ಸಂಪಾದಕೀಯ್:
ಜಾಂಬ್ಳಾಂಚ್ಯಾ ಮಾಟ್ವಾಂತ್ ಜಾಂಬೂಳ್ ಉತ್ಸವ್
ಎಕಾ ತೆಂಪಾರ್ ಜಾಂಬ್ಳಾಂ ಖಾವ್ನ್ ಆಮಿ ಜಾಂಬ್ಳಿ ಜಾತಾಲ್ಯಾಂವ್. ಕಸಲಿ ಏಕ್ ಮಝಾ! ಹ್ಯಾ ಎಕಾ ಫಳಾನ್ ಆಮ್ಚೆ ಜಿಬೆಕ್ ದಿಲ್ಲಿ ರೂಚ್ ಇತ್ಲಿ ತಿತ್ಲಿ ನ್ಹಯ್. ಆಜ್ ಎಕಾನೇಕ್ ಹಿಂ ಜಾಂಬ್ಳಾಂ ಖಂಯ್ ಗೆಲ್ಯಾಂತ್? ಆಜ್ ಸೂಪರ್ ಮಾರ್ಕೆಟಿಚ್ಯಾ ಕೌಂಟರಾರ್ ಮೊಲಾಕ್ ಘೆಜಾಯ್ ಜಾಲ್ಲಿ ಪರಿಸ್ಥಿತಿ! ಹಿಂ ಜಾಂಬ್ಳಾಂ ಫುಂಕ್ಯಾಕ್ ಮೆಳ್ತಾನಾ ಕಿತ್ಲಿ ಏಕ್ ರೂಚ್ ಆಸಲ್ಲಿ, ತಿ ಆತಾಂ ಕಿತ್ಯಾಕ್ ನಾ?
ಹಿಂ ಆನಿ ಜಾಯ್ತಿಂ ಹೆರ್ ಸವಾಲಾಂ ಹೆ ಕವಿತೆ ಮಾರಿಫಾತ್ ಬಾಯ್ ಇಂದೂ ಗೇರಸಪ್ಪೆನ್ ಹಾಂಗಾಸರ್ ಕೆಲ್ಯಾಂತ್. ತಶೆಂ ಕರ್‍ತಾನಾ ಜಾಂಬ್ಳಾಂಚ್ಯಾ ಉತ್ಸವಾಚೆಂ ಬರ್ಫೂರ್ ಚಿತ್ರಣ್ ತಿಣೆಂ ಕೆಲಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಜಾಂಬ್ಳಾಂ
ಜಾಂಬ್ಳಾಂ
ಝಗ್ಝಗೀತ್ ಕಾಳಿಂ ನಿಳಿಂ ಜಾಂಬ್ಳಾಂ
ಶೊಪಿಂಗ್ ಸೆಂಟರಾಚೆ ಕೌಂಟರೀರ್
ಪ್ಲಾಸ್ಟಿಕ್ ಪೆಟ್ಯೆಂತ್ ಪ್ಯಾಕ್‍ಬಂಧ್
ಅಡೆಚಿಂ ಝಗ್ಝಗೀತ್ ಜಾಂಬ್ಳಾಂ
ಆನೀಕ್ ಮನ್ ವರ್ಸಾಂ ಹುಪೂನ್ ಪಾವ್ಲೆಂ
ಘಾಟಾವಯ್ಲೆ ಆತೆಲೆ ಘರಾ
ಪೊರ್‍ಸಾಂತ್ಲ್ಯಾ ಜಾಂಬ್ಳಿ ಪೊಂದಾ
ಮನಯ್ತ್ ಜಾಂಬೂಳ್-ಸುವಾಳೊ
ವಯ್ರ್ ತಾಪ್ಲಾಂ ವೈಶಾಖ್ ವೊತ್
ದಾಟ್ ಪಾಚ್ವ್ಯಾ ಪಾನಾಂತ್
ಜಾಂಬೂಳ್ ಜಾಂಬೂಳ್ ಧನ್
ಹುನಾಳ್ಯಾ ರಜೆಂತ್
ಭುರ್ಗ್ಯಾಂಲೊ ಮಾಂಕ್ಡಾ ಹಿಂಡ್
ಘಾಲಿ ಘುರಿ ಜಾಂಬ್ಳಾ ಝಾಡಾರ್
ಖಾಂದ್ಯೊ ಹಾಲಯಿ ವಯ್ರ್
ಸಕಯ್ಲ್ ಜಾಂಬ್ಳಾಂ ಶಿಂವರ್
ಎಕೆಕ್ ಜಾಂಬೂಳ್ ಯೆದೆದೆ
ವೊತ್ ವಾರ್‍ಯಾಕ್ ಪಿಕಿಲ್ಲೆಂ
ಲುಟಿ ರಸ್‍ರಶೀತ್ ಜಾಂಬ್ಳಾಂ
ಜಿಬೆರ್ ಟಚ್ಕನ್ ಫುಟ್ಲೆಂ
ಜಾಂಬೂಳ್ ಕಾಳೀಜ್
ಜಾಂಬೂಳ್ ರಗತ್ ಭಳ್‌ಭಳ್
ರಸ್ ರಂಗ್ ರುಚಿ ಮೇಳ್
ಜಾಂಬೂಳ್ ಹಾಶ್ಯಾಚೊ ಉಫಾಳ್
ಜಾಂಬೂಳ್ ಖೊಶ್ಯೆಚೊ ವೇಳ್
ಫಳಾಂ ಹೋಳಿ ಜಾಂಬೂಳ್ ಖೆಳ್
ಜಾಂಬೂಳ್ ನಶಾ ಝಳ್‍ಝಳ್
ಜಮೀನ್ ಜಮ್ಖಣ್ ಜಾಂಬೂಳ್
ವಯ್ರ್ ಜಾಂಬೂಳ್ ಆಭಾಳ್
ಜೀಬ್ ಜಾಂಬ್ಳಿ ಜಾಂಬ್ಳಿ
ಜಾಂಬ್ಳಿ ಘಾಗ್ರೊ ಚೊಳಿ
ಜೀವ್ ಜಾಂಬೂಳ್ ಗೊಂಧಳ್
ಜಾಂಬ್ಳಿ ಜವಾನಿ ಚಾಹೂಲ್
ಅಶಿ ರಂಗೀ ಜಾಂಬೂಳ್ ಹೋಳಿ
ಧುಂದಿ ಚಡ್ಲಿ ಜಾಂಬ್ಳಿ
ಉಮಾಳ್ಯಾ ಹುನಾಳಿ
ಜಾಂಬ್ಳಿ ಜಾಂಬ್ಳಿ
-ಆನಿ
ಆತಾಂ ಖಾಯ್ತ್ ಆಸಾಂ
ಪ್ಯಾಕಿಟಿಂತ್ಲಿಂ ಜಾಂಬ್ಳಾಂ
