ಸಂಪಾದಕೀಯ್:
ವೇಳ್ ಸಾಂಗಾತಿ ಯಾ ಸ್ಪರ್ಧಿ?
ಆಯ್ಚ್ಯಾ ಪಂತಾಟಾಚ್ಯಾ ಸಂಸಾರಾಂತ್ ಮನೀಸ್ ಜೀವ್ ಸೊಡ್ನ್ ಧಾಂವುನ್ ಆಸಾ. ವೇಳ್ ನಾ. ಫುರ್‍ಸತ್ ನಾ. ಸೊಸ್ಣಿಕಾಯ್ ಭಿಲ್ಕುಲ್ ನಾ. ಮುಖಾರ್ ಮರಣ್ ರಾಕುನ್ ಆಸ್ಲ್ಯಾರೀ ಧಾಂವ್ಚ್ಯಾ ಪಿಶೆಪಣಾನ್ ಮನೀಸ್ ಧಾಂವ್ತಾ, ಧಾಂವ್ತಾನಾ ಥೊಡೆಪಾವ್ಟಿಂ ಮನ್ಶಾಪಣಯ್ ಗುಡ್ಡಾವ್ನ್ ಧಾಂವ್ತಾ ಆನಿ ಉಪ್ರಾಂತ್ ಹಾಂಡ್ತಾ, ಪಡ್ತಾ ಆನಿ ಉಸಳ್ತಾ. ಅವ್ಚಿತ್ ಘುಂವ್ಡೆಂನಿ ಮನ್ಶಾಕ್ ಧರ್ಣಿಕ್ ಶೆವ್ಟಾಯ್ತಾನಾ ವೆಳಾಸಂಗಿಂ ಹೊ ಪಂತಾಟ್ ಗರ್ಜೆಚೊಗಿ ಮ್ಹಳ್ಳ್ಯಾ ಸವಾಲಾಕ್ ಕವಿ ಆಪ್ಲ್ಯಾಚ್ ಅನ್ಭೊಗಾಚಿ ಜಾಪ್ ದೀಂವ್ಕ್ ಪೆಚಾಡ್ತಾ.
ವೇಳ್ ಆಸ್ಚೊ ಜಿಯೆಂವ್ಕ್. ಹ್ಯಾ ವೆಳಾಕ್ ಜಿಣಿಯೆ ಪಯ್ಣಾರ್ ಮೊಗಾಚೊ ಸಾಂಗಾತಿ ಜಾವ್ನ್ ಘೆತ್ಲ್ಯಾರ್ ಮುಖಾರ್ ಮೆಳ್ಚ್ಯೊ ಘುಂವ್ಡ್ಯೊಯ್ ಪಯ್ಣಾಕ್ ಧಾದೊಸ್ಕಾಯ್ ಆನಿ ನವೊ ಅರ್ಥ್ ದೀಂವ್ಕ್ ಸಕ್ತಾತ್. ಪುಣ್ ಹ್ಯಾ ಕವಿತೆಂತ್ಲೊ ಮನೀಸ್ (ಖುದ್ದ್ ಕವಿ ಜಾಂವ್ಕೀ ಪುರೊ) ಪಡುನ್ ಉಪ್ರಾಂತ್ ಹಳ್ತಾನ್ ಉಬೊ ರಾವ್ಲ್ಯಾ ಉಪ್ರಾಂತ್ ವೆಳಾಕ್ ಏಕ್ ಸಾಂಗಾತಿ ಮ್ಹಣ್ ಘೆತಾ ತರೀ ಪರತ್ ನವ್ಯಾ ವೆಳಾ ಸಂಗಿಂ ಸರ್ತೆಕ್ ರಾಂವ್ಚೆಂ ಹಟ್ ಸೊಡಿನಾ. ಹೊ ಮನೋಭಾವ್ ಕಾಂಯ್ ಆಯ್ಚೆ ಪಿಳ್ಗೆಚೊ ವೆಳಾಕ್ ಪಂತಾಹ್ವಾನ್ ಘಾಲ್ಚೊ never die attitude ವಾ ಸ್ಪರ್ಧಾತ್ಮಕ್ ಸ್ಪಿರಿತ್ ಮ್ಹಣ್ಯೆತ್?
ತರ್ನೊ ಕವಿ ಮೆಲ್ವಿನ್ ಕೊಳಾಲ್‌ಗಿರಿಚ್ಯಾ ಹೆ ಕವಿತೆಂತ್, ಜಿವಿತಾಚೊ ಅನ್ಭೊಗ್ ರುಪಾಂತರ್ ಕರ್‍ಚಿ ತಾಚಿ ತಾಂಕ್ ಆನಿ ವಾಡಾವಳ್ ಸಾರ್ಕಿ ಪಾರ್ಕಿಯೆತಾ.
