ಸಂಪಾದಕೀಯ್:
ಪುತಾಚಿಂ ಸೊಧ್ನಾಂ ಕರ್‍ನ್ ಆಪ್ಣಾಕ್‌ಚ್ ವಿಣ್ಗೊ ಕರ್‍ನ್ ಘೆತ್‌ಲ್ಲೊ ಬಾಪಯ್
ಆಪ್ಣಾಚಿಂ ಭುರ್ಗಿಂ ಕೊಲೆಜಿಕ್ ವೆತಾತ್ ಸಾಂಗೊನ್ ನಿಜಾಯ್ಕಿ ಥಂಯ್ಸರ್ ಕಿತೆಂ ಶಿಕ್ತಾತ್ ತೆಂ ಚಡಾವತ್ ಆವಯ್-ಬಾಪಾಂಯ್ಕ್ ಕಳಿತ್ ಆಸನಾ. ಪುಣ್ ಹೆ ಕವಿತೆಂತ್ಲ್ಯಾ ಬಾಪಾಯ್ನ್ ತೆಂ ಸೊಧುನ್ ಕಾಡ್ಚೆಂ ಪ್ರೇತನ್ ಕೆಲಾಂ. ತಶೆಂ ಸೊಧ್ನಾಂ ಚಲಯ್ತಾನಾ ಆಪ್ಲ್ಯಾ ಪುತಾಚಿಂ ಹಣೆಬರ್ಪಾಂ ಉಗ್ತಾಡಾಕ್ ಪಡ್ತಾತ್ ಮಾತ್ರ್ ನ್ಹಯ್, ತಾಂತ್ಲ್ಯಾನ್ ತ್ಯಾ ಪುತಾಚ್ಯಾ ಬಾಪಾಯ್ಚೊ ಕಾಸಾಕ್ ಉಪ್ಕಾರಾಕ್ ಪಡನಾತ್‌ಲ್ಲೊ ಜಿನೊಸ್ ಹಿ ಕವಿತಾ ದಾಕಯ್ತಾ.
ಬೆನ್ನಾ ರುಜಾಯ್ ನಾಟಕ್‌ಕಾರ್ ಜಾವ್ನ್ ನಾಂವ್ ಕೆಲ್ಲೊ ವಸ್ತಾದ್. ಎಕಾ ತೆಂಪಾರ್ ನಾಟಕ್ ಬರವ್ನ್, ದಿಗ್ದರ್‍ಸುನ್, ನಟನ್ ಕರುನ್ ಮಾತ್ರ್ ನ್ಹಯ್ ನಾಟಕ್ ನಿರ್ಮಾಣ್ ಕರುನ್ ನಾಟಕ್ ಶೆತಾಂತ್ ಹುಮೆದ್ ತಾಣೆ ಭರ್‌ಲ್ಲಿ. ಕಲಾಕರಾಂಕ್ ಆಪ್ಲೆಪಣಾಚೆಂ ಮೊಲ್ ಜೊಡುನ್ ದೀವ್ನ್ ಆಪ್ಣಾಚೆ ಹಾತ್ ಹುಲ್ಪಾವ್ನ್ ಘೆತ್‌ಲ್ಲ್ಯಾ ಬೋವ್‌ಚ್ ಥೊಡ್ಯಾ ಕಲಾಕರಾಂಚೆ ವೊಳಿಂತ್ ತಾಚೆಂ ನಾಂವ್ ಶಾಮೀಲ್ ಜಾಲಾಂ.
