ಸಂಪಾದಕೀಯ್:
ಚಂಚಲ್ ಚಿಂತ್ನಾಂ ಆನಿ ಮೊರೇಲಿಟಿ
ತರ್ನಾಟ್‍ಪಣಾರ್ ಅಸಲಿಂ ಚಂಚಲ್ ಚಿಂತ್ನಾಂ ಯೆಂವ್ಚಿಂ ಸಹಜ್. ಪುಣ್ ’ಮೊರೇಲಿಟಿ’ ಗಳ್ಯಾಲಾಗಿಂ ಕಾಸುಳೊ ಖೊರ್ಜುಲ್ಲ್ಯಾಬರಿ ಖೊರ್ಜುತಾನಾ, ಕಿತೇಂಯ್ ತೊಂಡಾಂಕ್ ವ್ಹರ್‍ಚ್ಯಾ ಪಯ್ಲೆಂ ತುಂ ಹಜಾರ್ ಚಿಂತಾಯ್. ಎಕ್ಯೆ ವಾಟೆನ್ ಸಾಲ್ವಾರ್ ಜಾತಾಯ್. ಆನ್ಯೇಕೆ ವಾಟೆನ್ ಆವ್ಕಾಸ್ ಹೊಗ್ಡಾಯ್ತಾಯ್. ಖಂಯ್ಚೆಂ ಬರೆಂ, ಖಂಯ್ಚೆಂ ವಾಯ್ಟ್ ಸಾಂಗುಂಕ್ ಹಾಂವ್ ಕೊಣ್? ತುಜೆಂಚ್ ಅಂತಸ್ಕರ್ನ್ ತುಜೊ ರಾಕಣ್‌ದಾರ್.
ಸ್ಟೀಫನ್ ಮಿನೇಜಸ್ ಪಯ್ಲೆ ಪಾವ್ಟಿಂ ಕವಿತಾ ಕುಳಾರಾಕ್ ಆಯ್ಲಾ. ಹಾಂಗಾಸರ್ ತಾಚಿ ಪಯ್ಲಿ ಕವಿತಾ ಪರ್ಗಟ್ ಕೆಲ್ಯಾ ಮ್ಹಣುನ್ ತೊ ’ಕವಿ’ ಜಾಲೊ ಮ್ಹಳ್ಳೊ ಅರ್ಥ್ ನ್ಹಯ್. ಏಕ್ ಪಾವ್ಟಿಂ ಕಾವ್ಯಶೆತಾಕ್ ರಿಗ್ಚೆಂ ಮ್ಹಳ್ಯಾರ್ ದರ್ಯಾಕ್ ಉಡಲ್ಲ್ಯಾಬರಿ. ಉಪ್ಯೆಂವ್ಕ್ ಕಳಿತ್ ನಾತಲ್ಲ್ಯಾಂನೀಂಯ್ ಉಪ್ಯೆಂವ್ಕ್ ಶಿಕ್ಚೆಂ ಪಡ್ತಾ. ಸ್ಟೀಫನ್ ಶಿಕ್ತಲೊ, ಶಿಕುಂದಿ ಮ್ಹಣುನ್ ಆಮಿ ಆಶೆತಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ತುಕಾ ಖಂಯ್ ದೆಂವುಂಕ್?
ಎಕ್ಸುರ್ಪಣ್ ಭೊಗ್ತಾ ಮ್ಹಾಕಾ, ಕಿತೆಂ ಕರುಂ ಹಾಂವ್?
ಜಾಲ್ಲೆಬರಿ ಜಾತಾ, ಹಾಂವ್ ಆಜ್ ಏಕ್ ಚೂಕ್ ಕರ್‍ತಾಂ
ಆಂಗಾಂತ್ ಚಿರ್ಪುಟ್ ಮಾರಲ್ಲೆಬರಿ ಜಾತಾ
ಮತಿಂತ್ ಭಾತ್ ಕಾಂಡಲ್ಲ್ಯಾಬರಿ ಜಾತಾ
ವಸ್ತುರಾ ಗಾಂಚ್ ತುಟ್ಚ್ಯಾ ಹುಂಬ್ರಾರ್ ಆಸಾ
ಚಂಚಲ್ ಮನಾನ್ ಮೆಟಾಂ ಕಾಡ್ಲಿಂ
ಸಾಯ್ಬಾ ಸಾಲ್ವದೊರಾ, ಹೆಂ ಕಿತೆಂ ಪಳಯ್ತಾಂ ?
