ಸಂಪಾದಕೀಯ್:
ಸಾದ್ಯಾ ಉತ್ರಾಂನಿ ಮಿರ್‍ಸಾಂಗೆಚಿ ತಿಕ್ಸಾಣ್ ಆನಿ ಚಿಂಚೆಚಿ ಆಮ್ಸಾಣ್
ಬಾವನಾತ್‌ಲ್ಲಿಂ ಫುಲಾಂ ಜಾವ್ನ್ ಧರ್ತಿ ಸೊಭಯಾಂ ಮ್ಹಣ್ ಸಾಂಗೊನ್ ವೊವ್ಳಿಗ್ ದಿಂವ್ಚಿ ಏಕ್ ಕವಿತಾ ಹಾಂಗಾ ತುಮಿ ವಾಚುನ್ ಆಸಾತ್. ಫುಲಾಂಚೆಂ ಜಿವಿತ್ ಕುಸ್ಕುಟ್ ಕಾಳಾಚೆಂ. ಹ್ಯಾ ಕಾಳಾಂತ್ ಸ್ತ್ರೀಯೆಚ್ಯಾ ಮಾತ್ಯಾರ್ ಧರುನ್, ದೆವಾಚ್ಯಾ ಪಾಯಾಂ ಮುಳಿಂ ಜರ್ ತರ್ ಏಕ್ ಫುಲ್ ಸೊಭ್ತಾ ಆನಿ ತಾಚೆಂ ಜಿವಿತ್ ಸುಫಳ್ ಕರ್‍ತಾ, ಮಾಗೀರ್ ಇತ್ಲಿಂ ವರ್ಸಾಂ ಜಿಯೆವ್ನ್‌ಯ್ ಎಕಾ ಫುಲಾನ್ ಎಕಾ ದಿಸಾಕ್ ಕೆಲ್ಲೆಂ ಕಾಮ್ ಮನೀಸ್ ಕಿತ್ಯಾಕ್ ಕರುಂಕ್ ಸಕನಾ?
ಸವಾಲ್ ಸೊಂಪೆಂ ಆನಿ ಚಿಂತುಂಕ್ ಗೆಲ್ಯಾರ್ ಮ್ಹಾಕಾ, ತುಕಾ ಕಾನ್ಸುಲಾಚೆರ್ ಕೊಣೆಂಗಿ, ಖಂಯ್ ಥಾವ್ನ್‌ಕಿ ಥಾಪ್ಡಾಯಿಲ್ಲೊ ಅನ್ಭೋಗ್ ಜಾವ್ನ್ ಪಿಂರ್‍ಗಣೆಚ್ಯಾ ಖಂದ್ಕಾಂತ್ ಆಮಿ ಶೆವ್ಟಲ್ಯಾರಿ ಶೆವ್ಟಲ್ಯಾಂವ್.
ಸಾದಿ ಕವಿತಾ, ಸಾದಿಂ ಸೊಂಪಿಂ ಉತ್ರಾಂ ತರೀ ತ್ಯಾ ಉತ್ರಾಂನೀಂಯ್ ಮಿಟಾಚಿ ಖಾರ್‍ಸಾಣ್, ಚಿಂಚೆಚಿ ಆಮ್ಸಾಣ್ ಆನಿ ಮಿರ್‍ಸಾಂಗೆಚಿ ತಿಕ್ಸಾಣ್ ಆಸಾ. ಮಾಗೀರ್ ಕವಿತಾ ಮ್ಹಳ್ಯಾರ್ ಅಶಿಚ್ ಆಸಜೆ. ಒಲಿವೇರಾ ಪ್ಲೇವಿಯಾ ದುಸ್ರೆ ಪಾವ್ಟಿಂ ಕವಿತಾ ಕುಳಾರಾಕ್ ಆಯ್ಲ್ಯಾ. ಆಮ್ಚೆಂ ಮಿಸಾಂವ್ ಆಪ್ಣಾಚೆಂ ಕರ್‍ನ್ ಘೆತ್‌ಲ್ಲ್ಯಾ ಬೋವ್ ಥೊಡ್ಯಾಂ ಪಯ್ಕಿ ತೀಯ್ ಎಕ್ಲಿ ಮ್ಹಣ್ ಸಾಂಗೊಂಕ್ ಮ್ಹಾಕಾ ವ್ಹರ್ತಿ ದಾಧೊಸ್ಕಾಯ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಫುಲಾಂ
ಧೊವಾಚೆ ತೆ ಥೆಂಭೆ ಥೆಂಭೆ
ಪಾನಾಂ ಥಾವ್ನ್ ಧರ್ಣಿರ್ ಪಡೊನ್ ಜಿರ್‍ತಾನಾ
ಫುಲ್ತಾತ್ ತೆ ಕಳೆ ಫಾಂತ್ಯಾರ್...
ರವಿರಾಯ್ ಉದೆವ್ನ್ ಯೆತಾನಾ
ಸೊಭ್ತಾತ್ ತಿಂ ಫುಲ್ ಝಾಡಾಂ
ಶೀತಳ್ ವಾರ್‍ಯಾಂತ್ ಧಲ್ತಾನಾ
ಪಯ್ಲೊ ಮಾನ್ ಫುಲಾಂಕೀ ಮೆಳ್ತಾ
ಖಂಯ್ಸರಿ ತಾಂಕಾಂ ಸಜಯ್ತಾನಾ
ಕಿತ್ಲೊ ಸಂತೊಸ್ ಭೊಗ್ತಾ
ಸ್ತ್ರೀಯಾನಿಂ ಫುಲಾಂ ಮಾಳ್ತಾನಾ
ಸರ್ವಾಂಚೆಂ ಮನ್ ಉಲ್ಲಾಸಾನ್ ಭರ್‍ತಾ
ಥರಾ ಥರಾಂಚಿಂ ಫುಲಾಂ ದೆಖ್ತಾನಾ
ಆಯ್ಚಿಂ ಫುಲಾಂ ಫಾಲ್ಯಾಂ ಬಾವ್ತಲಿಂ
ಝಾಡಾಂ ಥಾವ್ನ್ ಸಕ್ಲಾ ಪಡ್ತಲಿಂ
ಜರ್ ಆಮಿಂಚ್ ಫುಲಾಂ ಜಾಲ್ಯಾಂವ್ ತರ್
ಧರ್ತಿ ಸೊಭಿತ್ ಸುಂದರ್ ದಿಸ್ತಲಿ
-ಒಲಿವೇರಾ ಪ್ಲೇವಿಯಾ, ತ್ರಾಸಿ/ಕುವೈಟ್