ಸಂಪಾದಕೀಯ್:
ಏಕ್ ಘಡಿತ್ ಧಾಂಪುಂಕ್ ಆಖ್ಖ್ಯಾ ಸಂಸಾರಾರ್ ವೋಲ್ ವೊಡ್ಚಿ ನಾಕಾ
ಆಸ್ಡ್ಯಾಂಚೆಂ ಕಾಮ್ ದೊಳ್ಯಾಂಚೆಂ ಸಂರಕ್ಷಣ್. ಪುಣ್ ಆಸ್ಡ್ಯೊ ಧಾಂಪ್ಲ್ಯೊ ಮ್ಹಳ್ಯಾರ್ ದೊಳ್ಯಾಂಕ್ ದಿಸಜಾಯ್ ಜಾಲ್ಲೆಂ ದಿಸನಾ ಜಾತಾ. ಜಿವಿತಾಂತ್ ಆಯಿಲ್ಲ್ಯಾ ಸಂಘರ್ಶಾಂಕ್ ಜಾಂವ್ಚೆ ತೆ ಘಾಯ್ ಸಹಜ್ಪಣಿಂ ಗೂಣ್ ಜಾಂವ್ದಿತ್ ಮ್ಹಳ್ಳಿ ಆಶಾ ಆಸಾ ತರೀ, ತ್ಯಾ ಘಾಯಾಂ ನಿಮ್ತಿಂ ಕಾಂಯ್ ಥೊಡೆ ಪಾವ್ಟಿಂ ವಾಟ್ಲಿ ಖಾಲಿ ಜಾತಾ, ಕಾಂಯ್ ಥೊಡೆ ಪಾವ್ಟಿಂ ವಿಣ್ಗೊ ಜಾತಾನಾ, ದೊಳೆ ಕಿತ್ಯಾಕ್ ಧಾಂಪುನ್ ವೆತಾತ್ ಕಳನಾ. ತಿತ್ಲೇಂಯ್ ಕಿತ್ಯಾಕ್ ಭ್ಯೆಂ ಹೆಂ? ಹ್ಯಾ ಜಿವಿತಾಂತ್ಲ್ಯಾ ಸಂಘರ್ಶಾಂಕ್ ದೊಳೆ ಕಿತ್ಯಾಕ್ ಧಾಂಪುಂಕ್ ಜಾಯ್? ಕಾಳೊಕಾಂತ್ ನಾಗ್ಡೊ ಜಾಲ್ಲ್ಯಾರ್ ಕೊಣಾಕ್ ಕಿತೆಂ ಝಳ್ಕತ್? ಕಿತ್ಯಾಕ್ ಲಜ್?
ಜಿವಿತಾಂತ್ಲ್ಯಾ ಲ್ಹಾನ್ ಸಾನ್ ಸಂಘರ್ಶಾಂನಿ ಝರ್‍ಕಟುನ್ ವೆಚ್ಯಾಂಕ್ ಧೈರಾನ್ ಭರ್‍ಚಿ ಸಕತ್ ಹಿ ಕವಿತಾ ದಿತಾ. ಆಸ್ಡ್ಯಾಂನಿ ಸಂರಕ್ಷಣ್ ದಿಂವ್ಚೆಂ ಕಾಮ್ ಕರಿಜಾಯ್ ಸೊಡ್ಲ್ಯಾರ್ ಜಿವಿತಾಂತ್ ಕಾಳೊಕ್ ಪಸ್ರಾಂವ್ಚೆಂ ಕಾಮ್ ಕರ್‍ಚೆಂ ನ್ಹಯ್. ಏಕ್ ಘಡಿತ್ ಧಾಂಪುನ್ ವ್ಹರುಂಕ್ ಆಖ್ಖ್ಯಾ ಸಂಸಾರಾಚೆರ್ ಕಾಳೊಕಾಚಿ ವೋಲ್ ವೊಡ್ಚಿ ನ್ಹಯ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಸ್ಡ್ಯೊ
ಶಿಜುನ್ ಆಯ್ಲಲ್ಯಾ
ಮ್ಹಜ್ಯೆ ಜಿಣ್ಯೆಕ್
ಥೊಡೇಶೆ
ಗುಪೀತ್ ಅರ್ಥ್
ಝಳ್ಕಲ್ಯಾತ್!
