ಸಂಪಾದಕೀಯ್:
ತಾಂಬ್ಡ್ಯಾ ದಿವ್ಯಾಕ್ ಜೊಕ್ತೊ ಮಾನ್
ತಾಂಬ್ಡ್ಯಾ ದಿವ್ಯಾಂಚ್ಯಾ ಸಂಸಾರಾಂತ್ ಜಿಯೆವ್ನ್ ಸುಟ್ಕಾ ಅಶೆತೆಲ್ಯಾಂಕ್ ಧವ್ಯಾ ದಿವ್ಯಾಂಚ್ಯಾ ಸಂಸಾರಾಂತ್ ಕಸಲೊ ಜಾಗೊ ಮೆಳತ್? ಝೀರೋ ವೊಲ್ಟಾಚ್ಯಾ ತಾಂಬ್ಡ್ಯಾ ದಿವ್ಯಾ ಪಂದಾ ಮಂದ್ ಜಿಣಿ, ಮಸ್ಕ್ ಜಿವಿತ್. ಹೆಂ ಜಿವಿತ್ ಸಾರ್‍ಲಲ್ಯಾ ಉಪ್ರಾಂತ್ ಹಜಾರ್ ವೊಲ್ಟಾಂಚ್ಯಾ ಧವ್ಯಾ ದಿವ್ಯಾಂ ಪಂದ್ಲೆಂ ಜಿವಿತ್ ಫುಡ್ ಕರುಂಕ್ ಸಾಧ್ಯ್ ಜಾಯ್ತ್? ನಾ!. ತಿತ್ಲೆಂ ಸುಲಭ್ ನ್ಹಯ್. ಬೋಟ್ ಜೊಕ್ಚಿ ಆಮ್ಚಿ ಸಮಾಜ್ ತಿತ್ಲಿ ಮುಖಾರ್ ವಚುಂಕ್ ನಾ. ತಿತ್ಲಿ ದಯಾಳ್ ಜಾಂವ್ಕ್ ನಾ. ಪುಣ್ ಕವಿ ದಯಾಳ್ ಜಾಲಾ. ಎಕಾ ಬರ್‍ಯಾ ಕವಿಚೊ ಗೂಣ್ ಹೊಚ್. ಮನ್ಶಾಪಣಾಕ್ ಪೊಟ್ಲುನ್ ಧರ್‍ಚೊ ಆನಿ ಸಂಸಾರಾನ್ ಅಲ್ಪ್ ಕರ್‍ನ್ ಚಿಲ್ಲುಂಚೆ ಸಂಗ್ತಿಂಕ್ ಉಂಚಾಯೆಕ್ ಉಕಲ್ನ್ ಧರ್‍ಚೊ.
ತಾಂಬ್ಡ್ಯಾ ದಿವ್ಯಾ ಪಂದಾ ಮಾಸಾಂ ಶಿಂದುನ್, ಆಶಾ ಕಿಮ್ಚುನ್ ಜಿಯೆತೆಲ್ಯಾಂಚ್ಯಾ ಅತ್ಮ್ಯಾ ಭಿತರ್ ರಿಗಲ್ಲೊ ಕವಿ ಸಮಾಜೆಂತ್ "ಧವಿ ವಾತ್ ಪೆಟಂವ್ಚಿ” ತಾಂಚಿ ಆಶಾ ಪಾರ್ಕಿತಾ. ಪುಣ್ ಕವಿ ಹ್ಯಾ ಧವ್ಯಾ ಲಾಯ್ಟಾ ಪಂದ್ಲ್ಯಾ ಹಾಸ್ತ್ಯಾ ಉಡ್ತ್ಯಾ ಡೋಂಗಿ ಸಂಸಾರಾಕ್ ಬರೊಚ್ ಜಾಣಾ. ಮನ್ಶಾಪಣಾಕ್ ಮಸ್ತುನ್ ದೆವಾಕ್ ಫುಲಾಂ ಘಾಲ್ಚ್ಯಾ ತಾಂಚ್ಯಾ ಭಕ್ತಿಪಣಾಕೀ ತಾಣೆ ಪಾರ್ಕಿಲಾಂ. ಹ್ಯಾಚ್ ಖಾತಿರ್ ಕವಿ ತಾಂಬ್ಡ್ಯಾ ದಿವ್ಯಾ ಪಂದ್ಲೆ ಜಿಣಿಯೆಕ್ ಆಲ್ತಾರಿಚ್ಯಾ ತಾಂಬ್ಡ್ಯಾದಿವ್ಯಾಕ್ ಸರಿ ಕರ್‍ನ್ ಪವಿತ್ರ್ ಕರ್‍ತಾ. ಅಶೆಂ ಪವಿತ್ರ್ ಕರ್‍ತಾನಾ ಸಮಾಜೆನ್ ಹ್ಯಾ ತಾಂಬ್ಡ್ಯಾ ದಿವ್ಯಾ ಪಂದ್ಲೆ ಜಿಣಿಯೆಕ್ ಮಾನಾನ್ ಸ್ವೀಕಾರ್ ಕರುಂಕ್ ಜಾಯ್ ಮ್ಹಳ್ಳೊ ಕವಿತೆಂತ್ ಸಾದ್ಚೊ ಉಲೊ ಆಯ್ಕನಾಸ್ತಾಂ ರಾವನಾ. ಊಂಚ್ ಮಟ್ಟಾಚಿ ಕವಿತಾ ದಿಲ್ಲ್ಯಾ ಗ್ಲ್ಯಾಡ್ಸನಾಕ್ ಉಲ್ಲಾಸ್!