ಆಜ್ ಪಯ್ಲೆ ಪಾವ್ಟಿಂ ಏಕ್ ಕವಿ ಜಾವ್ನ್ ಸದಾಂಕಾಳ್ 'ಕವಿತಾ ಕುಳಾರಾಂತ್' ರಾವೊಂಕ್ ತೊ ಆಯ್ಲಾ. ಕವಿತೆಚೊ ಹೊ ನವೊ ಸಂಸಾರ್ ತಾಕಾ ಸದಾಂಚ್ ಪೊಟ್ಲುನ್ ಧರುಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಜೊ ಪೂತ್ ಕೊಲೆಜಿಕ್ ವೆತಾ
ಮ್ಹಜೊ ಪೂತ್ ಕೊಲೆಜಿಕ್ ವೆತಾ
ಹಸ್ತಿಚ್ಯಾ ಪಾಂಯಾಂಚೆಂ ಪ್ಯಾಂಟ್ ಶಿರ್ಕಾವ್ನ್
ಬಣಾ ಬಣಾಚೆಂ ಶರ್ಟ್ ನ್ಹೆಸೊನ್
ದಾಂತೊಣಿ, ಪಾವ್ಡರ್, ಸ್ನೋ
ಆಪ್ಲ್ಯಾ ಬೊಲ್ಸಾಂತ್ ಚೆಪುನ್
ಲಿಸಾಂವಾಂಚೆ ಬೂಕ್ ಘರಾಚ್ ಸೊಡುನ್
ಮ್ಹಜೊ ಪೂತ್ ಕೊಲೆಜಿಕ್ ವೆತಾ....
ಕೊಲೆಜ್ ಪಾಂಚಾಂಕ್ ಸಂಪ್ತಾ
ಹೊ ರಾತಿಂ ಆಟಾಂಕ್ ಘರಾ ಯೆತಾ
ಆಯಿಲ್ಲೊಚ್ ಜೆವ್ತಾ
ಜೆವ್‌ಲ್ಲೊಚ್ ಶಿಕೊಂಕ್ ಆಸಾ ಮ್ಹಣ್
ಕುಡಾಚೆಂ ದಾರ್ ಬಂಧ್ ಕರ್‍ತಾ
ಕಿತೆಂ ಆಯ್ಕೊಂಚೆಂ, ಕಿತೆಂ ಸಾಂಗ್ಚೆಂ
ಮ್ಹಜೊ ಪೂತ್ ಕೊಲೆಜಿಕ್ ವೆತಾ....
ಪೋಯ್ರ್ ಹಾಂವ್ ಕೊಲೆಜಿ ಕುಶಿನ್ ಗೆಲ್ಲೊಂ
ಬುಧ್ವಂತ್ ಮ್ಹಜ್ಯಾ ಪುತಾನ್
ಬೊಲ್ಸಾಂತ್ಲೆಂ ಕಾಡ್ಲೆಂ ಆನಿ
ತೆಂಕ್ಲೆಂ ಆಪ್ಲ್ಯಾ ತೊಂಡಾಕ್
ಆಜೊ ತಾಚೊ ಬೆಬ್ದೊ
ಪಡೊನ್ ಮೆಲ್ಲೊ ತೊಡಾಕ್
ಸಾಂಗೊಂಕ್ ನ್ಹಯ್, ಭೊಗುಂಕ್ ನ್ಹಯ್
ಮ್ಹಜೊ ಪೂತ್ ಕೊಲೆಜಿಕ್ ವೆತಾ.....
ಕಾಲ್ ಸಾಂಜೆರ್ ಏಕ್ ಹಿಂಡ್ ಘರಾ ಆಯ್ಲೊ
ಫೆಸ್ತ್ ಪರಬ್ ರಜಾ ಮ್ಹಣೊನ್
ಗಮ್ಮತಾಂ ಮಾರುಂಕ್ ಲಾಗ್ಲೊ
ಮಾತ್ಯಾವಯ್ರ್ ವೊತುನ್ ಘೆವುನ್
'ಗುಡ್‌ಲಕ್ ಟುಮೋರೊ' ಮ್ಹಣೊನ್
ಮ್ಹಜ್ಯಾ ಪುತಾನ್ ಜೀಬ್ ಆಡ್ ಘಾಲ್ತಾನಾ
ಪಳೆಂವ್ಕ್ ನ್ಹಯ್ ಉಲಂವ್ಕ್ ನ್ಹಯ್
ಮ್ಹಜೊ ಪೂತ್ ಕೊಲೆಜಿಕ್ ವೆತಾ....
-ಬೆನ್ನಾ ರುಜಾಯ್