ಸಂಪಾದಕೀಯ್:
ಬಾಯ್ಲಾಂಚ್ಯಾ ದಿಸಾಕ್ ಸಂದೇಶ್ ಆಟಾಪ್ಚಿ ಕವಿತಾ
ಮಾರ್ಚಾಚೆ ಆಟ್ ತಾರಿಕೆರ್ ಸಗ್ಳ್ಯಾ ಸಂಸಾರಾಚೆರ್ ಬಾಯ್ಲಾಂಚೊ ದೀಸ್ ಮನಾಯ್ತಾತ್. ಹ್ಯಾ ದಿಸಾಕ್ ಏಕ್ ವಿಶೇಸ್ ತಶೆಂ ಅರ್ಥಾಭರಿತ್ ನಿರೋಪ್ ಘೆವ್ನ್ ಹಿ ಕವಿತಾ ಹಾಂಗಾ ಸಾದರ್ ಜಾಲ್ಯಾ. ಎಕೆ ಕವಿತೆದ್ವಾರಿಂ ಸಮಾಜೆಲಾಗಿಂ ಕಶೆಂ ಉಲವ್ಯೆತ್ ಮ್ಹಳ್ಳ್ಯಾಕ್ ಹಿ ಕವಿತಾ ಉತ್ತೀಮ್ ಸಾಕ್ಸ್ ದಿತಾ.
ಉತ್ತೀಮ್ ನಟಿ ಜಾವ್ನಾಸ್ಚ್ಯಾ ಫ್ಲೋರಾ ಡಿ'ಸೋಜಾಚ್ಯೊ ಕವಿತಾ ಹ್ಯಾ ಫುಡೇಂಯ್ ಕವಿತಾ ಕುಳಾರ್ ಸುಂರ್‍ಗಾರಾಂವ್ಕ್ ಯೆತಲ್ಯೊ ಮ್ಹಣೊನ್ ಹಾಂವ್ ಬಾಳ್ಗಿತಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಅಂತರಾಷ್ಟ್ರೀಯ್ ಮಹಿಳಾ ದೀಸ್
ಮಾರ್ಚಾಚಿ ಆಟ್ ತಾರೀಕ್
ಆಗಾ ದಾದ್ಲ್ಯಾ ಆಜ್ ತರೀ ವಿಸರ್ ಸೊರ್‍ಯಾಚೊ ಗಲಾಸ್
ಮಾತ್ಯಾಕ್ ತುಜ್ಯಾ ಬಾಂಧುನ್ ಮುಂಡಾಸ್
ತುಜೆ ಸ್ತ್ರೀಯೆಕ್ ಪಾಟಯ್ ಉಲ್ಲಾಸ್
ಸಂಸಾರ್ ಆಚರ್‍ಶಿತಾ ಅಂತರಾಷ್ಟ್ರೀಯ್ ಮಹಿಳಾ ದಿವಸ್
ರಚ್ಲಾಂ ಸ್ತ್ರೀಯೆಕ್ ದೆವಾನ್ ಕಾಡುನ್ ತುಜೆ ಕುಶಿಚಿ ಬೋರ್
ದೆಕುನ್ ತಿಕಾ ಸದಾಂಚ್ ತುಜೆ ಕುಶಿನ್‌ಚ್ ದವರ್
ಕಿತ್ಯಾಕ್ ಸ್ತ್ರೀ ಜಾವ್ನಾಸಾ ಆವಯ್, ಪತಿಣ್ ಆನಿ ಭಯ್ಣ್
ಮೊಗಾನಾ, ತ್ಯಾಗಾನ್ ಸುಧಾರ್‍ಶಿತಾ ಸಗ್ಳೆ ಜಿಣ್ಯೆಚೆಂ ಪಯ್ಣ್
ಸ್ವತಾ ಭೊಗುನ್ ಕಷ್ಟ್, ಪುಣ್ ಭಾಯ್ರ್ ದಾಕಂವ್ಚಿನಾ ಶಿಣ್
ಆಸ್ಪತ್ರೆಂತ್ಲಿಂ ನರ್ಸಾಂ, ಇಸ್ಕೊಲಾಂತ್ಲಿಂ ಟೀಚರಾಂ, ಕೊವೆಂತಾಂತ್ಲಿಂ ಸಿಸ್ಟರಾಂ
ಜಾವ್ನಾಸಾತ್ ವೆವೆಗ್ಳೆ ಸೆವೆಚಿಂ ದಾತಾರಾಂ
ಕರ್ ತಾಂಕಾಂ ಸಮಾಜೆಚಿಂ ಹಕ್ಕ್‌ದಾರಾಂ
ದಾಕಯ್ ತಾಂಚೆರ್ ದಯಾ ಆನಿ ಮಯಾ
ಕಿತ್ಯಾಕ್ ಕುಟ್ಮಾಕ್ ಜಾಯ್ ತಾಂಚಿ ಸಾಯಾ
ಪವಿತ್ರ್ ಪುಸ್ತಕ್ ಸಾಂಗ್ತಾ 'ದಾದ್ಲ್ಯಾಂನೊ ಸ್ತ್ರೀಯಾಂಚೊ ಮೋಗ್ ಕರಾ
ಆನಿ ಸ್ತ್ರೀಯಾಂನೊ ದಾದ್ಲ್ಯಾಂಕ್ ಖಾಲ್ ಜಾಯಾ'
ಪುಣ್ ಸ್ತ್ರೀಯಾಂನೊ ಆಪ್ಲ್ಯಾ ಹಕ್ಕಾಂ ಥಂಯ್ ಜಾಗಿಂ ಜಾಯಾ
ಅನ್ಯಾಯ್ ಅತ್ಯಾಚಾರಾಕ್ ವಿರೋಧ್ ಕರಾ
ಸಮಾಜೆಚಿಂ ನಾಗರಿಕ್ ಜಾವ್ನ್ ಹಕ್ಕಾನ್ ಜಿಯೆಯಾ
-ಫ್ಲೋರಾ ಡಿ'ಸೋಜಾ, ಜೆರಿಮೆರಿ (ಮುಂಬೈ)