ಸಂಪಾದಕೀಯ್:
'ಕವಿತಾ ಕುಳಾರ್' ಕೊಂಕಣಿ ಅಸ್ಮಿತಾಯೆಚಿ ಏಕ್ ಕುರು!
ಆಮಿ ಚಿಂತಾಂವ್ ಏಕ್, ಪುಣ್ ಘಡ್ತಾ ಆನ್ಯೇಕ್‌ಚ್. ಪುಣ್ ಘಡ್‌ಲ್ಲೆಂ ತೆಂ ಗಿಳುಂಕ್ ಜಾಯ್ನಾತ್‌ಲ್ಲಿ ಉಂಡಿ ಜಾಲ್ಲ್ಯಾವೆಳಾರ್! ತಸಲೆಂಚ್ ಏಕ್ ಘಡಿತ್ ಹೆ ಕವಿತೆಂತ್ ಘಡ್ಲಾಂ. ಬೋವ್ ಸಾದಿ ಕವಿತಾ ತರೀ, ವಾಚುನ್ ಸಂಪಯ್ತಾನಾ ಕವಿತೆಚ್ಯಾ ಅಂತ್ಯಾಕ್ ಲಾಗೊನ್ ಕವಿಚೊ ಮೋಗ್ ಉಬ್ಜೊಂಚ್ಯಾಂತ್ ನವಲ್ ನಾ. ಹಾಂಗಾಸರ್ ಏಕ್ ಕಾಣಿ ಆಸಾ. ದೆಕುನ್ ಹಿ ಕವಿತಾ 'ಕಾಣಿ-ಕವಿತಾ' ವರ್ಗಾಚಿ.
ಫ್ರಾನ್ಸಿಸ್ ಪಿರೇರಾ ಇಂಗ್ಲೆಂಡಾಂತ್ ಆಸೊನ್‌ಯ್ ಕೊಂಕಣಿಚ್ಯಾ ವಾವ್ರಾಂತ್ ಆಪ್ಣಾಕ್‌ಚ್ ಸಮರ್ಪಿಲ್ಲೊ ಮನೀಸ್. ಪರ್ದೆಶಾಂನಿ ಆಸ್ಚೊ ಜಾಯ್ತೊ ಲೋಕ್ ವೆವೆಗ್ಳ್ಯಾ ಸಂಗ್ತಿಂ ಮಾರಿಫಾತ್ ಕೊಂಕಣಿಚಿ ಆಪ್ಲಿ ಅಸ್ಮಿತಾಯ್ ರಾಕೊನ್ ವ್ಹರ್‍ಚೆಂ ಮಹತ್ವಾಚೆಂ ಕಾಮ್ ಕರೀತ್ ಆಸಾತ್. ಫ್ರಾನ್ಸಿಸ್ ಕವಿತಾ ಬರವ್ನ್ ತೆಂ ಕರುನ್ ಆಸಾ ಆನಿ ತಾಂತುಂ ಆಪ್ಣಾಚೆಂ ಆಪ್ಲೆಂಪಣ್ ಸಾಂಬಾಳುನ್ ಆಸಾ. ಹಿ ಗಜಾಲ್ ಆಮ್ಕಾಂ ದಾಧೊಸ್ಕಾಯೆಚಿ.
ಯುರೊಪಾಂತ್ ಶಿಂಪಡ್ಲಲ್ಯಾ ಕೊಂಕಣಿ ಲೊಕಾನ್ 'ಕವಿತಾ ಕುಳಾರಾ' ತೆವ್ಶಿಂ ಕೆದಳಾ ಗಂಭೀರಾಯೆನ್ ದೀಷ್ಟ್ ಚರಯ್ಲಿ, ತವಳ್ ತಾಂಕಾಂ ಥೊಡ್ಯಾಂಕ್ ತರೀ ತಾಂಚಿ ಅಸ್ಮಿತಾಯ್ ಸಾಂಬಾಳ್ಚ್ಯಾಕ್ ಗರ್ಜೆಚಿ ಸುವಾತ್ ಲಾಬ್ತಲಿ ಮ್ಹಳ್ಳೆಂ ಖಂಡಿತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಹಜಾರ್ ಚಿಂತ್ನಾಂ ಮತಿಂತ್!