ಝಗ್ಝಗೀತ್ ಕಾಳಿಂ-ನಿಳಿಂ ಜಾಂಬ್ಳಾಂ
ಕೊಣೆಂ ಪುಂಜಾಯಿಲ್ಲಿಂ?
ನಾ ರುಚಿ, ನಾ ರಸ್, ನಾ ಸತ್ವ್
-ಇಂದು ಗೇರಸಪ್ಪೆ
संपादकीय:
जांबळांच्या माटवांत जांबूळ उत्सव
एका तेंपार जांबळां खावन आमी जांबळी जाताल्यांव. कसली एक मझा! ह्या एका फळान आमचे जिबेक दिल्ली रूच इतली तितली न्हय. आज एकानेक हीं जांबळां खंय गेल्यांत? आज सूपर मारकेटिच्या कौंटरार मोलाक घेजाय जाल्ली परिस्थिती! हीं जांबळां फुंक्याक मेळताना कितली एक रूच आसल्ली, ती आतां कित्याक ना?
हीं आनी जायतीं हेर सवालां हे कविते मारिफात बाय इंदू गेरसप्पेन हांगासर केल्यांत. तशें करताना जांबळांच्या उत्सवाचें बरपूर चित्रण तिणें केलां.
-मेल्विन रोड्रीगस
कविता:
जांबळां
जांबळां
झगझगीत काळीं निळीं जांबळां
शॉपिंग सेंटराचे कौंटरीर
प्लास्टीक पेटयेंत पॅकबंध
अडेचीं झगझगीत जांबळां
आनीक मन वर्सां हुपून पावलें
घाटावयले आतेले घरा
पोर्सांतल्या जांबळी पोंदा
मनयत जांबूळ-सुवाळो
वयर तापलां वैशाख वोत
दाट पाचव्या पानांत
जांबूळ जांबूळ धन
हुनाळ्या रजेंत
भुरग्यांलो मांकडा हिंड
घाली घुरी जांबळा झाडार
खांद्यो हालयी वयर
सकयल जांबळां शिंवर
एकेक जांबूळ येदेदे
वोत वाऱ्याक पिकिल्लें
लुटी रसरशीत जांबळां
जिबेर टचकन फुटलें
जांबूळ काळीज
जांबूळ रगत भळभळ
रस रंग रुची मेळ
जांबूळ हाश्याचो उफाळ
जांबूळ खोशयेचो वेळ
फळां होळी जांबूळ खेळ
जांबूळ नशा झळझळ
जमीन जमखण जांबूळ
वयर जांबूळ आभाळ
जीब जांबळी जांबळी
जांबळी घागरो चोळी
जीव जांबूळ गोंधळ
जांबळी जवानी चाहूल
अशी रंगी जांबूळ होळी
धुंदी चडली जांबळी
उमाळ्या हुनाळी
जांबळी जांबळी
-आनी
आतां खायत आसां
पॅकिटिंतलीं जांबळां
झगझगीत काळीं-निळीं जांबळां
कोणें पुंजायिल्लीं?
ना रुची, ना रस, ना सत्व
-इंदू गेरसप्पे