ಸಂಪಾದಕೀಯ್:
ಕಿತ್ಲೆಂ ಧಾಂಪ್ಲ್ಯಾರೀ ಉಗ್ತೆಂ ಜಾಂವ್ಚಿಂ ಸತಾಂ
ವಿಣ್ಗೆಂ ಸತ್ ಮ್ಹಳ್ಯಾರ್ ಕಿತೆಂ? ಹಾಂವೆಂ ಆಯ್ಕಲ್ಲ್ಯಾ ಪರ್ಮಾಣೆ ಸತ್ ಆನಿ ಫಟ್ ಉಪ್ಯೆಂವ್ಕ್ ಗೆಲ್ಲಿಂ ಖಂಯ್. ತ್ಯಾ ವೆಳಿಂ ಫಟ್ ಮತ್ಲಬಾನ್ ಸತಾಚೆಂ ವಸ್ತುರ್ ಚೊರುನ್ ನ್ಹೆಸ್ಲೆಂ ಖಂಯ್. ಪುಣ್ ಸತ್ ಫಟಿಚೆಂ ವಸ್ತುರ್ ನ್ಹೆಸುಂಕ್ ತಯಾರ್ ನಾ ಜಾಲೆಂ ಆನಿ ವಿಣ್ಗೆಂಚ್ ರಾವ್ಲೆಂ! ಮನ್ಶಾ ಕುಡಿಕ್ ಮರಣ್ ಮ್ಹಳ್ಳೆಂ ಅಸಾ ತೆಂ ವಿಣ್ಗೆಂ ಸತ್. ಹಾಂಗಾ ಕವಿನ್ ಮ್ಹನ್ಶಾಚ್ಯಾ ನಾಗ್ಡ್ಯಾಪಣಾಕ್ ಆನಿ ವಿಣ್ಗ್ಯಾ ಸತಾಕ್ ಏಕ್ ಗಾಂಚ್ ಘಾಲ್ಚೆಂ ಪ್ರಯತ್ನ್ ಕೆಲಾಂ. ತಶೆಂಚ್ ಜಿವಿತ್ ಆನಿ ಮರ್ಣಾ ಮಧೆಂ ವಿಣ್ಗ್ಯಾಪಣಾಚ್ಯಾ ಮನ್ಶಾ ಖೊರ್ಜಿಚಿಂ ನಕ್ಲಾಂ ಕೆಲ್ಯಾಂತ್.
ಲ್ಯಾನ್ಸಿ ಸೈಂಭಾನ್ ಕಾಣ್ಯೆಗಾರ್ ತರೀ ಕವಿತಾ ಬರೊಂವ್ಚಿ ತಾಕಾ ವಿಶೇಸ್ ಉರ್ಬಾ ಆಸಾ ಆನಿ ತಾಚ್ಯೊ ಕವಿತಾ ವಾಚ್ತಾನಾ ಸರಳ್ ದಿಸ್ತಾತ್ ತರೀ ಕಸಲೆಂ ಪುಣೀ ತಾತ್ವಿಕ್ ಚಿಂತಪ್ ಉಟಯ್ಲ್ಯಾ ಶಿವಾಯ್ ಸಂಪನಾಂತ್. ಹೆ ಕವಿತೆಂತ್ ಲ್ಯಾನ್ಸಿ ಜಲ್ಮ್ ಆನಿ ಮರ್ಣಾ ಮಧೆಂ ಮನ್ಶಾಚ್ಯಾ ವಿಣ್ಗ್ಯಾ ಖೆಳಾವಿಶಿಂ, ವಿಣ್ಗೆಪಣ್ ಧಾಂಪುಂಕ್ ಮನ್ಶಾನ್ ಘಾಲ್ಚ್ಯಾ ವೆಸಾವಿಶಿಂ ವಾಚ್ಪ್ಯಾಕ್ ಚಿಂತುಂಕ್ ಲಾಯ್ತಾ. ಕಿತ್ಲೆಂ ಧಾಂಪ್ಲ್ಯಾರೀ ಮನಿಸ್ ಉಗ್ತೊ ಜಾತಾ ಹೆಂ ವಿಣ್ಗೆಂ ಸತ್.
- ಆಂಡ್ರ್ಯೂ ಎಲ್. ಡಿಕುನ್ಹಾ
ಕವಿತಾ:
ವಿಣ್ಗೆಂ ಸತ್
ಜಲ್ಮ್ ಕಿತೆಂ? ಮರಣ್ ರಿತೆಂ?
ಕೊಣೀ ಸಮ್ಜಯ್ಲ್ಯಾರ್ ಜಾತೆಂ!
ನಾಗ್ಡೆಪಣಾಂಚೆಂ ಸಳ್, ಜಿಣ್ಯೆ ಸಾತೆಂ.
'ವಿಣ್ಗೆಪಣಾ'ವಿಶಿಂ ಸಾಂಗ್ಚೆಂ ಕಿತೆಂ?
