ಸಂಪಾದಕೀಯ್:
ಅಪಾರ್ ಅನ್ಭೋಗಾಂತ್ಲೆ ಫಾತರ್, ಥಿಕಾಂ ಜಾತಾನಾ.
ಜಿವಿತಾಚೆರ್ ಥೊಡಿಂ ಚುಟ್ಕುಲಾಂ ಉರ್ಬಾನ್ ಡಿಸೋಜಾನ್ ಬರಯಿಲ್ಲಿಂ ಹಾಂಗಾಸರ್ ದಿಲ್ಯಾಂತ್. ಕವಿನ್ ಆಪ್ಲ್ಯಾ ಜಿವಿತಾಂತ್ ಅಪಾರ್ ಅನ್ಭೋಗ್ ಆಪ್ಣಾಯ್ಲಾ. ಹ್ಯಾ ಅನ್ಭೋಗಾಂತ್ಲೆ ಥೊಡೆ ಫಾತರ್ ಕಾಡುನ್, ಉಜ್ಯಾಂತ್ ಲಾಸುನ್, ಥಿಕಾಂ ಭಾಶೆನ್ ಆಮ್ಕಾಂ ತಾಣೆ ದಿಲ್ಯಾಂತ್.
ಜಿವಿತ್ ಥೊಡೆ ಪಾವ್ಟಿಂ ನಿಜಾಯೆ ಥಾವ್ನ್ ಭಾಯ್ಲೆಂ ಸ್ವಪ್ಣಾಅವಸ್ಥೆಂತ್ಲೆಂ, ಥೊಡೆ ಪಾವ್ಟಿಂ ಕಾಳೊಕಾಚೆಂ, ಕಾಂಯ್ ಥೊಡೆ ಪಾವ್ಟಿಂ ಖಿಣಾ ಖಿಣಾಕ್ ಪಾವ್ಲಾ ಪಾವ್ಲಾಂಕ್ ಬದ್ಲುನ್ ಆಸ್ಚೆಂ, ಥೊಡೆ ಪಾವ್ಟಿಂ ಉದ್ವೇಗಾಚೆಂ, ಆತುರಾಯೆಚೆಂ - ಕಶೆಂ ಆಸ್ತಾ ಮ್ಹಳ್ಳೆವಿಶಿಂ ಹಿಂ ಚುಟ್ಕುಲಾಂ ಸಾಂಗ್ತಾತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಜಿಣ್ಯೆಚೆರ್ ಚುಟ್ಕುಲಾಂ
1.
ಜಾಗಿಚ್ ರಾವುನ್ ಜಿಯೆಂವ್ಚಿ ಮಾತ್ ನ್ಹಯ್,
ಸಪ್ಣಾಂಚಿ ಸಯ್ತ್ ವ್ಹಯ್.
ಸಂತೊಸಾಚಿ, ಮೊಗಾಚಿ ಮಾತ್ ನ್ಹಯ್,
ದಾಧೊಸ್ಕಾಯೆಚಿ ಸಯ್ತ್ ವ್ಹಯ್.
2.
ವಾಂಕ್ಡಿ ತಿಂಕ್ಡಿ ಆಶೀರ್ ವಾಟ್
ಮುಟಿಂತ್ ಧರ್‍ಚಿ
ತಕ್ಲೆಂತ್ ಚಿಂತ್ಪಾಚಿ
ಫುಲಾಂಚಿ ನ್ಹಯ್,
ಕಾಂಟ್ಯಾಂಚಿ, ಅಟ್ಟಾಂಗ್ ಕಾಳ್ಕಾಚಿ,
3.
ವ್ಹಾಳ್ಚೆಂ ಉದಕ್
ನಿರಂತರ್ ಬದ್ಲಾವಾಚೆಂ
ಪಾವ್ಸ್, ಹಿಂವ್, ಗಿಮಾಚೆಂ
ರಾವ್ಲ್ಯಾರ್ ಮರ್‍ತಲೊಯ್
ಚಲ್ಲ್ಯಾರ್ ಉರ್‍ತಲೊಯ್.
4.
ಜಿಯೆಂವ್ಚಿ, ಮರ್‍ಚಿ ನ್ಹಯ್
ಮೊಗಾಚಿ, ರಾಗಾಚಿ ನ್ಹಯ್
ಆತುರಾಯೆಚಿ, ಫಿರ್ಕಿಸ್
ಬುಧ್ವ೦ತ್ಕಾಯೆಚಿ ನ್ಹಯ್.
-ಉರ್ಬಾನ್ ಡಿಸೋಜ, ಮೂಡಬಿದ್ರಿ
संपादकीय:
अपार अनभोगांतले फातर, थिकां जाताना.
जिविताचेर थोडीं चुटकुलां उरबान डिसोजान बरयिल्लीं हांगासर दिल्यांत. कवीन आपल्या जिवितांत अपार अनभोग आपणायला. ह्या अनभोगांतले थोडे फातर काडून, उज्यांत लासून, थिकां भाशेन आमकां ताणे दिल्यांत.
जिवित थोडे पावटीं निजाये थावन भायलें स्वपणाअवस्थेंतलें, थोडे पावटीं काळोकाचें, कांय थोडे पावटीं खिणा खिणाक पावला पावलांक बदलून आसचें, थोडे पावटीं उद्वेगाचें, आतुरायेचें - कशें आस्ता म्हळ्ळेविशीं हीं चुटकुलां सांगतात.
-मेल्विन रोड्रीगस
कविता:
जिणयेचेर चुटकुलां
१.
जागीच रावून जियेंवची मात न्हय,
सपणांची सयत व्हय.
संतोसाची, मोगाची मात न्हय,
दाधोसकायेची सयत व्हय.
२.
वांकडी तिंकडी आशीर वाट
मुटींत धरची
तकलेंत चिंतपाची
फुलांची न्हय,
कांट्यांची, अट्टांग काळकाची,
३.
व्हाळचें उदक
निरंतर बदलावाचें
पावस, हिंव, गिमाचें
रावल्यार मरतलोय
चल्ल्यार उर्तलोय.
४.
जियेंवची, मरची न्हय
मोगाची, रागाची न्हय
आतुरायेची, फिरकिस
बुधवंतकायेची न्हय.
-उरबान डिसोजा, मूडबिद्री