ಸಂಪಾದಕೀಯ್:
ಹೆ ಕವಿತೆಂತ್ ಮಾವೆಚಿ ಮೊವ್ಸಾಣ್ ತಶೆಂ ಧಾರಾಳ್ ಪಾಂಕ್!
ಏಕ್ ಸಾದೆಂ, ಹರ್‍ಯೆಕೆ ವೆಕ್ತಿಚ್ಯಾ ಜಿವಿತಾಂತ್ ಏಕ್ ನಾ ಏಕ್ ದೀಸ್ ಯೆವ್ಯೆತ್ ಜಾಲ್ಲೆಂ ಚಿಂತಪ್ ಹಾಂಗಾಸರ್ ಕವಿತೆ ರುಪಾರ್ ವ್ಹಾಳ್ಳಾಂ. ಕಾಂಯ್ ವಿಸಾಂಚ್ಯಾ ಹುಂಬ್ರಾರ್ ಕುಸ್ತ್ಯೊ ಘಾಲ್ತಲ್ಯಾಂಕ್ ಹಿ ಕವಿತಾ ಪೊಟ್ಲುನ್ ಧರ್‍ಚ್ಯಾಂತ್ ನವಲ್ ನಾ. ಹಾಂಗಾಚಿ ವಿಶೇಶತಾ ಕಿತೆಂಕಿ ಮ್ಹಳ್ಯಾರ್ ಹಾಂಗಾಚೊ ಕವಿ ಕಾಂಯ್ ವಿಸಾಂಚೊ ನ್ಹಯ್, ತೊ ಅಸಲ್ಯಾ ವಿಸಾಂಚ್ಯಾ ರೊದಾಂತ್ ತಿನಾಂಚ್ಯಾಕ್‌ಯ್ ಚಡ್ತಿಕ್ ಪಾವ್ಟಿಂ ಘುಂವೊನ್ ಆಯ್ಲಾ.
ತಿತ್ಲೇಂಯ್ ಆಸೊನ್ ಕವಿಚ್ಯಾ ಮೊಗಾಚಿ ಧಾರ್ ಆಜೂನ್ ತರ್‍ನಿ ತರ್‍ನಿ ತರ್‍ನಿಚ್ ಉರ್‍ಲ್ಯಾ - ಪಣ್ಸಾಚೆ ಮಾವೆಬರಿ. ಹಾಂತುಂ ಮೊವ್ಸಾಣ್ ತಶೆಂ ಧಾರಾಳ್ ಪಾಂಕ್! ಮಾಗೀರ್ ಹೆ ಮೊಗಾಚೆ ಘರೆ ಖಾಯ್ಜಾಯ್ ಜಾಲ್ಯಾರ್ ಹ್ಯಾ ಪಾಂಕಾಚಿ ಪರ್‍ವಾ ಆಸನಾ. ಹಾಂಗಾಯ್ ತಶೆಂಚ್ ಜಾಲಾಂ.
ಟೊನಿ ಮೆಂಡೊನ್ಸಾ, ಆಂತೊನಾಮ್ ನಾಂವಾರ್‌ಚ್ ಫಾಮಾದ್. ದುಬಾಯ್ ಶೆರಾಂತ್ ಕೊಂಕಣಿ ಪತ್ರಾಂಚ್ಯಾ ಪ್ರಸಾರಾಖಾತೀರ್ ತಾಣೆ ಕಾಡ್‌ಲ್ಲೆ ಮ್ಹಿನತೆಚೊ ಫಳ್ ಜಾವ್ನ್ ಆಜ್ ಕೊಂಕಣಿ ನೀಟ್ ಉಬಿ ರಾವ್ಲ್ಯಾ. ತಾಚ್ಯಾ ಮಾತ್ಯಾರ್ ಕೊಂಕಣಿ ಆವಯ್ಚ್ಯಾ ಬೆಸಾಂವಾಂಚೊ ದಾಳೊಚ್ ಆಸಾ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ರೆಸ್ಪೆರಾ ಮಿಲನ್
ಖಂಯ್ಸರ್ ಲಿಪ್ಲಾಂಯ್ ಗೊಂಡ್ಯಾ, ಅಂಧ್ಕಾರ್ ಸಾಗೊರಾಂತ್?
