ಸಂಪಾದಕೀಯ್:
ಕೋಣ್ ಪಿಶೆ, ಕೋಣ್ ಬರೆ?
ಭಾಯ್ಲ್ಯಾ ಭಾಯ್ರ್ ಹಿ ಕವಿತಾ ಪಿಶ್ಯಾಂಚಿ ದಿಸೊಂಕ್ ಪುರೊ. ಪುಣ್ ಗುಂಡಾಯೆಕ್ ಗೆಲ್ಲ್ಯಾಬರಿ ಕಾಂಯ್ ಥೊಡೆಂ ಮನಾಶಾಸ್ತ್ರ್ ಹಿ ಕವಿತಾ ಉಸ್ತಿತಾ ತರ್, ಕಾಂಯ್ ಥೊಡೆಕಡೆ ಬರ್‍ಯಾ ಮನ್ಶಾಂನಿ ಭೋವ್ ಲ್ಹಾನ್ ಪ್ರಾಯೆರ್ ಹೊ ಸಂಸಾರ್ ಸಾಂಡುನ್ ವೆಚ್ಯಾ ಎಕೆ ಕರಾಳ್ ಸಂಗ್ತಿ ಖಾತೀರ್ ದೂಕ್ ಪಾವೊನ್ ಕವಿನ್ ದೆವಾಕ್‌ಚ್ ಬೋಟ್ ಜೊಕ್ಚೆಂ ಧೈರ್ ಝಳ್ಕತಾ. ನಿಮಾಣೆ ಕವಿತಾ ವಾಚುನ್ ಸಂಪ್ತಾನಾ, ನಿಜಾಯ್ಕಿ ಪಿಶೆ ಕೋಣ್ ಮ್ಹಳ್ಳ್ಯಾ ಸವಾಲಾಕ್ ಜಾಪ್ ಮೆಳನಾಸ್ತಾಂ ತುಂ ಚಡ್ಪಡ್ತಾಯ್.
ಲೊಯ್ಡ್ ರೇಗೊ, ಎಲ್ಯೆರ್ ತಾಕೊಡೆ ನಾಂವಾನ್ ಫಾಮಾದ್ ಕವಿ. ಪ್ರಾಯೆನ್ ಬೋವ್ ತರ್‍ನೊ ತರೀ, ಚಿಂತ್ಪಾನ್ ಜೂನ್; ಕಾರ್ಭಾರಾಂನಿ ವ್ಹಡ್ ಆನಿ ಕೊಂಕಣಿ ಪೆಳ್ಯಾಂತ್ಲೆಂ ಅಮೃತ್ ಗೋಡ್. ತಾಣೆ ಪಯ್ಲೆಚ್ ಪಾವ್ಟಿಂ ಹಾಂಗಾಸರ್ ಯೆಂವ್ಚೆಂ ನ್ಹಯ್. ಹ್ಯಾ ಆದೀಂಯ್ ತೊ ಕವಿತಾ ಕುಳಾರಾಕ್ ಪಾವ್ಲಾ.
ಲೊಯ್ಡ್ ರೇಗೊನ್ ಲ್ಹಾನ್ ಪ್ರಾಯೆರ್‌ಚ್ ಕವಿತಾ ಶೆತಾಂತ್ ಆನಿ ಸಂಗೀತ್ ಶೆತಾಂತ್ ಶಾಸ್ವಿತ್ ಉರ್‍ಚೆ ತಸಲಿಂ ಬಳಾಧಿಕ್ ಪಾವ್ಲಾಂ ರೊಂಬಯ್ಲ್ಯಾಂತ್. ಹೆಂ ಸತ್ ರುಜು ಕರ್‍ಚೆ ಖಾತೀರ್ ಆಯ್ಲೆವಾರ್ ತಾಚಿ 'ಜಾದೂ' ಕೊಂಕಣಿ ಸಂಗೀತ್ ಕೊವ್ಳೀಯ್ ನಿರ್ಮಾಣ್ ಜಾಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಬರೊ ದೇವ್
ತ್ಯಾ ಪಿಶ್ಯಾಂಚ್ಯಾ ಹೊಸ್ಪಿಟಲಾಂತ್
ಕೋಣ್ ಪಿಸೊ ಮ್ಹಣ್‌ಚ್ ಕಳನಾ
ಪಳೆತಲೆ,
ಪಳೆಂವ್ಕ್ ವೆಚೆ..
ರಡ್ತಲೆ,
ರಡೊಂಕ್ ವೆಚೆ..
ಹಾಸ್ತಲೆ,
ಹಾಸೊಂಕ್ ವೆಚೆ.
ಸಗ್ಳೆಯ್ ಪಿಶೆ!
ಪಿಶೆಂ ಆಸ್ಚೆಂ ತಕ್ಲೆಂತ್ ಖಂಯ್
ಕೋಣ್ ಮ್ಹಣ್ತಾ
ತಶೆಂ ಮ್ಹಣ್ತಲೊಚ್ ಪಿಸೊ!
ಪಿಶೆಂ ಆಸ್ಚೆಂ ದೊಳ್ಯಾಂನಿ...
ದೊಳೆ ಸಾರ್ಕೆ ಆಸ್ಲ್ಯಾರ್ ಸಗ್ಳೆಂ ಸಾರ್ಕೆಂ
ಸಗ್ಳೆ ಸಗ್ಳ್ಯಾಂಕ್ ಪಿಶೆ ದಿಸ್ತಾತ್
ಕೋಣ್ ಕೊಣಾಕ್‌ಚ್ ಪಿಸೊ ದಿಸನಾ!
ಹೆಂ ಪಿಶೆಂ
ಮನ್ಶಾಂಕ್‌ಚ್ ಕಿತ್ಯಾಕ್ ಲಾಗ್ತಾ?
ಛೆ...
ತೊ ಬರೊ ದೇವ್ ಏಕ್ ಪಾವ್ಟಿಂ
ಪಿಸೊ ಜಾಲ್ಲೊ ತರ್...
ಬರೊ ದೇವ್ ಬರ್‍ಯಾಂಕ್‌ಚ್ ವ್ಹರ್‍ತಾ
ಮ್ಹಣ್ತಲ್ಯಾಂಕ್
ರೂಪ್ ರೂಪ್‌ಶೆಂ ದಿಸ್ತೆಂ...
ವ್ಹಯ್....
ದೇವ್ ಪುಣೀ ಪಿಸೊ ಜಾಲ್ಲೊ ತರ್...
ಭೊಂವಾರ್ ವೆಗ್ಳೊಚ್ ಕರ್‍ತೊ
ತ್ಯಾ ಪಿಶೆಪಣಾಚೆಂ ಸುಖ್ ಭೊಗುನ್
ತೊ ಪಿಸೊ ಜಾವ್ನ್‌ಚ್ ಉರ್‍ತೊ!
ಪಿಶ್ಯಾಂಕ್ ವೆಗ್ಗಿಂ ವ್ಹರ್‍ತೊ..
ಬರ್‍ಯಾಂಕ್ ಹಾಂಗಾಚ್ ಸೊಡ್ತೊ!
-ಲೊಯ್ಡ್ ರೇಗೊ, ತಾಕೊಡೆ