ಸಂಪಾದಕೀಯ್:
ಮೋಗ್ ಮ್ಹಳ್ಯಾರ್ ಸಪ್ಣಾಂಚೊ ಸಂಸಾರ್!
ಮೋಗ್ ಮ್ಹಳ್ಯಾರ್ ಸಪ್ಣಾಂಚೊ ಸಂಸಾರ್! ಹೊ ಸಂಸಾರ್ ಕವಿಂಕ್ ಮೊಗಾಚೊ. ದೆಕುನ್ ಕವಿ ಕೆದಳಾಯ್ ಮೊಗಾಚ್ಯಾ ಧೊವಾಂತ್ ಸುಶೆಗಾತ್ ನ್ಹಾವ್ನ್‌ಚ್ ಆಸ್ತಾತ್. ಕಸಲ್ಯಾಯ್ ಶೆಳಿಚಿ ತಾಂಕಾಂ ಪರ್ವಾ ಆಸನಾ. ಕಸಲ್ಯಾಯ್ ಪಿಡೆಚಿ ತಾಂಕಾಂ ಕೀಡ್ ಧೊಸನಾ. ದೆಕುನ್ ಕಾಂಯ್ ಮ್ಹಣ್ತಾತ್ ಮೊಗಾಕ್ ಆವಯ್ ಬಾಪಯ್ ಆಸನಾ!?
ಅಸುಂತಾ ಪಿರೇರಾ ಪಯ್ಲೆಚ್ ಪಾವ್ಟಿಂ ಕವಿತಾ ಕುಳಾರಾಕ್ ಯೆತಾನಾ ಏಕ್ ಗೀತ್ ಘೆವ್ನ್ ಆಯ್ಲ್ಯಾ. ಹೆಂ ಗೀತ್ ಮೊಗಾಚೆಂ. ಸಪ್ಣಾಂತ್ ದೆಕ್‌ಲ್ಲೆ ವೆಕ್ತಿಚೆಂ. ತಾಕಾ ತಿಣೆ ನಿಜಾಯೆಂತ್ ಪಳೆಂವ್ಕ್ ನಾ ತರೀ, ಕಾಳ್ಜಾಚ್ಯಾ ಕೊನ್ಶಾಂತ್ ಖಂಚಯ್ಲಾಂ. ಕಾಂಯ್ ತೊ ಘೊಡ್ಯಾರ್ ಬಸೊನ್ ವೆಗಿಂ ಯೆತಲೊ ಮ್ಹಳ್ಳಿ ಆಶಾ ಘೆವ್ನ್.
ಘೊಡ್ಯಾರ್ ಬಸೊನ್ ಯೆಂವ್ಚೊ ಹಾತ್ ಧರ್‍ಚೊ ಚಲೊಚ್ ಜಾಯ್ಜೆ ಕಾಂಯ್? ಹಿ ಕವಿತಾ ತಶೆಂ ಕಾಂಯ್ ಖಂಯ್ ತರೀ ಸಾಂಗ್ತಾ? ಸಾಂಗನಾ ದೆಕುನ್‌ಚ್ ಹಿ ಕವಿತಾ ಜಿಕ್ತಾ. ಹೆವಿಶಿಂ ಚಿಂತುಂಕ್ ತುಮ್ಕಾಂಚ್ ಸೊಡ್ತಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಏಕ್ ಗೀತ್ ಮೊಗಾಚೆಂ!
ಸುರ್ಯಾಚ್ಯಾ ಕಿರ್ಣಾಂನಿ ತುಕಾ ಪಳೆಲಾಂ
ಮ್ಹಜ್ಯಾ ಕಾಳ್ಜಾಂತ್ ತುಕಾ ಖಂಚಯ್ಲಾಂ
ಸಪ್ಣಾಂತ್ ದೆಕ್‌ಲ್ಲೆಂ ತುಜೆಂ ರುಪ್ಣೆಂ
ಮೊಳ್ಬಾರ್ ಮೆಳ್ತಲೆಂ ಚಿಂತುನ್ ಸೊದ್ಲೆಂ
ಸುರ್ಯಾಚ್ಯಾ ಕಿರ್ಣಾಂನಿ ತೊಪ್ತಾನಾ ಮೊಗಾ
ಪಿಗ್ಳೊನ್ ಗೆಲೊಯ್ ಮ್ಹಜೆ ದಿಶ್ಟಿಂತ್!
ಯೆದೊಳ್ ತುಕಾ ದೆಖೊಂಕ್ ನಾ ಮೊಗಾ
ವೆಂಗೆಂತ್ ಮ್ಹಜೆ ಆರಾಂವ್ಕ್ ನಾ
ಖೆಳೊಂಕ್ ನಾ ಸಾಂಗಾತಾ ಆಪಾಲಿಪಾ
ತರೀ ತುಕಾ ಮ್ಹಜ್ಯಾ ಭೊಗ್ಣಾಂನಿ ರೆವ್ಡಾಯ್ಲಾಂ
ಏಕ್ ದೀಸ್ ಘೊಡ್ಯಾಚೆರ್ ಬಸೊನ್ ಯೆತಲೊಯ್
ಖಂಡಿತ್ ಮ್ಹಾಕಾ ವೆಂಗೆಂತ್ ಘೆತಲೊಯ್
ಹೊ ಮೋಗ್ ನೀಜ್ ತರ್, ಮ್ಹಜ್ಯಾ
ದೊಳ್ಯಾಂನಿ ಗಳ್ಚಿಂ ದುಕಾಂ ಪುಸ್ತಲೊಯ್!
-ಅಸುಂತಾ ಪಿರೇರಾ, ಗಂಟಾಲ್‌ಕಟ್ಟೆ (ಲಂಡನ್)