ಸಂಪಾದಕೀಯ್:
ಸಂತೊಸಾಚೊ ಕುಸ್ವಾರ್ ವಾಂಟ್ಚಿ ಆಪುರ್ಬಾಯೆಚಿ ಕವಿತಾ
ಪಯ್ಲ್ಯಾನ್ ಪಯ್ಲೆಂ ಸಮೇಸ್ತ್ ಕವಿಂಕ್ ತಶೆಂ ಕವಿತಾ ಮೋಗಿಂಕ್ ಭಾಗಿ ನತಾಲಾಂಚೆಂ ಫೆಸ್ತ್ ಆಮಿ ಮಾಗ್ತಾಂವ್. ನತಾಲಾಂಚ್ಯಾ ಕಾಳಾಕ್ ಹಾಚ್ಯಾಕಿ ವ್ಹರ್‍ತಿ ಏಕ್ ಕವಿತಾ ದೀಂವ್ಕ್ ಆಮ್ಚೆಲಾಗಿಂ ನಾ. ಕವಿಂಕ್ ಆಸಜೆ ಜಾಲ್ಲ್ಯಾ ಸ್ವಾತಂತ್ರ್ಯಾಚೊ ಹೆ ಕವಿತೆಂತ್ ಕವಿನ್ ದಾಧೋಶಿ ವಾಪರ್ ಕೆಲಾ. ನತಾಲಾಂಚ್ಯಾ ನಿಬಾನ್ ಭುಗ್ಯಾಚಿ ಭುಕ್, ಸ್ತ್ರೀಯೆಚಿ ಲಜ್, ಆತಾಂಚೆ ಸಮಾಜೆಚಿ ಕಾಲೆತಿ ಆನಿ ಏಕ್ ಆಪುರ್ಬಾಯೆಚೊ ಸಂದೇಶ್ ಘೆವ್ನ್ ಹಿ ಕವಿತಾ ಆಮ್ಕಾಂ ವೆಡ್ಕೊಳ್ ಮಾರ್‍ನ್ ರಾವ್ತಾ.
ಓಸ್ಟಿನ್ ಪ್ರಭು ದುಸ್ರೆ ಪಾವ್ಟಿಂ ಕವಿತಾಕುಳಾರ್ ಸಜಂವ್ಕ್ ಆಯ್ಲಾ. ಕೊಂಕಣಿಚೆಂ ಗಂಧ್ ವಾರೆಂ ಅಸ್ಕತ್ ವ್ಹಾಳ್ಚ್ಯಾ ಗಾಂವಾಂತ್ ಆಸ್ಲ್ಯಾರಿ, ಕೊಂಕಣಿ ಉತ್ರಾಂಚೊ ಖೆಳ್ ತಾಕಾ ಸಲೀಸ್ ಕಸೊ ಹೆ ಕವಿತೆಂತ್ ಝಳ್ಕತಾ. ಕವಿತಾ ಸಾದಿ ಸೊಂಪಿ ಜಾವ್ಯೆತಾ, ತರಿಪುಣ್ ತೆ ಕವಿತೆಂತ್ ಕಾಳ್ಜಾಂ ಆಪಡ್ಚಿ ಕಲಾ ಆಟಾಪುನ್ ಆಸಜೆ ಪಡ್ತಾ. ಆನಿ ತಸಲಿ ಏಕ್ ಕಲಾ, ಮ್ಹಾಕಾ ಹೆ ಕವಿತೆಂತ್ ಝಳ್ಕತಾ.
