ಸಂಪಾದಕೀಯ್:
ಜಿವಿತಾಂತ್ಲ್ಯಾ ವಾದಾಳಾಕ್ ಸಾಂಪ್ಡಲ್ಲೆ ವೆಕ್ತಿಚಿ ಧಾರುಣ್ ಕಥಾ
ಜಿವಿತಾಂತ್ ವಾದಾಳಾಂ ಯೆತೇಚ್ ಆಸ್ತಾತ್. ವಾದಾಳಾಂಕ್ ಏಕ್ ಪಾವ್ಟಿಂ ಜಿವಿತಾಚಿ ದಿಶಾ ಖಂಯ್ಚ್ಯಾನ್ ಘುಂವ್ತಾ ತೆಂ ಸಾಂಗೊಂಕ್ ಜಾಯ್ನಾ. ಪುಣ್ ಅಸಲ್ಯಾ ವಾದಾಳಾಂಕ್ ಸಾಂಪ್ಡಾತಾನಾ ಆಮ್ಚ್ಯಾ ಮೊಗಾಚ್ಯಾಂಚೊ ಆಸ್ರೊ ಲಾಭ್ಲೊ ತರ್ ಜಿವಿತಾಚಿ ದಿಶಾ ತಶೀಯ್ ಬದ್ಲತ್ ಕಾಂಯ್?
ಹೆ ಕವಿತೆಂತ್ಲಿ ಜಿ ನಾಯಕಿ ಆಸಾ, ತಿಚೀಯ್ ಅವಸ್ಥಾ ಜಾಲ್ಲಿ! ಜಿವಿತಾಂತ್ಲೆ ಎಕೆ ಘುಂವ್ಡೆರ್ ಜೆನ್ನಾಂ ತಿ ಎಕಾ ವಾದಾಳಾಕ್ ಸಾಂಪಡ್ಲಿ, ತೆನ್ನಾಂ ತಿಕಾ ಆಶೆಲ್ಲೊ ಆಸ್ರೊ ಲಾಭ್ಲೊನಾ. ತಶೆಂ ಜಾಲ್ಲ್ಯಾನ್ ಜಿವಿತಾಚಿ ದಿಶಾ ತಿಚಿ ಸಂಪೂರ್ಣ್ ಬದ್ಲೊನ್ ಗೆಲಿ. ಆಜ್ ಸರ್‍ವಾಂಕ್ ಹಿಚ್ಯಾ ಬದ್ಲಲ್ಲ್ಯಾ ಜಿವಿತಾಚಿ ವಿಸರ್ ಪಡ್ಲ್ಯಾ ತರೀ, ತಿ ಮಾತ್ರ್ ರಡೊನ್ ಬಸ್ಲ್ಯಾ.
ಜಿವಿತಾಚ್ಯಾ ಎಕಾ ದುಕಾಳ್ ಕುಶಿಚೆಂ ಕಾಪ್ ಹೆ ಕವಿತೆದ್ವಾರಿಂ ಆಮ್ಕಾಂ ಖಾಂವ್ಕ್ ದಿಲ್ಲಿ ಸುವರ್ಣಾ ಗಾಡೆ, ವೃತ್ತೆನ್ ಶಿಕ್ಷಕಿ. ಗಾಂವಾಂತ್ ಉತ್ತರ್ ಕನ್ನಡಾಚಿ. ಕೊಂಕಣಿ ತಿಚಿ ಮಾಯ್‌ಭಾಸ್. ಕನ್ನಡಾಚೆ ತಶೆಂ ಗೊಂಯ್ಚೆ ಬೋಲಿಚೆ ಧಾರಾಳ್ ಸಬ್ದ್ ತಿಚೆ ಬೋಲಿಂತ್ ಮಿಸ್ಳಲ್ಯಾತ್. ವಾಚ್ಪ್ಯಾಂಕ್ ಅಸಲೆ ಬೋಲಿಚೀಯ್ ರೂಚ್ ಚಾಕೊಂಕ್ ಮೆಳಜೆ ಮ್ಹಳ್ಳ್ಯಾಖಾತೀರ್ ತಿಚಿ ಕವಿತಾ ಆಮಿ ಆಸಾ ತಶಿ ಛಾಪ್ಲ್ಯಾ. ಸುರ್‍ವೆರ್ ಮಾತ್ಶೆ ಕಷ್ಟ್ ಜಾತಲೆ, ತರೀ ಪಾಂಚ್ ಸ ಪಾವ್ಟಿಂ ವಾಚ್ಚೆಂ ಬರೆಂ ಮನ್, ಹುಮೆದ್ ತುಮಿ ದಾಕಯ್ಲಿ ತರ್ ಹಿ ಕವಿತಾ ತುಮ್ಚ್ಯಾ ಕಾಳ್ಜಾ ಮನಾಂತ್ ಘೊಂಟೆರ್ ಬಾಂಧುನ್ ಬಸ್ತಲಿ ತೆಂ ಖಂಡಿತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಅಶೀತ್ ಆಸಾ
ಜರ್ ತುಗೇಲ್ ಆಸರ್ ಮೆಳ್ಯಾರ್
ಆಜ್ ಹಾಂವ್ ಖಂಚಾನ್ ಖಯ್ ಪಾವ್‌ತಾಲೆ
ಜರ್ ಪಾವ್‌ಸಾಚ್ ವಾಸರ್ ಯೇನ್ ಜಾಲ್ಯಾರ್
ಕೆನ್ನಾ ತುಕ ಸೋಣ್ ಹಾಂವ್ ವಚನ್ ಜಾಲ್ಲೆ
ಎಕ್ ವಾದಳ್ ಆಯ್‌ಲೀ ಹಂಚಾನ್ ಖಂಚಾನ್
ತಿತುತ್ ಫಸಲೆ ಜೀವನ್ ಥಂಚಾನ್
ವಾದಳ್ ಆಯ್‌ಲೀ ಪರತ್ ಗೇಲೀ
ಉದಾ ಭಲ್ಲೆ, ಸುಕುನ್ ಗೆಲೆ
ಜೀವನ್ ಮಾತ್ರ ಆಸ್ತಶಿ ಉಲ್‌ನಾ
ಪೈಲೇಚಾ ಸಾರ್ಕಿ ಕೆನ್ನಾತ್ ಜಾಲ್ನಾ
ಆಸ್ಲೆ ಜಾಗ್ಯಾರ್ ಕೋಣ್ ಉಲ್‌ನಾ
ಪರತ ಕೋಣ್ ಕೊಣಾಕ್ ಮೆಳ್ನಾ
ಖೂಬ ಭಿಲೀ ಖೂಬ ರಡ್ಲಿ
ಲೊಕಾಲ್ ಸಾಂತವನ್ ಖೂಬ ಮೇಳ್ಳಿ
ಹಂಚಾನ್ ಥಂಚಾನ್ ಮೆಳ್‌ಚಾಕ್ ಆಯ್ಲೆ
ಅನುಕಂಪಾಚೆ ಹೊಡ್ ಲಿಸ್ಟತ್ ಜಾಲೆ
ಕಾಗತಾ ವೈಲಿ ಶ್ಯಾಯ್ ಹುಣ್ಣ್ ಗೇಲಿ
ರಾವ್ಲೆ ಕಡೇನ್ ಆಮೀ ಸುಕೂನ್ ಗೇಲಿ
ದಿವಸ್ ಗೆಲೆ ವರ್ಷ ಆಯ್ಲೆ
ಹಂಚೆ ಹಾಂಗಾ ತಶೀತ್ ಉಲ್ಲೆ
ಲೋಕ ಸಗ್ಲೆ ವಿಸನ್ ಗೆಲೆ
ಆಮೀ ಹಾಂಗಾ ರಡ್ತೋತ್ ಉಲ್ಲೆ
ಆವ್ಸ - ಬಾಪ್‌ಸುಲ್ಯಾ, ಧುವೆಲ್ - ಪುತಾಲ್ಯಾ
ಭಾವ್ - ಭೈಣಿಲ್ಯಾ, ಮೋಗಾಚಾ ಆನೀ...
ಕೊಣಾಲ್ಯಾ ಯಾದೀನ್
-ಸುವರ್ಣಾ ಗಾಡ್