ಸಂಪಾದಕೀಯ್:
ಭಾಯ್ಲ್ಯಾನ್ ಸಾದೊ ಭೊಳೊ, ಭಿತರ್ ಕುಸಡಾಯೆಚೊ ದಾಳೊ
ಮನೀಸ್ ಭಾಯ್ಲ್ಯಾನ್ ಕಸೊ ದಿಸ್ತಾ, ತಸೊ ಭಿತರ್‍ಲ್ಯಾನ್ ಆಸಜಾಯ್ ಕಾಂಯ್ ನಾ. ಭಾಯ್ಲ್ಯಾನ್ ಸಾದೊ, ಭೊಳೊ ಆನಿ ಭಿತರ್‍ಲ್ಯಾನ್ ಕುಸಡಾಯೆಚೊ ದಾಳೊ. ಭಾಯ್ಲ್ಯಾನ್ ಸೊಂಪ್ಯಾ ಉತ್ರಾಂಚೊ, ಸರಳ್ ಮನಾಚೊ ದಿಸತ್, ಪುಣ್ ಭಿತರ್‍ಲ್ಯಾನ್ ಕಾಳೀಜ್ ಪಿಂಜುನ್ ಉಡೊಂವ್ಚೊ ರಾಗಿಷ್ಟ್ ಮನೀಸ್. ಹ್ಯಾ ದೋನ್ ವ್ಯಕ್ತಿತ್ವಾಂಲಾಗಿಂ ಹಾಂಗಾಸರ್ ಕವಿ ಉಲೊವ್ಣೆಂ ಚಲಯ್ತಾ.
ಹಿ ಕವಿತಾ ಶರತ್ಚಂದ್ರ ಶೆಣೈಚ್ಯಾ 'ಅಂತರ್‌ನಾದ್' ಪುಸ್ತಕಾಂತ್ಲ್ಯಾನ್ ಘೆತ್ಲ್ಯಾ. ಹ್ಯಾ ಪುಸ್ತಕಾಕ್ ತಾಂಕಾಂ ಸಾಹಿತ್ಯ ಅಕಾದೆಮಿಚಿ ಪ್ರಶಸ್ತಿ ಲೆಗುನ್ ಮೆಳ್ಳ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕೊಣ್ ತುಂ?
ಆಗಾ, ತುಂ ಕೊಣ್?
ಹಾಂವ್ ತುಕಾ ವಳ್ಖನಾ!
ತೀಖ್, ಕಡೂ ಉತ್ರಾಂ ತುಜಿಂ !
ಆಮ್ಚೆಂ ಕಾಂಯ್ ನಾತೆಂ ನಾ !
ಹಾಂವ್ ಸರಳ್ ಮನಾಚೊ,
ಸೊಪ್ಯಾ ಉತ್ರಾಂಚೊ
ಖರೆಂ ಸಾಂಗೂಂ?
ತುಜೆ ವಿಚಾರ್, ಭಾವನಾ,
ಮ್ಹಾಕಾ ಸಮ್ಜನಾಂತ್ !
ಕೊಣ್ ತುಂ?
ಇತ್ಲೊ ರಾಗೇಸ್ತ್ !
ಪಿಡೇಸ್ತ್ ಮನಾಚೊ !
ಕಾಳ್ಖಾಂತ್ ರಡ್ಪಿ,
ಕಾಳೀಜ್ ಪಿಂಜೂನ್ ದಾಖೊವ್ಪಿ,
ತತ್ವಜ್ಞಾನಿ, ಸ್ಥಿತಪ್ರಜ್ಞ್ !
ಪರ್ಕ್ಯಾ,
ಹಾಂವೆ ಹಾತಾಂತ್ ಲಿಖ್ಣಿ ಘೆತನಾ,
ಮ್ಹಜೆ ತರ್ಫೆನ್ ಮ್ಹಣ್
ತುಂಚ್ ಕಿತ್ಯಾಕ್ ಉಲಯ್ತಾ?
-ಶರತ್ಚಂದ್ರ ಶೆಣೈ
संपादकीय:
भायल्यान सादो भोळो, भितर कुसडायेचो दाळो
मनीस भायल्यान कसो दिसता, तसो भितरल्यान आसजाय कांय ना. भायल्यान सादो, भोळो आनी भितरल्यान कुसडायेचो दाळो. भायल्यान सोंप्या उतरांचो, सरळ मनाचो दिसत, पूण भितरल्यान काळीज पिंजून उडोंवचो रागिष्ट मनीस. ह्या दोन व्यक्तित्वांलागीं हांगासर कवी उलोवणें चलयता.
ही कविता शरतचंद्र शेणैच्या 'अंतरनाद' पुस्तकांतल्यान घेतल्या. ह्या पुस्तकाक तांकां साहित्य अकादेमिची प्रशस्ती लेगून मेळ्ळ्या.
-मेल्विन रोड्रीगस
कविता:
कोण तूं?
आगा, तूं कोण?
हांव तुका वळखना!
तीख, कडू उतरां तुजीं !
आमचें कांय नातें ना !
हांव सरळ मनाचो,
सोप्या उतरांचो
खरें सांगूं?
तुजे विचार, भावना,
म्हाका समजनांत !
कोण तूं?
इतलो रागेस्त !
पिडस्त मनाचो !
काळखांत रडपी,
काळीज पिंजून दाखोवपी,
तत्वज्ञानी, स्थितप्रञ !
परक्या,
हांवे हातांत लिखणी घेतना,
म्हजे तर्फेन म्हण
तुंच कित्याक उलयता?
-शरतचंद्र शेणै