ಓಸ್ಟಿನಾಚ್ಯಾ ಬರ್ಪಾಚೊ ಆದ್ಲೊ ತೊ ವ್ಹಾಳೊ, ಹೆ ಕವಿತೆ ದ್ವಾರಿಂ ತ್ಯಾ ಆದ್ಲ್ಯಾಚ್ ಜೋಶಾಕ್ ಪಾವ್ಲಾ ಮ್ಹಣ್ ಹಾಂವೆಂ ಸಾಂಗ್ಲೆಂ ತರ್ ತುಮಿ ಕೋಣ್‌ಯ್ ನಾ ಮ್ಹಣಶೆನಾಂತ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸರ್ಗಾ ಪ್ರಕಾಸ್ ಸಂಸಾರಾರ್
ಸರ್ಗಾ ಪ್ರಕಾಶ್ ಸಂಸಾರಾರ್ ಆಜ್ ಉಜ್ವಾಡ್ಲಾ
ಶಿಮ್ಟಿ ನೆಕೆತ್ರ್ ಆಕಾಶಾರ್ ಉದೆವ್ನ್ ಪ್ರಕಾಸ್ಲಾಂ
ಸರ್ಗಿಂ ಆಂಜಾ ಜಮೊ ಹೆಣೆಂ ಗಾಯ್ತಾತ್ ಗಾಣಾಂ
ವೊಡುಂಕ್ ಲಾಗ್ಲಿಂ ದುಬ್ಳ್ಯಾ ಗೊವ್ಳ್ಯಾಂಚಿಂ ಮನಾಂ
ಬಾವ್ಡೆ ಗೊವ್ಳಿ ಧಾಂವೊಂಕ್ ಲಾಗ್ಲೆ ರಾನಾ ಮದ್ಲ್ಯಾನ್
ಸೊಧುಂಕ್ ಲಾಗ್ಲೆ ಖಂಯ್ಸರ್ ಆಸಾ ಬಾಳ್ಕಾಚೆಂ ಜನನ್
ಶೆವ್ಟಿಂ ಪಾವ್ಲೆ ಸರ್‍ವ್ ತೆ ಗರ್ದನಾಚ್ಯಾ ಗೊಟ್ಯಾಂತ್
ಸೊಭಿತ್ ಸುಂದರ್ ಬಾಳ್ ಆಸ್ಲೊ ತ್ಯಾ ಮಾಟ್ಯಾಂತ್
ಧಾ-ಬಾರಾ ದಾದ್ಲ್ಯಾಂಕ್ ಪಳೆವ್ನ್ ಮರಿ ಲಜೆಲಾಗ್ಲಿ
ಪಾಲಂವ್ ಆಪ್ಲ್ಯಾ ಮಾತ್ಯಾರ್ ವೊಡುನ್ ತಕ್ಲಿ ಬಾಗಾಯ್ಲಿ
ಉಸ್ಕ್ಯಾರ್ ತಿಚ್ಯಾ ಆಸ್ಲೆಂ ಬಾಳ್ ರಡ್ತಾ ಹುಂಗೇಂ ಕರುನ್
ಭುಕ್ ಲಾಗ್ಲ್ಯಾ ಮಾಂಯ್-ಗೆ ಮ್ಹಾಕಾ ದೀ ತೆಂ ಪೀವನ್
ಇತ್ಲ್ಯಾ ದಾದ್ಲ್ಯಾಂ ಮುಕಾರ್ ಮ್ಹಾಕಾ ಮಾತ್ಶಿ ಲಜ್ ದಿಸ್ತಾ
ರಾವ್-ರೆ ಬಾಳಾ ವೊಗೊ, ಗೊವ್ಳ್ಯಾಂಕ್ ವಚೊಂ ಸಾಂಗ್ತಾಂ
ಗೊಟ್ಯಾ ದಾರ್ ಧಾಂಪುನ್ ಜುಜೆ ಗೊವ್ಳ್ಯಾಂಕ್ ಮೆಳ್ತಾ
ಜೆಜು ಕಸೊ ಜಲ್ಮಲೊ ತೆಂ ತಾಂಕಾಂ ಸುಢಾಳ್ ಸಾಂಗ್ತಾ