ಥರಾವಳ್ ಆಸಾತ್, ಹೊಟೆಲಾಂತ್ ಮೆನು ಆಸಲ್ಲ್ಯಾಬರಿ
ವಾಂಟೆ ಕರ್‍ತಾತ್, ಮಾಸ್ಳಿ ಮೊಲಾಯಿಲ್ಲ್ಯಾಬರಿ
ಕಾಳಿಂ ದುಬ್ಳ್ಯಾಂಕ್ ಆನಿ ಗೊರಿಂ ಗ್ರೇಸ್ತಾಂಕ್
ಥೊಡಿಂ ಆಸಾತ್ ಸುಕ್ಯಾ ತಾಟ್ಯಾಬರಿ
ಪಾಖ್ಯಾನ್ ಚಿಂವುನ್ ಉಡಯಿಲ್ಲೆ ಕಾಜುಬರಿ
ಆನಿ ಥೊಡ್ಯೊ ಕಾಯ್ಲೆರ್ ಕರ್ಪಲ್ಲ್ಯೊ ಲೆಪೊ
ಥೊಡಿಂ ಭಿಕ್ಣಾಂ ನಾತಲ್ಲ್ಯಾ ಪೊಕಳ್ ಪಣ್ಸಾಬರಿ
ಆನಿ ಥೊಡಿಂ ಗುಜ್ಯಾಕ್ ಭರ್‍ಶಿಕ್
ಕುಶಿನ್ ಆಸಲ್ಲ್ಯಾ ಚೆಡ್ವಾಚ್ಯಾ ಹರ್ದ್ಯಾರ್ ಬ್ಯಾಟಿಂಗ್ ಕ್ರೀಸ್
ತಾಂತುಂ ಚಿರ್ಡುನ್ ಆಸಾ ಎಕಾ ಇಂಚಾಚೊ ಖುರಿಸ್
ಖುರ್ಸಾಕ್ ತಕ್ಲಿ ಬಾಗಾಯ್ಲಿ
ಮನ್ ಕೆಲೆಂ, ಗಾಡಿಯೆರ್ ಬಸಯ್ಲೆಂ
ಕಿತೆಂ ಸಾಂಗ್ಚೆಂ ಚೆಡುಂ ಆಮ್ಚ್ಯಾಚ್ ಗಾಂವ್ಚೆಂ
ಅವಯ್ ನಾತಲ್ಲೆಂ ತಾಚೆಂ ಜಿಣೆಂ
ರಾವುಂಕ್ ಘರ್ ನಾ ಖಂಯ್, ಶಿಕುಂಕ್ ಪಯ್ಶೆ ನಾಂತ್ ಖಂಯ್
ಭಯ್ಣಿಕ್ ಕಾಜಾರ್ ಖಂಯ್, ಬಾವಾಕ್ ಕ್ಯಾನ್ಸರ್ ಖಂಯ್
ಬಾಪಾಯ್ಕ್ ಪಿಯೆವ್ನ್ ಸಂಸಾರ್ ನಾ ಖಂಯ್
ಕಾಮಾಕ್ ಲಾಯ್ತಾಂ ಮ್ಹಣುನ್ ಫಸಯ್ಲೆಂ ಖಂಯ್
ಮ್ಹಜ್ಯಾ ಕಾಳ್ಜಾ ಮನಾಂತ್ ಶಿರಾಂಧಾರಿಂಚೊ ಪಾವ್ಸ್
ಬೊಲ್ಸಾಂತ್ ಘಾಲುನ್ ಮೂಟ್
ಕಾಡ್ಲೆ ಹಾಂವೆಂ ನೋಟ್
ಆನಿ ಮ್ಹಳೆಂ
ತುಕಾ ಖಂಯ್ ದೆಂವುಂಕ್?
-ಸ್ಟೀಫನ್ ವಾಮಂಜೂರ್