-ಎಂಡ್ರ್ಯೂ ಎಲ್ ಡಿಕುನ್ಹಾ
ಕವಿತಾ:
ದಿವ್ಯಾಂ ಮುಳಿಂ
ತುಮ್ಚೊ ಧವ್ಯಾ ದಿವ್ಯಾಂಚೊ ಸಂಸಾರ್
ಉಜ್ವಾಡಾಚೆಂ ರಾಜ್,
ಪರ್ಜಳಾಚೊ ಖಮಾಲ್
ಸಾಂಜ್ ನಿಸರ್ತಾನಾ ದಿವ್ಯಾಂಚಿ ಪಂಗ್ತ್
ದಾರುಚಿ ಸರ್ತ್
ಉಟುನ್ ದಿಸ್ಚೊ ದಿವಾಳಿಚೊ ಘುರ್ತ್
ಮ್ಹಜೊ ತಾಂಬ್ಡ್ಯಾ ದಿವ್ಯಾಂಚೊ ಸಂಸಾರ್
ಮಂದ್ ಜಿಣಿ, ಮಸ್ಕ್ ಜಿವಿತ್
ಗಯ್ರೆಂ - ಫುಗೆಟ್ಯಾಂ ಸಾಂಗ್ಡೆಂ
ಫುಟ್ಲಲೆಂ ನಶಿಬ್
ಸುರ್ಯೊ ಬುಡ್ತಾನಾ ಕುಡಿ ಪ್ರದರ್ಶನ್
ರಾತ್ ಇರ್‍ತಾನಾ ಕಾಮುಕ್ಯಾಂಚೆಂ ದರ್ಶನ್
ತುಮ್ಚ್ಯಾ ದಿವ್ಯಾಂನಿ ಜೀಣ್
ಸದಾಂ ಹಾಸ್ತಿ ಉಡ್ತಿ
ತಾಂಬ್ಡ್ಯಾ ದಿವ್ಯಾಂ ಮುಳಿಂ
ಆಬ್ಲೆಸಾಚಿ ಭರ್ತಿ, ಜಿಣ್ಯೆಂತ್ ಸುಕ್ತಿ
ಮ್ಹಜಿಂ ಮಾಸಾಂ
ಜರ್ ಅಶೀಂಯ್ ಶಿಂದುಂಕ್ ನಾತ್ಲಿಂ,
ಆಶಾ ಅಶೀಯ್ ಕಿಮ್ಚುಂಕ್ ನಾತ್ಲಿ
ಹಾಂವಯ್ ಧವಿ ವಾತ್ ಜಳಯ್ತಿಂ
ಪರ್ಜಳಾಚಿ ಭೆಟ್ ಕರ್ತಿಂ
ಪಿಸೊಳೆಂ ಜಾವ್ನ್ ಉಜ್ಯಾಕ್
ಸವಾಲ್ ಉಡಯ್ತಿಂ
ಕಾಂಯ್ ನಾ ತರ್ ತುಮ್ಚೊ
ಸಂಸಾರ್ ದೆಖ್ತಿಂ
ತರೀ ಪರ್ವಾನಾ, ತುಮ್ಚ್ಯಾ ಸಂಸಾರಾಚಿ
ಪರ್ಬಿಂ ತುಮ್ಕಾಂ
ತುಮಿ ಧವೆ ದಿವೆ
ಹಜಾರೊಂ ವೊಲ್ಟಾಚೆ
ರಾಜ್ ರಸ್ತ್ಯಾಂನಿ ಉಂಚಾಯೆರ್ ಸೊಭ್ಚೆ
ಹಾಂವ್ ತಾಂಬ್ಡೊ ಬಲ್ಬ್
ಝೀರೋ ವೊಲ್ಟಾಚೊ
ಮಂದ್ ಉಜ್ವಾಡಾಚೊ ತರೀ
ದೆವಾ ಆಲ್ತಾರಾರ್ ಠೆಂವ್ಚೊ
-ಗ್ಲ್ಯಾಡ್ಸನ್ ಡಿ'ಆಲ್ಮೇಡಾ
संपादकीय:
तांबड्या दिव्याक जोकतो मान
तांबड्या दिव्यांच्या संसारांत जियेवन सुटका अशेतेल्यांक धव्या दिव्यांच्या संसारांत कसलो जागो मेळत? झीरो वॉल्टाच्या तांबडा दिवया पंदा मंद जिणी, मस्क जिवित. हें जिवित सारलल्या उपरांत हजार वॉल्टांच्या धव्या दिव्यां पंदलें जिवित फुड करूंक साध्य जायत? ना!. तितलें सुलभ न्हय. बोट जोकची आमची समाज तितली मुखार वचूंक ना. तितली दयाळ जावंक ना. पुण कवी दयाळ जाला. एका बऱ्या कविचो गूण होच. मनशापणाक पोटलून धरचो आनी संसारान अल्प कर्न चिल्लुंचे संगतींक उंचायेक उकलन धरचो.