ಹಜಾರ್ ಚಿಂತ್ನಾಂ ಮತಿಂತ್ ಆಟವ್ನ್
ಚಲ್ತಾಲೊಂ ವಾಟೆರ್ ದರ್ವಡಾನ್
ವೊಳಕ್ ಜಾಲಿ ಚಲಿಯೆಚಿ ಮ್ಹಾಕಾ
ಅವ್ಚಿತ್ ಘಡ್ಲಲ್ಯಾ ಅವ್ಘಡಾನ್
ಎಕಾಮೆಕಾ ಆದಾಳ್ಳ್ಯಾಂವ್ ಆಮಿ
ಪಡ್ಲ್ಯಾಂವ್ ಸಕ್ಲಾ ಎಕಾಚ್‌ಫಾರಾನ್
ಹಾಂವ್ ಸಕಯ್ಲ್, ತೆಂ ಮ್ಹಜೆ ವಯ್ರ್
ಪಡಶೆಂ ಕೆಲ್ಲೆಂ ಆಮ್ಚ್ಯಾ ಆಮ್ಸೊರಾನ್
ಲಜೆನ್ ಚೆಡುಂ ಘಡ್ಯೆನ್ ಉಟೊನ್
ಉಬೆಂ ರಾವ್ಲೆಂ ವಯ್ರ್
ಪಾಟಾಪಾಟ್ ಹಾಂವ್‌ಯ್ ರಾವ್ಲೊಂ
ಪುಸ್ಲೊ ದೊಗಾಂಯ್ನಿ ವಸ್ತ್ರಾಚೊ ಕೋಯ್ರ್
ಉಪ್ರಾಂತ್ ಕರುನ್ ಘಟ್ ಮನ್
ಎಕ್ಟಾವ್ನ್ ಥೊಡೆಂ ಧೈರ್
ಮ್ಹಳೆಂ ಆಮಿ ಎಕಾಮೆಕಾ 'ಸೊರ್ರಿ'
ಸುಟ್ಲ್ಯಾಂವ್ ಥಂಯ್ ಥಾವ್ನ್ ಭಾಯ್ರ್
ಎಕಾಚ್ ಬಸ್ಸಾರ್ ಚಡ್ಲ್ಯಾಂವ್ ಆಮಿ
ಮುಕ್ಲೆಂ ಪಯ್ಣ್ ಕರುಂಕ್
ಪರ್‍ತ್ಯಾನ್ ಆವ್ಕಾಸ್ ಲಾಭ್ಲೊ
ಸಿಟಿಚೆರ್ ಸಾಂಗಾತಾ ಬಸೊಂಕ್
ಪಾದ್ದೆವ್ನ್ ಸುರು ಕೆಲೆಂ ಹಾಂವೆಂ
ತಾಚೆಲಾಗಿಂ ಉಲಂವ್ಕ್
ವಿಸ್ರಾಲೊಂ ನಾ ತಾಚೊ ಫೊನ್ ನಂಬರ್
ಆನಿ ವಿಳಾಸ್ ಮಾಗೊನ್ ಕಾಣ್ಘೆಂವ್ಕ್
ಆಯ್ಲಿ ಮ್ಹಜಿ ಸರ್ತಿ ಆತಾಂ
ಬಸ್ಸಾರ್ ಥಾವ್ನ್ ದೆಂವೊಂಕ್
ವೇಳ್‌ಯ್ ಜಾಲ್ಲೊ ಕಳೊಂಕ್ನಾ ಮ್ಹಾಕಾ
ಒಫಿಸಾಕ್ ಮ್ಹಜ್ಯಾ ವಚೊಂಕ್
ದೆಂವ್ಚ್ಯಾಫುಡೆಂ ಆಪಯ್ಲಾಗ್ಲೆಂ ತೆಂ
ತಾಚ್ಯಾ 'ಘರಾ ಯೇ ಏಕ್ ದೀಸ್ ಮೆಳೊಂಕ್'
ಹಾಂವ್ ದೆಂವ್ಲೊಂ, ಬಸ್ಸ್ ಸುಟ್ಲೆಂ
ಚುಕ್ಲೆಂನಾ ತೆಂ ವೆಗ್ಳಾಚಾರಾಚಿ ದೀಷ್ಟ್ ಖಂಚಂವ್ಕ್
ಸುರು ಜಾಲ್ಲೊ ದೀಸ್ ಮ್ಹಜೊ
ಆದಾಳ್ನ್ ಮಾರ್ಗಾರ್ ಪಡೊನ್
ಪೆಂಕ್ಟಾಕ್ ಜಾಲ್ಲೊ ಮಾರ್ ತರೀ
ಮನಾಂತ್ ಶಾಂತಿ ಮೆಳೊನ್
ಥೊಡ್ಯಾಚ್ ದಿಸಾಂನಿ ಪಾವ್ಲೊಂ ತಾಂಗೆರ್
ದಿಲ್ಲೊ ವಿಳಾಸ್ ಘೆವುನ್
ಟಿಪ್‌ಟೊಪ್ ನ್ಹೆಸೊನ್ ದೊಳ್ಯಾಂಕ್ ಚಸ್ಮಾ
ಪರ್ಮಳಿಕ್ ಸೆಂಟ್ ಮಾರುನ್
ಆಯ್ಲೊ ಬಾಪಯ್ ಭಾಯ್ರ್ ತಾಚೊ
ವೊಳಕ್ ಮ್ಹಜಿ ತೊಚ್ ಸಾಂಗಲಾಗ್ಲೊ
'ತುಜೊ ಬಾಪಯ್ ಆನಿ ಹಾಂವ್ ದೊಗೀ
ಖಾಶಾ ಭಾಭಾವ್‌ರೆ' ಮ್ಹಣಲಾಗ್ಲೊ
'ತುಜ್ಯಾ ಜಲ್ಮಾಫುಡೆಂ ಆಸ್ತಿ ಝಗ್ಡ್ಯಾಕ್
ಆಮ್ಚ್ಯಾ ಮಧೆಂ ವೆಗ್ಳಾಚಾರ್ ಜಾಲ್ಲೊ'
ಖಿಣಾನ್ ಗುಟ್ ಕಳ್ಳೊ ಮ್ಹಾಕಾ
"ಹಾಂವ್ ಮ್ಹಜೆ ಭಯ್ಣಿಕ್ ಮೆಳೊಂಕ್ ಆಯಿಲ್ಲೊಂ"
- ಫ್ರಾನ್ಸಿಸ್ ಪಿರೇರಾ, ಯು.ಕೆ.