ಇಲ್ಲ್ಯಾ ವೆಳಾನ್ ಆಯ್ಲಿ ಮರಿ ಬಾಳಾಕ್ ಆಪ್ಲ್ಯಾ ಧರುನ್
ನಿದಾಯ್ಲಾಗ್ಲಿ ಖಾವ್ಣೆರ್ ಜೆಜುಕ್ ಬರೆಂ ಕರುನ್ ಗುಟ್ಲಾವ್ನ್
ಜೆಜು ಆಬ್ಳೆ ಗೊವ್ಳ್ಯಾಂಕ್ ಪಳೆವ್ನ್ ಆಂಬೊರ್‌ಪಿಕೊ ಹಾಸ್ತಾ
ಮಾತಾ ಮರಿ ತಾಂಕಾಂ ಪಳೆವ್ನ್ ಲಜೆ ಕಾಂಟಿಚ್ ಜಾತಾ
ದುಸ್ರ್ಯಾ ದಿಸಾ ಗೊವ್ಳಿ ಥೊಡೆ ಜೆವಣ್ ತಾಂಕಾಂ ಹಾಡ್ತಾತ್
ಎಕಾಮೆಕಾ ಸಾಂಗಾತಾ ಬಸೊನ್ ಕಾಣ್ಯೊ ಸಾಂಗೊನ್ ಜೆವ್ತಾತ್
ದಿಸಾಕ್ ಆಬ್ಳೆ ಗೊವ್ಳ್ಯಾಂ ಬಾಯ್ಲೊ ತಾಂಕಾಂ ಭೆಟ್ ದಿತಾತ್
ಭುರ್ಗ್ಯಾಂಕ್ ಸಂಗಿಂ ಹಾಡುನ್, ಬಾಳ್ಕಾಕ್ ದಾಕಯ್ತಾತ್
ಕಿತೆಂ ಆವಾಜ್, ಕಿತೆಂ ಗೊವ್ಜಿ ಸಗ್ಳ್ಯಾ ಹ್ಯಾ ನಜರೆನಾಂತ್
ಜಲ್ಮಲಾ ಮ್ಹಣ್ ಜೆಜು ಬಾಳೊಕ್ ಹ್ಯಾ ಸಂಸಾರಾಂತ್
ಗೊವ್ಳಿ ಥೊಡೆ ತುಂರ್ಬೆಂತ್ ವ್ಹಾಜವ್ನ್ ಜೆಜುಕ್ ಆರಾಧಿತಾತ್
ಕಿತ್ಲೊ ಸೊಭಿತ್ ಆನಿ ಸುಂದರ್ ಬಾಯ್ಲೊ ವರ್ಣುನ್ ರಾವ್ತಾತ್
ಜೆಜು ಜಲ್ಮಲ್ಲಿ ಖಬರ್ ಆತಾಂ ಮುಡ್ಲಾ ದೇಶಾಂಕ್ ಪಾವ್ತಾ
ಥಂಯ್ಚೆ ತೇಗ್ ರಾಯ್ ಬಾಳ್ಕಾಕ್, ನಮಾನ್ ಕರುಂಕ್ ಯೆತಾತ್
ಭಾಂಗರ್, ಮೀರ್ ಆನಿ ಧುಂಪ್ ತೆಗಾಂ ರಾಯಾಂಚಿ ಕಾಣಿಕ್
ಪಳೆಂವ್ಕ್ ಬಸೊನ್ ಯೆತಾತ್ ಕರ್‍ಯಾರ್, ಬಾಳ್ ಜೆಜು ಮಾಣಿಕ್
ಶಿಮ್ಟಿ ನೆಕೆತ್ರ್ ದಾಕಯ್ತಾ ವಾಟ್ ತಾಂಕಾಂ ಬಾಳ್ಕಾಕ್ ಮೆಳೊಂಕ್
ಹೆರೊದ್ ರಾಯಾಕ್ ಕಳಯ್ನಾಸ್ತಾಂ ದುಸ್ರೆಚ್ ವಾಟೆನ್ ಚಲೊಂಕ್
ತೆಗಾಂ ರಾಯಾಂಕ್ ಪಳೆವ್ನ್ ಜುಜೆ-ಮರಿ ಆಜ್ಜಾಪ್ ಜಾತಾತ್