तांबड्या दिवया पंदा मासां शिंदून, आशा किमचून जियेतेल्यांच्या अत्म्या भितर रिगल्लो कवी समाजेंत "धवी वात पेटंवची" तांची आशा पार्किता. पुण् कवी ह्या धव्या लायटा पंदल्या हास्त्या उडत्या डोंगी संसाराक बरोच जाणा. मनशापणाक मस्तून देवाक फुलां घालच्या तांच्या भक्तिपणाकी ताणे पार्किलां. ह्याच खातीर कवी तांबड्या दिवया पंदले जिणियेक आलतारिच्या तांबड्या दिव्याक सरी कर्न पवित्र करता. अशें पवित्र करताना समाजेन ह्या तांबड्या दिवया पंदले जिणियेक मानान स्वीकार करूंक जाय म्हळ्ळो कवितेंत सादचो उलो आयकनास्तां रावना. ऊंच मट्टाची कविता दिल्ल्या ग्ल्याडसनाक उल्लास!
-एंडऱ्यू एल डिकुन्हा
कविता:
दिव्यां मुळीं
तुमचो धव्या दिव्यांचो संसार
उजवाडाचें राज,
पर्जळाचो खमाल
सांज निसरताना दिव्यांची पंगत
दारुची सर्त
उटून दिसचो दिवाळिचो घुर्त
म्हजो तांबड्या दिव्यांचो संसार
मंद जिणी, मसक जिवित
गयरें - फुगेट्यां सांगडें
फुटललें नशीब
सुरयो बुडताना कुडी प्रदर्शन
रात इरताना कामुक्यांचें दर्शन
तुमच्या दिव्यांनी जीण
सदां हास्ती उडती
तांबड्या दिव्यां मुळीं
आबलेसाची भरती, जिणयेंत सुक्ती
म्हजीं मासां
जर अशींय शिंदूंक नातलीं,
आशा अशीय किमचूंक नातली
हांवय धवी वात जळयतीं
पर्जळाची भेट कर्तीं
पिसोळें जावन उज्याक
सवाल उडयतीं
कांय ना तर तुमचो
संसार देखतीं
तरी परवाना, तुमच्या संसाराची
परबीं तुमकां
तुमी धवे दिवे
हजारों वोलटाचे
राज रस्त्यांनी उंचायेर सोभचे
हांव तांबडो बलब्
झीरो वोलटाचो
मंद उजवाडाचो तरी
देवा आलतारार ठेंवचो
-ग्लॅड्सन डी'आलमेडा