ಸಂಪಾದಕೀಯ್:
ಮಾಯಾಗ್ ಜಾವ್ನ್ ವೆಚ್ಯಾ ಫಳಾಚೊ ಕವಿತೆದ್ವಾರಿಂ ಉಡಾಸ್
ಭಿಂಡಾಂಚೆ ಜಾತಿಚೆಂ ಪಾಳ್ಸೆಣ್ ಆಜ್ ನಪಯಿಂಚ್ ಜಾಲಾಂ. ತ್ಯಾ ಫಳಾಚಿ ವೊಳಕ್‌ಚ್ ಆಯ್ಚೆ ಪಿಳ್ಗೆಕ್ ನಾ ಜಾಲ್ಯಾ. ತಸಲೊ ಏಕ್ ನಪಯಿಂಚ್ ಜಾಲ್ಲೊ ಉಡಾಸ್ ಕವಿತೆದ್ವಾರಿಂ ಜಿವೆಂ ಕರ್‍ಚೆಂ ಪ್ರೇತನ್ ವಾಮಂಜೂರ್ ಧರ್ಮಗಿರಿಚೊ ಕವಿ ಡೇವಿಡ್ ಡಿ'ಸೊಜಾನ್ ಹಾಂಗಾಸರ್ ಕೆಲಾಂ. ಕವಿತೆದ್ವಾರಿಂ ಸಂಸೊಧಾಚೊ ವಾವ್ರ್ ಮ್ಹಣ್ಯಾಂ? ಕವಿತೆದ್ವಾರಿಂ ಆಳ್ವೊನ್ ವೆಚ್ಯಾ ಫಳಾಂ-ಫುಲಾಂಚೊ ಉಡಾಸ್ ಜಗವ್ನ್ ದವರ್‍ಚೊ ವಾವ್ರ್ ಮ್ಹಣ್ಯಾಂ?
ಡೇವಿಡ್ ಡಿ'ಸೋಜಾ ಪ್ರಕೃತೆಚೊ ಮೋಗ್ ಕರ್‌ಪಿ ಮನೀಸ್. ಪ್ರಕೃತೆಂತ್ ಏಕ್ ಜಾಲ್ಲ್ಯಾಂಕ್ ಅಸಲೆ ಉಡಾಸ್ ಸದಾಂಚೆ. ಅಸಲ್ಯೊ ಕವಿತಾ ಬರವ್ನ್ ಲೊಕಾಮಧೆಂ ಮಾಯ್‌ಗಾಂವ್ಚಿ ವೋಡ್ ಚಡಂವ್ಚೆಂ ಪ್ರೇತನ್ ತಾಚೆಂ ಹೆಂ ನವೆಂ. ಕವಿ ಸ್ವಾಮಿ ಸುಪ್ರಿಯಾನ್ ಅಸಲೊ ಏಕ್ ವಾವ್ರ್ ಸುರು ಕರುನ್ 'ಅಸ್ತಮ್ತೆರ್' ಕವಿತಾ ಸಂಗ್ರಹ್ ಪರ್ಗಟ್ ಕೆಲ್ಲೊ. ಶೆತ್ಕಾರಾಂ ಮಧೆಂ ವಾವುರ್‍ಚ್ಯಾ ಕವಿಕ್ ಅಸಲೊ ಏಕ್ ವಾವ್ರ್ ಮುಕಾರ್‍ಸುನ್ ವ್ಹರೊಂಕ್ ಜಾಯ್ತಿ ಹುಮೆದ್ ಆಸಾ.