'ಜಲ್ಮ್'- ಉಬ್ಜೊಂಕ್ ಗರ್ಜ್ ಆಸಾ,
ಖುಶೆನ್ ವ ನಾಖುಶೆನ್
ಚೆಡ್ಯಾಕ್ ಆನಿ ಚೆಡ್ವಾಕ್ ,
'ವಿಣ್ಗ್ಯಾ' ಸರ್ಕಸಾಚೊ ಖೆಳ್ .
'ಜಲ್ಮತಾನಾ'- ಮನಿಸ್ ಯೆತಾ
ಖುಶೆನ್ ವ ನಾಖುಶೆನ್
ಚೆಡೊ ವ ಚೆಡುಂ
'ವಿಣ್ಗ್ಯಾ' ಬಾಳ್ಶಾಚೊ ಮೇಳ್.
'ಜಿಯೆತಾನಾ'- ಲಜ್, ಮರ್‍ಯಾದ್ ಧೊಸ್ತಾ
ವಿಣ್ಗೆಪಣ್ ಧಾಪುನ್, ಪೊಕ್ರಿ ಹಾಸ್ತಾ.
ಪೊಟಾಕ್ ನಾತ್ಲ್ಯಾರೀ, ಆಂಗಾರ್ ನ್ಹೆಸ್ತಾ
ನ್ಹಾತಾನಾ 'ವಿಣ್ಗೊ'ಚ್ ನ್ಹಾಣ್ಯೆಂತ್ ದಿಸ್ತಾ.
ಜಲ್ಮಾಯಿಲ್ಲಿಂ ವಿಣ್ಗಿಂ ಜಾಲ್ಲಿಂ
ಜಲ್ಮ್ ದೀಂವ್ಕ್.
ಜಲ್ಮತಾನಾ 'ವಿಣ್ಗೆಂ' ಆಯಿಲ್ಲೆಂ
ಜಲ್ಮ್ ಘೆಂವ್ಕ್
'ಮರಣ್' ತರೀ ಖಂಯ್ ಸೊಡ್ತಾ?
ವಿಣ್ಗೆಪಣಾಚೆ ಮನ್ಶಾ ಖೊರ್ಜಿಕ್ !
ಪುರ್‍ಚೆ ಆದಿಂ 'ವಿಣ್ಗೆಂ' ನ್ಹಾವ್ನ್ ಕಾಡ್ತಾ
ಮೊಡ್ಯಾ ವಿರೋಧ್ ಮರ್ಜೆಕ್ !!
-ಲ್ಯಾನ್ಸಿ ಪಿಂಟೊ ನಾಯಕ್, ಕುಲ್ಶೇಕರ್
संपादकीय:
कितलें धांपल्यारी उगतें जांवचीं सतां
विणगें सत म्हळ्यार कितें? हांवें आयकल्ल्या पर्माणे सत आनी फट पेंवपाक गेल्लीं खंय. त्या वेळीं फट मतलबान सताचें वस्तुर चोरून न्हेसलें खंय. पुण सत फटिचें वस्तुर न्हेसूंक तयार ना जालें आनी विणगेंच रावलें! मनशा कुडीक मरण म्हळ्ळें असा तें विणगें सत. हांगा कवीन म्हनशाच्या नागड्यापणाक आनी विणग्या सताक एक गांच घालचें प्रयत्न केलां. तशेंच जिवित आनी मरणा मधें विणग्यापणाच्या मनशा खोरजिचीं नकलां केल्यांत.
लॅन्सी सैंभान काणयेगार तरी कविता बरोंवची ताका विशेस उरबा आसा आनी ताच्यो कविता वाचताना सरळ दिसतात तरी कसलें पुणी तात्वीक चिंतप उटयल्या शिवाय संपनांत. हे कवितेंत लॅन्सी जल्म आनी मरणा मधें मनशाच्या विणग्या खेळाविशीं, विणगेपण धांपूंक मनशान घालच्या वेसाविशीं वाचप्याक चिंतूंक लायता. कितलें धांपल्यारी मनीस उगतो जाता हें विणगें सत.
- आंडऱ्यू एल. डिकुन्हा
कविता:
विणगें सत
जल्म कितें? मरण रितें?
कोणी समजयल्यार जातें!
नागडेपणांचें सळ, जिणये सातें.
'विणगेपणा'विशीं सांगचें कितें?
'जल्म'- उबजोंक गर्ज आसा,
खुशेन व नाखुशेन
चेड्याक आनी चेडवाक ,
'विणग्या' सर्कसाचो खेळ .
'जल्मताना'- मनीस येता
खुशेन व नाखुशेन
चेडो व चेडूं
'विणग्या' बाळशाचो मेळ.
'जियेताना'- लज, मर्याद धोसता
विणगेपण धापून, पोकरी हासता.
पोटाक नातल्यारी, आंगार न्हेस्ता
न्हाताना 'विणगो'च् न्हाणयेंत दिस्ता.
जल्मायिल्लीं विणगीं जाल्लीं
जल्म दीवंक.
जल्मताना 'विणगें' आयिल्लें
जल्म घेवंक
'मरण' तरी खंय सोडता?
विणगेपणाचे मनशा खोरजीक !
पुरचे आदीं 'विणगें' न्हावन काडता
मोड्या विरोध मर्जेक !!
-लॅन्सी पिंटो नायक, कुलशेकर.