ಸಂಪಾದಕೀಯ್:
ಕವಿತಾ ಕುಳಾರಾಕ್ ಪಾವ್‌ಲ್ಲೆ ಕಾಳೆ ಆನಿ ಧವೆ ಘೊಡೆ!
ಕೊಂಕಣಿ ವಾವ್ರಾಡ್ಯಾಂಚಿ ಸುಕಿದಾಢ್ ಆಸ್‌ಲ್ಲ್ಯಾ ಹ್ಯಾ ಕಾಳಾರ್ ಹುಮೆದಿಚೊ ದರ್ಯೊ ಕಶೆಂ ತರ್ನಾಟ್ಯಾಂಕ್ ಸೈತ್ ಲಜೆಕ್ ಘಾಲ್ಚಿ ಏಕ್ ವೆಕ್ತಿ ಆಸಾ ಜಾಲ್ಯಾರ್ ವಲ್ಲಿ ವಗ್ಗ. ಮ್ಹಾಲ್ಗಡೊ ಮನೀಸ್ ಜಾಲ್ಯಾರ್‌ಯ್ ತಸಲೆಂ ಏಕ್ ವ್ಹಡ್‌ಪಣ್ ದಾಕಯ್ನಾಸ್ತಾಂ ನವ್ಯಾ ಬರವ್ಪ್ಯಾಂ ಸಾಂಗಾತಾ ಸಲೀಸಾಯೆನ್ ಭರ್‍ಸೊನ್ ತಾಂಚೆಥಂಯ್ ತಾಣೆ ಸುಡ್ಸುಡಾಯೆಚ್ಯೊ ಸುರ್‍ಸುರ್‍ಸೊ ಪೆಟಂವ್ಚೆಂ ಹಾಂವ್ ಆದಿಂ ಥಾವ್ನ್ ದೆಕೊನ್ ಆಯ್ಲಾಂ.
ಕಥಾಕಾರ್ ಜಾವ್ನ್‌ಯ್ ನಾಂವ್ ಕೆಲ್ಲ್ಯಾ ವಲ್ಲಿ ವಗ್ಗಾನ್ ಕವಿ ಜಾವ್ನ್ ಥೋರ್ ನಾಂವ್ ಕೆಲಾಂ. ಹಾಂಗಾಸರ್ ತಾಚಿ ಅಮೂರ್ತ್ ಕವಿತಾ ಪೇಶ್ ಜಾಲ್ಯಾ. ಕಾಳೊ ಘೊಡೊ ಆನಿ ಧವಿ ಘೊಡಿ ತಾಚ್ಯಾ ಹೆ ಕವಿತೆಕ್ ಪ್ರೇರಣ್ ಜಾಲ್ಯಾಂತ್. ಮನ್ಶಾಂಚ್ಯಾ ಅರ್ಥ್‌ಕೋಶಾಂತ್ ಧವೆಂ ಮ್ಹಳ್ಯಾರ್ 'ಬರೆಂ' ಆನಿ ಕಾಳೆಂ ಮ್ಹಳ್ಳ್ಯಾಕ್ 'ವಾಯ್ಟ್' ಅಶೆಂ ಅರ್ಥ್ ಆಸಾತ್. ಆಮಾಸ್-ಪುನ್ವೆಬರಿ, ಸುಕ್ತಿ ಆನಿ ಭರ್‍ತೆಬರಿ, ಉಚಾಂಬಳಾಯ್ ತಶೆಂ ಶಾಂತತೆಬರಿ - ಹೆ ಘೊಡೆ ತುಜ್ಯಾ ಜಿವಿತಾಂತ್ ಪಾಶಾರ್ ಜಾಂವ್ಚ್ಯೊ ವೆಕ್ತಿ ಜಾಂವ್ಕ್ ಪುರೊ; ತುಜೆ ಮತಿಂತ್ಲಿಂ ಚಿಂತ್ನಾಂ, ಭೊಗ್ಣಾಂ ಜಾಂವ್ಕ್ ಪುರೊ; ತುಜ್ಯಾ ಕಾಳ್ಜಾಂತ್ಲೆ ಆಟೆವಿಟೆ ಜಾಂವ್ಕ್ ಪುರೊ.
ತುಮಿ ಹ್ಯಾ ಘೊಡ್ಯಾಂಕ್ ಕಶೆಂ ವೊಲಾಯ್ತಾತ್ ತಶೆಂ ವೊಲಾಯಾ. ಪುಣ್ ಕವಿಚೆ ಮತಿಂತ್ಲೆ ಹೆ ಘೊಡೆ ಆಜ್ ಹ್ಯಾ ಕವಿತಾ ಕುಳಾರಾಕ್ ಪಾವ್ತಚ್ ಥಂಡ್ ಪಡ್ಲ್ಯಾತ್ ಜಾಲ್ಯಾರ್ ತಿ ಖಿಣಾಚಿ ಥಂಡಾಯ್ ಮಾತ್ರ್. ಪರ್‍ತ್ಯಾನ್ ತೆ ಉಚಾಂಬಳಿ ಜಾತಲೆ, ಆನ್ಯೇಕ್ ಪಾವ್ಟಿಂ ಹಾಂಗಾಚ್ ಪಾಂವ್ಚೆಖಾತೀರ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಘೊಡ್ಯಾಂಚ್ಯೊ ಘಾಡಾಮೊಡಿ
ಕಾಳೊ ಘೊಡೊ
ಧವಿ ಘೊಡಿ
ಉಡ್ಕಾಣಾಂ ಘಾಲುನ್
ಧಾಂವೊನ್ ಯೆತಾತ್
ಧುಳ್ ಉಬವ್ನ್
ನಪಯಿಂಚ್ ಜಾತಾತ್
ಕಾಳೊ ಘೊಡೊ
ಧವಿ ಘೊಡಿ
ಪರತ್ ಯೆತಾತ್
ಹರ್ಧ್ಯಾ ವಯ್ಲ್ಯಾನ್
ಸವಾರಿ ಕರ್‍ತಾತ್
ಬೊರಿಯೊ ಮ್ಹಜ್ಯೊ
ಪಿಟೊ ಕರ್‍ತಾತ್
ಆಜ್‌ಯ್ ಆಯ್ಲಾ ಪಳೆ
ತೊಚ್ ತೊ ಕಾಳೊ ಘೊಡೊ
ಆನಿ ತಿ ಧವಿ ಘೊಡಿ
ಪುಣ್ ತಾಂಚಿಂ
ಉಡ್ಕಾಣಾಂ ನಾಂತ್
ಉಚಾಂಬಳಿ
ಘಾಡಾಮೊಡಿ ನಾಂತ್
ಹರ್ಧ್ಯಾ ವಯ್ಲ್ಯಾನ್
ಸವಾರಿ ನಾ
ಅಶೆಂ ಕಶೆಂ
ಕಾಳೊ ಘೊಡೊ
ಧವಿ ಘೊಡಿ
ಇತ್ಲೇಯ್ ಆಜ್
ಸಾದೆ ಕಿತ್ಯಾಕ್?
-ವಲ್ಲಿ ವಗ್ಗ