ತಾಚ್ಯಾ ಸೊಧಾಂತ್ 'ಕರೆಜ್ಮಾಚಿ ವಾಲ್', 'ಆಂಕ್ವಾರ್ ಮರಿಯೆಚೊ ಕೇಸ್', 'ಸಾಂ. ಜುಜೆಚಿ ಬೆತ್ಕಾಟಿ', 'ಸಾಂತ್ ಆಂತೊನಿಚೊ ರೂಕ್', 'ಖುರ್‍ಸಾ ರೂಕ್', 'ಕಾಂಟೆ ಕುಂವರ್' - ಅಶೆಂ ಧರ್ಮಿಕ್ ನಾಂವಾಂ ಆಸ್ಲಲೆ ಜಾಯ್ತೆ ರೂಕ್ ಆನಿ ಝಾಡಾಂ ಶಿರ್‍ಕಲ್ಯಾಂತ್. ಪುಣ್ ತುಮ್ಕಾಂ ತಾಚಿ ವೊಳಕ್ ಕರಿಜೆ ಜಾಲ್ಯಾರ್ ಕವಿತಾ ಮಾತ್ರ್ ಪಾವನಾ, ತಸ್ವೀರ್ ಜಾಯ್ ಪಡ್ತಾ. ಕೊಣ್ ತರೀ ಡೇವಿಡಾಕ್ ಏಕ್ ಡಿಜಿಟಲ್ ಕೆಮರಾ ದೀತ್ ಜಾಲ್ಯಾರ್ ಹ್ಯಾ ತಾಚ್ಯಾ ವಾವ್ರಾಕ್ ಖರೊ ಅರ್ಥ್ ಲಾಭ್‌ಲ್ಲ್ಯಾಬರಿ ಜಾಯ್ತ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಫಾಸಾಳ್ಳಲೆಂ ಪಾಳ್ಸೆಣ್
ಹೆ ಕುಡ್ಕೆ ಫಾಸಾಳ್ಳೆಲ್ಯಾ
ಪಾಳ್ಸೆಣಾಚೆ.....
ಪೊಳೆಲ್‌ಚ್ಯಾ ಆವ್ಯಾ ಮಾತ್ಯೆನ್
ಕುಂಬಾರಾಚ್ಯಾ ಘಾಮಾ ಥೆಂಬ್ಯಾಂ ಸಂಗಿಂ
ಕಾದ್ರ್ಯಾಚ್ಯಾ, ಹುರ್‍ಯಾಚ್ಯಾ, ಕಂರ್ಬಾರಾಚ್ಯಾ ಆನಿ ಬಿಬ್ಯಾಚ್ಯಾ
ಲಾಂಕ್ಡಾಂ ಮಧೆಂ ಭಾಜೊನ್ ಶಿಜೊನ್ ಆಯ್ತೆಂ ಜಾಲ್ಲೆಂ
ಶೆಕ್ಡ್ಯಾಂ ಆದಿಂ, ಧಾಕ್ಡ್ಯಾಂ ಆದಿಂ ಶೆತ್ಕಾರ್‍ಯಾಂಚ್ಯಾ ಆಂಗ್ಣಾ ದೆಗೆನ್
ಭರ್ಮಾನ್ ಉಬೆಂ, ತಾಳ್ನೆಂ ಭರೊನ್
ರೆಡ್ಯಾ ಗೊರ್‍ವಾಂ ವಾಸ್ರಾಂಚಿ ತಾನ್ ಭುಕ್ ಥಾಂಬಯ್ಲೆಲೆಂ
ಬಂಧಡೆಚ್ಯಾ ಕಾಟ್ಕಾಯೆ ವೆಳಾ
ಬಾಳ್ಶಾಂ ಭುರ್ಗ್ಯಾಂಕ್ ಆಸ್ರೊ ಜಾಲೆಂ
ಗಾಂವ್ಚ್ಯಾ ಮ್ಹಾರಾಂ ಕೊರ್ಗ್ಯಾಂಕ್
ಥಳಾಂತ್ ಜಮ್ಲಲೆಂ ಶಿತ್ ಖಾವಯಿಲ್ಲೆಂ
ಆಜ್ ಪಾಳ್ಸೆಣ್ ಅತ್ವೆಂಚ್ ಜಾಲಾಂ
ಯಾದಿ ತಾಚ್ಯೊ ಲಿಪೊನ್ ಗೆಲ್ಯಾತ್
ಶಿಂಪಡ್ಲಲೆ ಕಯ್ಲಾ ಕುಡ್ಕೆ ಮೊನೆ ಜಾಲ್ಯಾತ್
-ಡೇವಿಡ್ ಡಿ'ಸೋಜಾ, ಧರ್ಮಗಿರಿ