ಸಂಪಾದಕೀಯ್:
ಆವಯ್ ಜಾಲ್ಲ್ಯಾಂಕ್ ಕವಿತಾ ಬರಂವ್ಕ್ ಸಲೀಸ್!
ಲ್ಹಾನ್ ಲ್ಹಾನ್ ಭುರ್ಗಿಂ, ಮನಾಂ ವೊಡಿ ಸರ್ಗಿಂ! - ಕವಿವರ್ಯ್ ಚಾ.ಫ್ರಾ.ಚೆಂ ಫಾಮಾದ್ ವಾಕ್ಯೆಂ ಆಮಿ ಆಯ್ಕಲಾಂ. ಲ್ಹಾನಾ ಭುರ್ಗ್ಯಾಂನಿ ಘರಾಂತ್ ಹಾಡ್ಚೊ ಸಂತೊಸ್ ಮೀತ್ ಮೇರ್ ನಾತ್ಲಲೊ. ತ್ಯಾ ಸಂತೊಸಾಕ್ ಮೆಜುಂಕ್ ಹ್ಯಾ ಸಂಸಾರಾಂತ್ಲಿಂ ಖಂಯ್ಚೀಂಯ್ ಮಾಪಾಂ ಸಕನಾಂತ್. ಭುರ್ಗ್ಯಾಂ ಲಾಗಿಂ ತಸಲಿ ಕಸಲಿ ಏಕ್ ಸಕತ್ ಆಸಾ! ಹೆ ಸಕ್ತೆಚ್ಯಾ ಪ್ರಭಾವಾನ್‌ಚ್ ಹಾಂಗಾಚಿ ಏಕ್ ಕವಿತಾ ಉಬ್ಜಾಲ್ಯಾ.
ಫ್ಲೇವಿ ಬೆಳ್ತಂಗಡಿನ್ ಪಯ್ಲೆ ಪಾವ್ಟಿಂ ಕೊಂಕಣಿ ಕವಿತಾ ಬರಂವ್ಚೆಂ ಪ್ರೇತನ್ ಕೆಲಾಂ. ಆಮಿ ದಿಂವ್ಚೆ ಹುಮೆದಿಕ್ ಗವಾಯ್ ಜಾವ್ನ್ ಫ್ಲೇವಿ ತಸಲಿಂ ಜಾಯ್ತಿಂ ಜಣಾಂ ಕವಿತಾ ಕುಳಾರಾಂತ್ ಯೆದೊಳ್‌ಚ್ ಸಜ್ಲ್ಯಾಂತ್. ಕೊಣ್ ಹಿ ಹುಮೆದ್ ಘೆವ್ನ್, ಸ್ವತಾಚ್ಯಾ ಪ್ರೇತನಾನ್ ಜಾಯ್ತೆಂ ಮುಕಾರ್ ಗೆಲ್ಯಾಂತ್ -ತಾಂಚಿ ಚಾಲ್ ಪಳೆತಾನಾ ಆಮ್ಕಾಂ ದಾಧೊಸ್ಕಾಯ್ ಭೊಗ್ತಾ.
ಫ್ಲೇವಿಕ್ ಆಪ್ಲೆಂ ಬಾಳ್ ಜರ್ ತರ್ ಏಕ್ ಕವಿತಾ ಬರಂವ್ಕ್ ಲಾಯ್ತಾ, ತರ್ ಹ್ಯಾ ಜಿವಿತಾಂತ್ಲ್ಯಾ ಹರ್‍ಯೆಕೆ ಘಡ್ಯೆ ಜಾಯ್ತ್ಯೊ ಸಂಗ್ತಿ ಪಾಶಾರ್ ಜಾವ್ನ್ ವೆತಾತ್. ತಾಂಕಾಂ ಜರ್ ಆಮಿ ಪೊಟ್ಲುನ್ ಧರ್‍ಲೆಂ, ಕವಿತಾಂಚೊ ಸಾಗೊರ್‌ಚ್ ಆಮ್ಕಾಂ ರುತಾ ಕರ್‍ಯೆತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಲ್ಹಾನ್ ಬಾಳ್
ಆಮ್ಚ್ಯಾ ಘರಾಂತ್ ಆಯ್ಲಾಂ ಬಾಳ್
ಗೊದ್ದೆಂ ಉಲವ್ನ್ ಹಾಸೊನ್ ಫಟಯ್ತಾ
ಆವಯ್ ಪಾಲ್ವಾಕ್ ಸದಾಂಯ್ ಉಮ್ಕೊಳ್
ಪಾಸ್ಳಿ ಸೊಡ್ಲ್ಯಾರ್ ಖಿಣಾನ್ ಹುಸ್ಕೆತಾ
ಹಾತಾಕ್ ಕೋಯ್ರ್ ಮೆಳ್ಳ್ಯಾರ್ ಖಾತಾ
ಹಾಂಡಿ ಉದಕ್ ವೊಮ್ತುನ್ ಘಾಲ್ತಾ
ನಿದೊಂಕ್ ಗೆಲ್ಯಾರ್ ದೊಳೆ ಮಿಣ್ಕಾವ್ನ್
ಚೊರಾಬರಿ ನಾಟಕ್ ಕರ್‍ತಾ!
ತಾಚ್ಯಾ ರಡ್ಣ್ಯಾಂತ್ ಆನಿ ಹಾಸ್ಯಾಂತ್
ಆಮ್ಚೊ ದೀಸ್ ಸದಾಂಚ್ ಉದೆತಾ
ಆಮ್ಚ್ಯಾ ಕುಟ್ಮಾಂತ್ ಬಾಳ್ ಸದಾಂಯ್
ರಾಸ್ ರಾಸ್ ಸಂತೊಸ್ ವಾಂಟ್ತಾ!
-ಫ್ಲೇವಿ ಬೆಳ್ತಂಗಡಿ