ಹರ್ಯೆಕ್ಯೆ ಘುಂವ್ಡೆರ್
ಸಂಘರ್ಷಚ್
ಕಳಿತ್ ಆಸಾ,
ಮಾಂದ್ತಾಂ.
ಜಿವೊ ಘಾಯ್
ವೊತಾಂತ್ ತಾಪೊವ್ನ್
ಗೂಣ್ ಕರ್‍ಚೊ ನಾಕಾ,
ಘಾಯ್ ಆಸ್ಲ್ಯ್ಯಾರ್
ಗೂಣ್ ಜಾಂವ್ದಿ ಸಹಜ್....
ಹಾತ್‌ಭರ್ ಭರ್‍ಲಲಿ
ಜಿಣಿ
ಬೊಟಾಂ ಮಧ್ಲ್ಯಾನ್
ನಿಸ್ರುನ್
ಘಡಿಯೆನ್ ಬಶಿ
ಖಾಲಿ ಜಾತಾಸ್ತಾನಾ...
ಕಾಳೊಕಾಂತೀಯ್
ನಾಗ್ಡೊ ಜಾತಾಸ್ತಾನಾ..
ಲಜೆಂವ್ಚ್ಯಾ
ಮನಾಕ್
ಕಿತ್ಲ್ಯೊ ಪೂರಾ ಆಸ್ಡ್ಯೊ...?
- ಉರ್ಬಾನ್ ಡಿಸೋಜಾ, ಮೂಡಬಿದ್ರಿ
संपादकीय:
एक घडीत धांपुंक आख्ख्या संसारार वोल वोडची नाका
आस्ड्यांचें काम दोळ्यांचें संरक्षण. पूण आस्ड्यो धांपल्यो म्हळ्यार दोळ्यांक दिसजाय जाल्लें दिसना जाता. जिवितांत आयिल्ल्या संघर्शांक जांवचे ते घाय सहजपणीं गूण जांवदीत म्हळ्ळी आशा आसा तरी, त्या घायां निमतीं कांय थोडे पावटीं वाटली खाली जाता, कांय थोडे पावटीं विणगो जाताना, दोळे कित्याक धांपून वेतात कळना. तितलेंय कित्याक भ्यें हें? ह्या जिवितांतल्या संघर्शांक दोळे कित्याक धांपुंक जाय? काळोकांत नागडो जाल्यार कोणाक कितें झळकत? कित्याक लज?
जिवितांतल्या ल्हान सान संघर्शांनी झरकटून वेच्यांक धैरान भरची सकत ही कविता दिता. आस्ड्यांनी संरक्षण दिंवचें काम करिजाय सोडल्यार जिवितांत काळोक पस्रांवचें काम करचें न्हय. एक घडीत धांपून व्हरुंक आख्ख्या संसाराचेर काळोकाची वोल वोडची न्हय.
-मेल्विन रोड्रिगस
कविता:
आस्ड्यो
शिजून आयलल्या
म्हज्ये जिण्येक
थोडेशे
गुपीत अर्थ
झळकल्यात!
हऱ्येक्ये घुंवडेर
संघर्शच
कळीत आसा,
मांदतां.
जिवो घाय
वोतांत तापोवन
गूण करचो नाका,
घाय आसल्य्यार
गूण जांवदी सहज....
हातभर भरलली
जिणी
बोटां मधल्यान
निस्रून
घडियेन बशी
खाली जातासताना...
काळोकांतीय
नागडो जातासताना..
लजेंवच्या
मनाक
कितल्यो पूरा आस्ड्यो...?
- उरबान डिसोजा, मूडबिद्री