ಸೊಧ್ತಾಂ ಹಾಂವ್ ಎಕ್ಸುರೊ ತುಂ ದಿಸನಾಂಯ್ ಸಂಸಾರಾಂತ್
ತಾರಾಂ-ಲ್ಹಾರಾಂ ಹಾಸೊನ್ ಖೆಳೊನ್ ನಾಚ್ತಾತ್ ಪರ್‍ಯಾಂತ್
ನಿಯಾಳ್ನ್ ತುಕಾ ಹಾಂವ್ ಉಪ್ಯೆತಾಂ, ವಿಶಾಲ್ ಮೊಗಾ-ದರ್ಯಾಂತ್
ಮೊಗಾ, ತುಂ ಮ್ಹಜೆ ಕುಡಿಚೊ ಉಸ್ವಾಸ್
"ಜೀವನ್ ಫುಡಾರ್" ದಿವ್ಯಾಚೊ ಪ್ರಕಾಸ್
ಕುಂವರ್ ತುಂ, ಘೆ ಮ್ಹಾಕಾ ಸವ್ಕಾಸ್
ಕುಂವರ್‍ನ್ ಮ್ಹಣ್ ತುಂ ಕಾಣ್ಘೆ ಮ್ಹಜೆಂ ಸರ್ವಸ್ವ್
ಕರ್‍ಗತಾಂ ಹಾಂವ್ ಚಿಂತುನ್ ತುಜಿ ಸೊಭಾಯ್
ಖುಂಟುಂಕ್ ಮೆಳ್ಳಿನಾ ಮ್ಹಣ್ ಫುಲಾಚಿ ಕೊಬಾಯ್
ಸತ್ ಬುಡ್ತಾ ನ್ಹಯ್‌ಗೀ ಭೊಗ್ಲ್ಯಾರ್ ಪಾತ್ಕಿ ವಿರಾರಾಯ್?
ಘಾತ್ಕಿ ಹಾಂವ್ ಆಟಯ್ತಾಂ ಮ್ಹಜಿ ಪಿಸಾಯ್
ಕಾಳೊಕಾ ಪಾಟ್ಲ್ಯಾನ್ ಪ್ರಕಾಸ್ ಫಾಂಕ್ತಾ
ರಡ್ಣ್ಯಾ ಪಾಟ್ಲ್ಯಾನ್ ಹಾಸೊ ವ್ಹಾಳ್ತಾ
ಮೊಗಾ, ಆಮ್ಚ್ಯಾ ಪ್ರೇಮಾಕ್ ಜೊ ಕೋಣ್ ಆಡ್ ವೆತಾ
ತೊ ಆಪ್ಲೆಂ ಕಾಳೀಜ್ ಗಲೀಜ್ ಕರ್‍ತಾ!
ನಾಕಾ ರಜಾರ್ ಜಾಯ್ನಾಕಾ ಬೆಜಾರ್, ಜಾವ್ಯಾಂ ಆಮಿ ಲಗನ್
ಪೆಟವ್ನ್ ವಾತ್, ಗಾವ್ನ್ ಗೀತ್ ಚಂದ್ರೆಮ್ ಚಡ್ತಾ ಗಗನ್
ಕಿತೇಂಯ್ ಸಾಂಗೊಂದಿ ಎಕ್ವೊಟ್ ಬಾಳ್ವೊಂದಿ ತುಂ ಮ್ಹಜೆಂ ದುಲ್ಹನ್
ಧೈರಾನ್ ಶೂರ್ ಪ್ರೇಮಾನ್ ವೀರ್ - ಹಾಂವ್ ಆಶೆತಾಂ ರೆಸ್ಪೆರಾ ಮಿಲನ್!
-ಟೊನಿ ಮೆಂಡೊನ್ಸಾ, ನಿಡ್ಡೋಡಿ (ದುಬಾಯ್)