ನಮಾನ್ ತುಕಾ, ನಮಾನ್ ಮ್ಹಣೊನ್ ರಾಯ್ ಪಾಟಿಂ ವೆತಾತ್
ಸಗ್ಳ್ಯಾ ಸಂಸಾರಾರ್ ಭರ್‍ಲಾ ಸಂತೊಸ್ ಹ್ಯಾ ಭಾಗಿ ನತಾಲ್ ವೆಳಾ
ಕಿತೆಂ ಉರ್ಭಾ, ಕಿತೆಂ ಶೃಂಗಾರ್ ಹರ್‍ಯೆಕಾ ಕ್ರಿಸ್ತಾಂವ್ ಘರಾ
ನೆಕೆತ್ರಾಂನಿ, ವೀಜ್ ದಿವ್ಯಾಂನಿ ಘರಾಂ ಪರ್ಜಳೊಂಕ್ ಲಾಗ್ಲ್ಯಾಂತ್
ಸಾಂತಾಕ್ಲೊಸ್ ಕಾಣಿಕ್ ಹಾಡ್ತಾ, ಭುರ್ಗಿಂ ರಾಕೊನ್ ರಾವ್ಲ್ಯಾಂತ್
ಕೋಣ್ ಪೇಂಯ್ಟ್ ಕಾಡುನ್ ಕರ್‍ತಾತ್ ಘರ್ ಆಪ್ಲೆಂ ನಿರ್ಮಳ್
ಮಧ್ಯಾನೆಚ್ಯಾ ಮಿಸಾಕ್ ವೆತಾನಾ ಬಾಯ್ಲಾಂಚೊ ಕಿತೆಂ ಪರ್ಮಳ್
ಚಲೆ ಚಲಿಯಾಂಕ್ ಪಳೆವ್ನ್ ರಾವ್ತಾತ್ ಬೃಹತ್ ದೊಳ್ಯಾಂ ಸೊರ್ಮುಳ್
ಘರಾ ಯೆವುನ್ ಮಾರ್‍ತಾತ್ ಥೊಡಿಂ ಪಾವ್ಸ್ ಆನಿ ಗರ್ನಾಳ್
ಥೊಡ್ಯಾಂಕ್ ನತಾಲ್ ಫೆಸ್ತ್ ಮ್ಹಳ್ಯಾರ್ ಕುಸ್ವಾರಾಚಿ ರಾಸ್
ಕೊಣಾಯ್ಚ್ಯಾ ಘರಾ ಭೆಟ್ ದಿಲ್ಯಾರ್ ಲಾಡ್ವಾಂ ನೆವ್ರ್ಯಾಂಚೊ ವಾಸ್
ಮೀಸ್ ಜಾತಚ್ ಘರಾ ಯೆವುನ್ ಪಿಯೆವ್ನ್ ದಾದ್ಲ್ಯಾಂ ನಾಚ್
ಸಾಂಗ್ಲ್ಯಾರಿ ತೆ ಆಯ್ಕನಾಂತ್, ಗಳ್ತಾ ಥೊಡ್ಯಾಂಚೊ ಕಾಚ್
ನತಾಲ್ ಫೆಸ್ತ್ ಹಾಡ್ತಾ ಶಾಂತಿ ಸಮಾಧಾನ್ ಆಖ್ಖೆ ಪೃಥ್ವೆರ್
ಸಭಾರ್ ದುರ್ಬಳಿಂ ಭರೊನ್ ಆಸಾತ್ ಹ್ಯಾ ಆಮ್ಚೆ ಧರ್ತೆರ್
ಆಮ್ಚ್ಯಾ ಭುರ್ಗ್ಯಾಂಕ್ ಕಾಣಿಕ್ ಹಾಡ್ತಾನಾ ತಾಂಚೊ ಉಡಾಸ್ ಕರ್‍ಯಾಂ
ಭುರ್ಗ್ಯಾಂಕ್ ಕಾಣಿಕ್, ವ್ಹಡಾಂಕ್ ಜೆವಣ್ ವಾಂಟುಂಕ್ ಆಮಿ ಪಾವ್ಯಾಂ
-ಓಸ್ಟಿನ್ ಪ್ರಭು, ಚಿಕಾಗೊ