-ಎಂಡ್ರ್ಯೂ ಎಲ್. ಡಿಕುನ್ಹಾ
ಕವಿತಾ:
ಧಾಂವ್ಣೆ ಸರ್ತ್
ಕುಜ್ನಾಂತ್ ಮಾಂಯ್ನ್
ನಿಸ್ತ್ಯಾಕ್ ಭರ್ಶಿನಾಸ್ತಾನಾ ದವರ್‍ಲಲೊ
ತೊ ಅರ್ಧೆಂ ವೊಳೆಂ ನಾರ್‍ಲ್
ಉಂದ್ರಾನ್ ಕಾಂತಯ್ಲಲ್ಯಾಪರಿಂ
ಸಭಾರ್ ತೆಂಪಾಂ ಥಾವ್ನ್ ಮತ್
ಮ್ಹಜಿ ಕಾಂತಯ್ತಾಲೆಂ ಏಕ್ ಸವಾಲ್
ವೇಳ್ ಮುಕಾರ್ ವಾ ಹಾಂವ್ ?
ತ್ಯಾ ಎಕಾ ದಿಸಾ
ವಿಚಾರ್‍ಲೆಂ ಹಾಂವೆ ವೆಳಾಕ್
"ದವರ್‍ಯಾಮಿ ಧಾಂವ್ಣೆ ಸರ್ತ್
ಪಾರ್ಕುಂಕ್ ...
ತುಂ ಮುಕಾರ್ ವಾ ಹಾಂವ್ "
ವೇಳ್ ಜಾಪ್ ದೀವ್ನ್ ಮ್ಹಣಾಲೊ
"ಜಾಯ್ತ್...
ಪುಣ್...
ಪಳೆ ಹಾಂವಚ್ ಮುಕಾರ್
ತುಂ ಮ್ಹಜೆ ಪಾಟಿಂ ವಾ ಮ್ಹಜೆ ಸಂಗಿಂ
ಜಾಂವ್ಚೆಂ ನಾ ತುಕಾ ಪಾವುಂಕ್
ಮ್ಹಜ್ಯಾಕಯ್ ಮುಕಾರ್"
"ವೇಳ್
ಕಸೊ ಪಾವತ್ ಮುಕಾರ್?
ನಾ ವೆಳಾಕ್ ದೊಳೆ, ದೀಷ್ಟ್, ಪಾಂಯ್
ಆನಿ ಕಳಿತ್ ನಾ ವಾಟ್ ಸಮೇತ್
ಹಾಂವಚ್ ಧಾಂವ್ತಲೊಂ ಮುಕಾರ್"
ದೊಳೆ ಪುಲೊವ್ನಚ್ ಸ್ವಪ್ಣೆಲೊಂ ಹಾಂವ್
*******
ತ್ಯಾ ಏಕ್ ದಿಸ್
ಮ್ಹಾಕಾ ಆನಿ ವೆಳಾಕ್
ಧಾಂವ್ಣೆ ಸರ್ತ್
ಸಾಂಗಾತಾಚ್ ಧಾಂವುಂಕ್ ಸುರ್ವಾತ್ಲೆಂ
ಶೆಂಭರ್ ಕಿ.ಮಿ ಧಾಂವ್ಣೆ ಸರ್ತೆಪರಿಂ
ವೇಳಯ್ ಧಾಂವ್ಲೊ ಆನಿ ಹಾಂವಯಿ
ಧಾಂವ್ಲೊಂ...
ಧಾಂವ್ಲೊಂ...
ಆನಿಕಿಯ್ ಧಾಂವ್ಲೊಂ
ರೇಸಾಚ್ಯಾ ಘೊಡ್ಯಾಪರಿಂ
ವೇಳಾ ಸಮಾಸಮ್ ಧಾಂವ್ಲೊಂ
ಕಂಬ್ಳ ಧಾಂವ್ಣೆಚ್ಯಾ ಜೊಡಿ ರೆಡ್ಯಾಂಪರಿಂ
ತಾಚ್ಯಾ ಸಾಂಗಾತಾಚ್ ಮೆಳ್ಳೊಂ
ಧಾಂವ್ಚೆ ಹುಮೆದಿನ್
ನಾ ಪಳೆಲೆಂ ಕುಶಿನ್, ವಯ್ರ್, ಸಕಯ್ಲ್
ಆನಿ ಮುಖಾರ್ ಸಮೇತ್
ಧಾಂವ್ತಾಂ ...ಧಾಂವ್ತಾಂ
ಆವ್ಚಿತ್ ಘುಂವ್ಡೆಂತ್ ದಿಸನಾತ್ಲೆ ಅಡ್ಚಣೆಕ್
ಆದ್ಳಾಲೊಂ ಹಾಂವ್ ಆನಿ ಪಡ್ಲೊಂ...
ಥಂಯಿಂಚ್...
ಧಾಂವ್ಣೆಕ್ ಮ್ಹಜ್ಯಾ ಪಡ್ಲಿ ಬ್ರೇಕ್...
ಪರತ್ ಉಟುನ್ ಚೊಯ್ತಾನಾ
ಪಾವ್ಲೊ ತೊ ವೇಳ್ ಮ್ಹಜ್ಯಾಕಯ್ ಮುಕಾರ್
ಖೂಬ್ ಮುಕಾರ್...
