲ್ಯೊ
ಕುರ್ವೆಂ ಕೊಣ್‌ಯಿ ಧಾಂಪಿನಾ೦ತ್
ಎಕಾಮೆಕಾಚೆ ಪಾಯ್ ವೊಡುನ್
ವಯ್ರ್ ವಚುಂಕ್ ಸೊಡಿನಾಂತ್!
ಮಾಸ್ಳ್ಯೊ ಸಯ್ತ್ ಜಿಯೆತಾತ್ ಮೊಗಾನ್
ಸಾಂಗಾತಾ ಸಾಂಗಾತಾ ಭರ್ಸುನ್
ಮನಿಸ್ ಲಾಸ್ತಾ ಕಿತ್ಯಾಕ್ ಮೊಸ್ರಾನ್
ಎಕಾಮೆಕಾಚೆ ಪಾಯ್ ವೊಡುನ್?
ಯೆರ್ಲ್ಯೊ ಆನಿ ಕುರ್ಲ್ಯೊ ದೊನ್‌ಯಿ
ಮನ್ಶಾಕುಳಾಕ್ ಸ೦ದೇಶ್ ದಿತಾತ್
ಎಕಾಮೆಕಾ ಪಾಯ್ ವೊಡುನ್
ಸತ್ತ್ಯಾನಾಸ್ ಜಾಯ್ನಾಕಾ ಮ್ಹಣ್ತಾತ್!
-ಸಿಜ್ಯೆಸ್ ತಾಕೊಡೆ
संपादकीय:
कुरल्यांचो स्वभाव आनी मनशांचो मनोभाव
येरल्यांचे आनी कुरल्यांचे दाकले दीवन मोगान आनी मैपासान सदांकाळ जियेवंक जाय म्हणून मनशाकुळाक संदेश दिंवच्याक कवीन ही कविता बरयल्या. येरली उदकांत मात्र जियेंवची मासळी. कुरलेक - उदकांत मात्र न्हय, थोडो काळ धरतेर, खडपाइड्यांत जियेंवची ताकत आसता. येरली सोभित दिसता. कांटे तिका चडीत नांत. कुरली वांकडी तिंकडी, कांटे तिका नांत तरी, धोमोस आसचे दांगे तिका आसात. खोवळां नात तरी करलां आसात.
उदकांतली काडल्या उपरांत येरली वांचना. कुरली वांचूंक सकता. पूण चडीत काळ न्हय. देकून ती वयर सकयल दडबडून आसता. कोणाक ती आनयेकल्याचे पांय वोडता म्हण भोगता जावयेत. कोणाक ती आपलो जीव वांचोंवच्या खातीर दडबडता म्हण भोगल्यारी नवल ना.
मनशाक भास समजता. पूण मासळेची भास कोणाक समजता?
-मेल्विन रोड्रीगस
कविता:
येरल्यो आनी कुरल्यो
येरल्यो जाया इष्टांनो
येरल्यो जाया सदांच
खंयच्याय कारणाक लागोन
कुरल्यो जायनाकात केदींच्!
येरल्यो पळेया कितल्यो नितळ
हासून नाचून खेळतात
पळेंवक सोबीत तशें निर्मळ
उदका राशींत बाळतात!
कुरल्यो पळेया त्यो कुरल्यो
कुरवें कोणयी धांपीनांत
एकामेकाचे पाय वोडून
वयर वचूंक सोडीनांत!
मासळ्यो सयत जियेतात मोगान
सांगाता सांगाता भरसून
मनीस लासता कित्याक मत्सरान
एकामेकाचे पाय वोडून?
येरल्यो आनी कुरल्यो दोनयी
मनशाकुळाक संदेश दितात
एकामेका पाय वोडून
सत्त्यानास जायनाका म्हणतात!
-सिज्येस ताकोडे