ಸಂಪಾದಕೀಯ್:
ಕವಿತಾ ಕುಳಾರಾಂತ್ ವಸಂತ್ ಕಾಳ್ ಆಯ್ಲಾ!
ಜಿವಿತಾಂತ್ ವಸಂತ್‌ಕಾಳ್ ಕೆದಳಾಯ್ ಯೇನಾ. ಪುಣ್ ತಸಲೊ ಕಾಳ್ ಏಕ್ ಯೆತಾನಾ ನವಿ ಕನ್ನಿಕಾ ಆಯಿಲ್ಲ್ಯಾಬರಿ ಯೆತಾ. ತವಳ್ ದುಕಾಂಚ್ಯಾ ಥೆಂಬ್ಯಾಂನಿ ಸಂತೊಸಾಚಿಂ ಮೊತಿಯಾಂ ಫುಲ್ತಾತ್; ಸಪ್ಣಾಂತ್ಲ್ಯಾ ಸಪ್ಣಾಂನಿ ಸಯ್ತ್ ದಾಧೊಸ್ಕಾಯೆಚೊ ನಾಚ್ ಚಲ್ತಾ. ತವಳ್ ಆಪಡ್‌ಲ್ಲೆಂ ಸೊನೆಂ ಜಾತಾ. ದುಸ್ಮಾನಾಚೆಂ ಖಂಯ್ಚೇಂಯ್ ಕಠಿಣ್ ಹಾತೆರ್ ಲೆಗುನ್ ಮೊನೆಂ ಜಾತಾ.
ತಾರಾನಾಥ ನಾಯಕ್ ಭೋವ್ ಸೊಭಿತ್ ಸುಂದರ್ ಕವಿತಾ ಘೆವ್ನ್ ಹಾಂಗಾ ಆಯ್ಲಾ. ನಿರಾಶಾವಾದಾಂತ್ ಬುಡ್‌ಲ್ಲ್ಯಾ ಮನ್ಶಾಕುಳಾಕ್ ಆಶೆಚೆಂ ಕಿರಣ್ ಕಶೆಂ ಹಿ ಕವಿತಾ ಸಾದರ್ ಜಾಲ್ಯಾ.
ವೆವೆಗ್ಳೆ ಬೋಲಿಂಚ್ಯೊ ಕವಿತಾ ದಿಂವ್ಚೆಂ ಪ್ರೇತನ್ ಆಮಿ ಜೆಂ ಸುರು ಕೆಲಾಂ ತೆಂ ಸದಾಂಚ್ ಚಾಲು ಉರ್‍ತಲೆಂ. ಗೊಂಯ್ಚಿ, ಕಾರ್‌ವಾರ್‍ಚಿ, ಕೊಚ್ಚಿನ್‌ಚಿ, ಹಿಂದ್ವಾಂಚಿ, ನಾಯ್ತಿ -ಅಶೆಂ ಹರ್‍ಯೆಕ್ ಬೋಲಿಂಚಿ ಝಳಕ್ ಕಿರಿಸ್ತಾಂವಾಂಚೆ ಬೋಲಿ ಸಂಗಿಂ ತುಮ್ಕಾಂ ದೀಂವ್ಕ್ ಆಮಿ ಪೆಚಾಡ್ತಲ್ಯಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ನವೀ ಕನ್ನಿಕಾ
ಜೀವನಾಚ್ಯಾ ಹಿಂತ್ಲಾರಿ
ಜೋಯಿ ಕಾಡ್ಚ್ಯಾ ವೇಳ್ಯಾರಿ
ಲಜ್ಜೆನ್ ವೈಯಾರಾರಿ
ನವಿ ಕನ್ನಿಕಾ ಬಸ್ಲ್ಯಾರಿ
ಸಂತೋಷು ಮನಾಂತು ಜಾಲ್ಲಾ
ಅಂಗಾಂತು ಯೌವನ ಭರ್‍ಲಾ
ಭಾವ ಸಂಗಮಾಚೊ ವಾಟ್ ತಿ ರಾಕ್ಲ್ಯಾ
ನಾಟ್ಯಾಚಿ ಮಯೂರಿ ಜಾಲ್ಯಾ
ಸ್ವಪ್ನಾಂತು ಹೆಜ್ಜೆ ಘಾಲ್ತಾ
ಸುಮಧುರ ಸಂಗೀತ ಸಾಂಗ್ತಾ
ರಾಗ ತರಂಗಾಚೊ ನಾದು ತೀ ಐಕತಾ
ಮನಾಂತುಲೆ ದುಃಖ ವಿಸರ್‍ತಾ
ತೊಂಡಾರಿ ಮಂದ ಹಾಸು
ಮನಾಂತು ತೋ ಯೇಕು ಧ್ಯಾಸು
ಜೀವನ ಮ್ಹೊಣ್ಚೆ ಬಂಧನಾಂತು
ಆಯ್ಲಾ ತೋ ವಸಂತ ಮಾಸು
- ಬಿ. ತಾರಾನಾಥ ನಾಯಕ್, ಕುಕ್ಕಿಕಟ್ಟೆ - ಉಡುಪಿ