ಸಂಪಾದಕೀಯ್:
ಥಕ್‌ಲ್ಲ್ಯಾ ಕಾಳ್ಜಾಂಚೆರ್ ದಾಧೊಸ್ಕಾಯೆಚಿಂ ಆಲ್ಪುಲಿಂ ನಿದೊಂಕ್ ಯೆತಾತ್!
ಕವಿ ಜಾಲ್ಲ್ಯಾಂನಿ ಅಸಾಧ್ಯತೆವಿಶಿಂ ತಕ್ಲಿ ಖಿರಯಿಲ್ಲ್ಯಾಂತ್ ಪಿಶೆಪಣಾಂ ಪಾಂಗರ್‌ಲ್ಲ್ಯಾಬರಿ ಜಾಯ್ನಾಂತ್. ಕಾಂಯ್ ಥೊಡ್ಯಾಂಕ್ ಹಿಂ ಪಿಶೆಪಣಾಂ ಭೊಗ್ತಿತ್; ಪುಣ್ ತಾಂತ್ಲ್ಯಾನ್ ಮಾತಿ ಖೆಲ್ಲ್ಯಾ ಮೆಂದ್ವಾಕ್ ಸಾಣ್ಯಾಕ್ ಧರುನ್ ಝಳ್ಝಳಿತ್ ಕರ್‍ಚೆಂ ಪ್ರೇತನ್ ಆಸಾ ಸೊಡ್ಲ್ಯಾರ್ ದುಸ್ರೆಂ ಕಿತೇಂಯ್ ಆಸಾಜಾಯ್ ಮ್ಹಣ್ ನಾ! ಆಸಾಜಾಯ್ ಮ್ಹಣ್ ಚಿಂತ್ಚೆಂಚ್ ಪಿಶೆಪಣ್! ಅಸಲ್ಯಾಚ್ ಥಳಾಚೆರ್ ಹಾಂಗಾಸರ್ ಸಾದರ್ ಜಾಲ್ಲಿ ಕವಿತಾ ಉಬಾರ್‍ಲ್ಯಾ.
ವಾಚುನ್ ಮುಗ್ದತಾನಾ ಥಕ್‌ಲ್ಲ್ಯಾ ಕಾಳ್ಜಾಂಚೆರ್ ದಾಧೊಸ್ಕಾಯೆಚಿಂ ಆಲ್ಪುಲಿಂ ನಿದೊಂಕ್ ಆಯಿಲ್ಲ್ಯಾಬರಿ ಭೊಗ್ತಾ. ಕವಿ ಜಾಲ್ಲ್ಯಾಂನಿ ಹೆಂಚ್ ಕರಿಜಾಯ್! ಲೀನಸ್ ಮೊರಾಸಾನ್‌ಯ್ ಹೆಂಚ್ ಕೆಲಾಂ. ತಾಣೆ ಪಯ್ಲೆಪಾವ್ಟಿಂ ಕವಿತಾ ಬರಂವ್ಚೆಂ ಧೈರ್ ಘೆತ್ಲಾಂ; ಹ್ಯಾ ಪ್ರೇತನಾಂತ್ ಸಂಪೂರ್ಣ್ ನ್ಹಯ್ ತರೀ ಜಾಯ್ತಿ ಯೆಶಸ್ವಿ ತಾಣೆ ಜೊಡ್ಲ್ಯಾ. ಮಾಗೀರ್ ಕೊಣ್‌ಯ್ ಜಲ್ಮತಾನಾ ಸಗ್ಳೆಂ ಗಿನ್ಯಾನ್ ಜೊಡುನ್ ಯೆತಾತ್ ಕಾಂಯ್?