ದಿಸನಾತ್ಲ್ಯಾ ತಿತ್ಲೊ ಪಯ್ಸ್
ಪರತ್ ಮೆಳನಾಸ್ತಾನಾ ಮಾಯಾಗ್
ವ್ಹಯ್...ವೇಳಚ್ ಜಿಕ್ಲೊ
ಹಾಂವ್ ಹಳ್ತಾರ್ ಉಬೊ
ಆತಾಂ ಮ್ಹಾಕಾ ನವ್ಯಾ ವೆಳಾಚೊ ಸಾಂಗಾತ್
ದವರುಂಕ್ ಆಸಾ ತಾಚೆ ಸಂಗಿಂಯ್ ಧಾಂವ್ಣೆ ಸರ್ತ್
-ಮೆಲ್ವಿನ್ ಕೊಳಾಲ್‍ಗಿರಿ
संपादकीय:
वेळ सांगाती या स्परधी?
आयच्या पंताटाच्या संसारांत मनीस जीव सोडन धांवून आसा. वेळ ना. फुरसत ना. सोसणिकाय भिलकुल ना. मुखार मरण राकून आसल्यारी धांवच्या पिशेपणान मनीस धांवता, धांवताना थोडेपावटीं मनशापणय गुड्डावन धांवता आनी उपरांत हांडता, पडता आनी उसळता. अवचित घुंवडेंनी मनशाक धरणीक शेवटायताना वेळासंगीं हो पंताट गर्जेचोगी म्हळ्ळ्या सवालाक कवी आपल्याच अनभोगाची जाप दीवंक पेचाडता.
वेळ आसचो जियेवंक. ह्या वेळाक जिणिये पयणार मोगाचो सांगाती जावन घेतल्यार मुखार मेळच्यो घुंवड्योय पयणाक धादोसकाय आनी नवो अर्थ दीवंक सक्तात. ಪುಣ್ ह्या कवितेंतलो मनीस (खुद्द कवी जांवकी पुरो) पडून उपरांत हळतान उबो रावल्या उपरांत वेळाक एक सांगाती म्हण घेता तरी परत नव्या वेळा संगीं सरतेक रांवचें हट सोडिना. हो मनोभाव कांय आयचे पिळगेचो वेळाक पंताहवान घालचो नेवेर डिए अट्टिटुडे वा स्परधात्मक स्पिरीत म्हणयेत?
तरनो कवी मेल्विन ळालगिरिच्या हे कवितेंत, जिविताचो अनभोग रुपांतर करची ताची तांक आनी वाडावळ सारकी पार्कियेता.
-एंडऱ्यू एल. डिकुन्हा
कविता:
धांवणे सर्त
कुजनांत मांयन
निस्त्याक भरशिनास्ताना दवरललो
तो अर्धें वोळें नारल
उंद्रान कांतयलल्यापरीं
सभार तेंपां थावन मत
म्हजी कांतयतालें एक सवाल
वेळ मुकार वा हांव ?
त्या एका दिसा
विचारलें हांवे वेळाक
"दवर्यामी धांवणे सर्त
पारकूंक ...
तूं मुकार वा हांव"
वेळ जाप दीवन ...
म्हणालो
"जायत...
पुण...
पळे हांवच मुकार
तूं म्हजे पाटीं वा म्हजे संगीं
जांवचें ना तुका पावूंक
म्हज्याकय मुकार"
"वेळ
कसो पावत मुकार?
ना वेळाक दोळे, दीष्ट, पांय
आनी कळीत ना वाट समेत
हांवच धांवतलों मुकार"
दोळे पुलोवनच स्वपणेलों हांव
*******
त्या एक दीस
म्हाका आनी वेळाक
धांवणे सर्त
सांगाताच धांवूंक सुर्वातलें
शेंभर की.मी धांवणे सरतेपरीं
वेळय धांवलो आनी हांवयी
धांवलों...
धांवलों...
आनिकीय धांवलों
रेसाच्या घोडयापरीं
वेळा समासम धांवलों
कंबळ धांवणेच्या जोडी रेडयांपरीं
ताच्या सांगाताच मेळ्ळों
धांवचे हुमेदिन
ना पळेलें कुशीन, वयर, सकयल
आनी मुखार समेत
धांवतां ...धांवतां
आवचित घुंवडेंत दिसनातले अडचणेक
आदळालों हांव आनी पडलों...
थंयींच...
धांवणेक म्हज्या पडली ब्रेक...
परत उटून चोयताना
पावलो तो वेळ म्हज्याकय मुकार
खूब मुकार...
दिसनातल्या तितलो पयस
परत मेळनास्ताना मायाग
व्हय...वेळच जिकलो
हांव हळतार उबो
आतां म्हाका नव्या वेळाचो सांगात
दवरूंक आसा ताचे संगींय धांवणे सर्त
-मेल्विन कोळालगिरी