ಸಂಪಾದಕೀಯ್:
ತಳ್ಟೊ ಆನಿ ವಾಲಿಚಿ ಮೊಗಾಚಿ ಕಾಣಿ
ಮೊಗಾಚಿ ಕವಿತಾ ಹಾಂಗಾಸರ್ ಅಶಿ ವ್ಹಾಳುನ್ ಆಯ್ಲ್ಯಾ. ಹಾಂಗಾಸರ್ ಏಕ್ ತಳ್ಟೊ ಆಸಾ, ಆನ್ಯೇಕ್ ವಾಲ್ ಆಸಾ. ತಳ್ಟ್ಯಾಚಿಂ ಮೊಡ್ಲಾಂ ವಾರ್‍ಯಾಕ್ ಧಲ್ತಾನಾ, ತಾಂಚಿ ಕಾಂಪ್ ಹೆ ವಾಲಿಚ್ಯಾ ಕಾಳ್ಜಾಚೆರ್ ದಾಧೊಸ್ಕಾಯೆಚೊ ಆಯ್ನೊ ಹಾಲಯ್ತಾ. ಪುಣ್ ಆಪುಣ್ ಫಕತ್ ವಾಲ್ ಕಿತ್ಯಾಕ್? ತಿತ್ಲೆಂ ಅಸ್ಕತ್ ಕಿತ್ಯಾಕ್? ಆಜೂನ್ ತಳ್ಟೊ ಮ್ಹಣುನ್ ಸಮ್ಜುಂಚ್ಯಾ ದಾದ್ಲ್ಯಾಚ್ಯಾ ಆಧಾರಾಕ್ ಹೊಂದುನ್ ರಾಂವ್ಚೆಂ ಕಿತ್ಯಾಕ್? ಮ್ಹಜೆಲಾಗಿಂ ಹಾಕಾ ಜಾಪಿ ನಾಂತ್.
ಹೊ ಮೋಗ್ ಇತ್ಲೊ ಗುಂಡಾಯೆಕ್ ರೊಂಬುನ್ ಗೆಲಾ-ಕಿ, ವಾಲ್ ಸುಕುನ್ ಕೊಟ್ಟಾಯ್ ಜಾಲ್ಯಾರಿ, ಸುರೆಚ್ಯಾ ಪೆಳ್ಯಾಗೊಡಾಚಿ ಗೊಡ್ಸಾಣ್ ಹ್ಯಾ ಜೊಡ್ಯಾಚಿ ಕಾಣಿ ಆಖ್ಖ್ಯಾ ಸಂಸಾರಾಕ್ ಸಾಂಗ್ತಲಿ ಮ್ಹಳ್ಳೊ ವಿಶೇಸ್ ಭರ್‍ವಸೊ ದವರುನ್ ಆಸಾ.
ಲಗ್ನಾ ಜಿವಿತಾಕ್ ಪಾವ್ಲ್ ದವರಲ್ಲ್ಯಾ ವಿಲ್ಮಾಚಿ ನವಿ ಕವಿತಾ, ನವೆ ಆಶಯ್ ಘೆವ್ನ್ ಆಯ್ಲ್ಯಾ. ನವೆ ಹೊಕ್ಲೆಚೆ ಆಶಯ್ ಹೆ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ತಳ್ಟೊ
ವಾಲ್ ಜಾವ್ನ್ ಚರುನ್ ಆಯ್ಲ್ಯಾಂ
ಮ್ಹಜ್ಯಾ ತಳ್ಟ್ಯಾ ಲಾಗಿಂ
ಕಾಂಟೆ ವೆಂಗುನ್ ತುದ್ಯೆಕ್ ಪಾವ್ಲ್ಯಾಂ
ಪರ್ಮಳ್ ಚಡುಂ ಸರ್ಗಿಂ!
ಸುಕ್ಯಾ ಬೆಟಾಂತುಯ್ ಫುಟ್ಲ್ಯಾತ್ ಆಜ್
ಸಂತೊಸಾಚ್ಯೊ ಝರಿ
ವ್ಹಾಳೂನ್ ಗೆಲ್ಲೆ ದುಖೆಸ್ತ್ ನಂಯ್ಕ್
ಗೋಡ್ ಗೋಡ್ ಕರಿ.
ಇರ್ವೊಳಾಚ್ಯಾ ದೊಳ್ಯಾಂನಿ ಹಾಂವ್
ಸಂಸಾರ್ ಸಗ್ಳೊ ದೆಖ್ತಾಂ
ಸುರೆಚ್ಯಾ ಆಮಾಲಾಕ್
ಸಗ್ಳೆಂ ವಿಸ್ರತಾಂ!
ತುಜಿಂ ಮೊಡ್ಲಾಂ ಗಾವೂಂಕ್ ಲಾಗ್ಲ್ಯಾಂತ್
ರಂಗೀನ್ ಸಂಗೀತ್ ಗಾಣಾಂ
ಕಾಂಪ್ ತಾಚಿ ಭೊಗುಂಕ್ ಸಕ್ತಾಂ
ಏಕ್ ಜಾಲ್ಯಾಂತ್ ಮನಾಂ.
ವಾಲ್ ಸುಕುನ್ ವಚತ್ ತರಿ
ವೆಂಗ್ ಅಶೀಚ್ ಉರುಂ
ಪೆಳ್ಯಾ ಗೊಡಾಚಿ ಸ್ವಾಧೀಕ್ ಗೊಡ್ಸಾಣ್
ಆಮ್ಚಿ ಕಾಣಿ ಸಾಂಗುಂ!
-ವಿಲ್ಮಾ ಬಂಟ್ವಾಳ್
संपादकीय:
तळटो आनी वालीची मोगाची काणी
मोगाची कविता हांगासर अशी व्हाळून आयल्या. हांगासर एक तळटो आसा, आन्येक वाल आसा. तळट्याचीं मोडलां वारयाक धलताना, तांची कांप हे वालीच्या काळजाचेर दाधोस्कायेचो आयनो हालयता. पूण आपूण फकत वाल कित्याक? तितलें अस्कत कित्याक? आजून तळटो म्हणून समजुंच्या दादल्याच्या आधाराक होंदून रांवचें कित्याक? म्हजेलागीं हाका जापी नांत.
हो मोग इतलो गुंडायेक रोंबून गेला-की, वाल सुकून कोट्टाय जाल्यारी, सुरेच्या पेळ्यागोडाची गोडसाण ह्या जोड्याची काणी आख्ख्या संसाराक सांगतली म्हळ्ळो विशेस भरवसो दवरून आसा.
लग्ना जिविताक पावल दवरल्ल्या विल्माची नवी कविता, नवे आशय घेवन आयल्या. नवे होकलेचे आशय हे.
-मेल्विन रोड्रीगस
कविता:
तळटो
वाल जावन चरून आयल्यां
म्हज्या तळट्या लागीं
कांटे वेंगून तुद्येक पावल्यां
परमळ चडूं सरगीं!
सुक्या बेटांतूय फुटल्यात आज
संतोसाच्यो झरी
व्हाळून गेल्ले दुखेस्त नंयक
गोड गोड करी.
इरवोळाच्या दोळ्यांनी हांव
संसार सगळो देखतां
सुरेच्या आमालाक
सगळें विसरतां!
तुजीं मोडलां गावूंक लागल्यांत
रंगीन संगीत गाणां
कांप ताची भोगूंक सकतां
एक जाल्यांत मनां.
वाल सुकून वचत तरी
वेंग अशीच उरूं
पेळ्या गोडाची स्वाधीक गोडसाण
आमची काणी सांगूं!
-विल्मा बंटवाळ