'ಕವಿತಾ'ಚೊ ಶೆವೊಟ್‌ಯ್ ತೊಚ್. ನವ್ಯಾಂಕ್ ಕವಿತಾ ಬರಂವ್ಕ್ ಗರ್ಜ್ ಆಸ್ಚೊ ಏಕ್ ಭೊಂವಾರ್ ತಯಾರ್ ಕರ್‍ಚೊ! ಕೊಣ್ ಹ್ಯಾ ಭೊಂವಾರಾಂತ್ ತಾಂಚೆಂ ಠಿಕಾಣೆಂ ಬಾಂಧುಂಕ್ ಯೆತಾತ್, ತಾಂಕಾಂ ಪೊಟ್ಲುನ್ ಧರ್‍ಚೆಂ ಬರೆಂ ಮನ್ ಆಮ್ಚೆಲಾಗಿಂ ಆಸಾ! ಕಿತ್ಯಾಕ್ ಭಿಂಯೆತಾತ್? ಭಿತರ್ ಯೆಯಾ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸರ್ಗ್ ನರ್ಕಾಚೊ ಸಂಪರ್ಕ್
ಗಾಂವ್ಚಿಂ ಪರ್ದೆಶಿ ಪತ್ರಾಂ ವಾಚ್ಲಿಂ
ಖಬ್ರೊ ಜಾಯ್ತ್ಯೊ ಆಯ್ಕಲ್ಯೊ
ಟಿವಿ ಚ್ಯಾನೆಲಾಂ ಧಾರಾಳ್ ಪೊಯ್ಲಿಂ
ಅಂತರ್ ಜಾಳಿ ಚೊಯ್ಲ್ಯೊ
ಸುರ್ಯೊ ಚಂದಿರ್ ತಾರಾಂ ಮೆಜ್ಲಿಂ
ಅಂತ್ರಳ್ ಘರಾಂ ಮೊಡ್ಲಿಂ
ಸರ್ಗ್ ಯೆಮ್ಕೊಂಡ್ ಮ್ಹಾಕಾ ಮೆಳ್ನಾ
ತಕ್ಲೆಂತ್ ಸವಾಲಾಂ ವಾಡ್ಲಿಂ
ಪರ್‍ನ್ಯಾ ಸೊಲ್ಲ್ಯಾಂತ್ ಜಾಲ್ಲೊ ಸರ್ಗ್
ಝುಜ್ ಆಂಜಾಂ ಮಧ್ಲೆಂ
ಎಕಾ ಖಿಣಾನ್ ಜಾಲ್ಲೆಂ ಯೆಮ್ಕೊಂಡ್
ಉಡಾಸಾಂತ್ ಹಾಡ್ಲೆಂ
ಕ್ರೀಸ್ತ್ ಸೊಮಿ ಸಂಸ್ರಾಕ್ ಆಯ್ಲೊ
ಖುರ್‍ಸಾರ್ ಪ್ರಾಣ್ ಸೊಡ್ಲೊ
ಜೀವಂತ್ ಜಾವ್ನ್ ಚಾಳೀಸ್ ದಿಸಾಂನಿ
ಸರ್ಗಾಕ್ ತೊ ಉಬ್ಲೊ
ಗಾಂವಾಂ ಮಧೆಂ ಜಾತಾತ್ ಝುಜಾಂ
ಪಾಡಾವ್ ಜಾಲ್ಲೆಂ ಖಂಯ್ ವೆತಾತ್?
ಕಾಂಯ್ ಆಮ್ಕಾಂ ಕಳಿತ್ ನಾಸ್ತಾಂ
ಸರ್ಗ್ ನರ್ಕಾಂತ್ ಝುಜ್ತಾತ್?
ಸರ್ಗ್ ಆನಿ ಪುಲ್ಗತ್ರೆ ಮಧೆಂ
ವಾಹನ್ ಸಂಪರ್ಕ್ ಜಾಲಾ?
ಮಿಂಗೆಲ್ ತಶೆಂ ಲುಸಿಫೆರಾನ್
ಹುದ್ದೊ ಬದ್ಲಿ ಕೆಲಾ?
ರೊಕೆಟಾಂಚೆರ್ ಅಂತ್ರಳ್ ಘರಾಂಕ್
ಆಮ್ಚೆ ವಿಜ್ಞಾನಿ ಪಾವ್ತಾತ್
ಸರ್ಗ್ ನರ್ಕಾಕ್ ವಚೊಂಕ್ ತಾಂಕಾಂ
ಕೊಣ್ ಹಾಬಾ ಆಡಾಯ್ತಾತ್?
ಜಾಲ್ಯಾರ್ ಸಂಪರ್ಕ್ ಸರ್ಗ್ ಸಂಸ್ರಾಕ್
ಭೊಂವುನ್ ವಚೊನ್ ಯೆವ್ಯೆತ್
ಮೆಲ್ಲ್ಯಾ ಆಮ್ಚ್ಯಾ ಮೊಗಾಳ್ ಮನ್ಶಾಂಕ್
ಘಡಿ ತರೀ ಮೆಳ್ಯೆತ್!
ತಿತ್ಲೇಂಯ್ ಜಾಯ್ನಾ, ಮೊಬಾಯ್ಲಾಂಚೆರ್
ಉಲಂವ್ಕ್ ಆವ್ಕಾಸ್ ಮೆಳೊಂ
ಸರ್ಗ್ ನರ್ಕಾಂತ್ ಆಸ್ಚ್ಯಾ ಮನ್ಶಾಂಕ್
'ದಾಯ್ಜಿವರ್ಲ್ಡ್' ತರೀ ಮೆಳೊಂ!
-ಲೀನಸ್ ಮೊರಾಸ್