ಸಂಪಾದಕೀಯ್:
ನತಾಲಾಂಚ್ಯಾ ನಾಂವಾನ್ ಆಮ್ಚ್ಯಾ ಜಿವಿತಾಚೆರ್ ಆಮಿ ಸವಾಲ್ ಕರುಂಕ್ ಲಾಂವ್ಚಿ ಕವಿತಾ
ದುಬ್ಳಿಕಾಯೆಚೊ ಸಂಕೇತ್ ಕಸೊ ಜೆಜು ಸ್ವಾಮಿಚೊ ಜಲ್ಮ್ ಜಾಲ್ಲೊ. ದೋನ್ ಹಜಾರ್ ವರ್ಸಾಂ ಆದ್ಲೊ ತೊ ಗೊರ್‍ವಾಂಚೊ ಗೊಟೊ, ತಿ ಖಾವಣ್, ತೊ ಕಾಳೊಕ್ - ಹೆಂ ಸಗ್ಳೆಂ ತಿ ದುರ್ಬಳ್ಕಾಯ್ ಆಮ್ಕಾಂ ಸಾಂಗುನ್ ದಿತಾತ್. ಆಮ್ಚೆಂ ಜಿವಿತ್ ಸಾದೆಪಣಾಕುಶಿಂ ವರ್‍ಚ್ಯಾಕ್, ಹೆರಾಂಚ್ಯಾ ಗರ್ಜಾಂ ಥಂಯ್ ಪಾಂವ್ಚ್ಯಾಕ್ ಆಮ್ಕಾಂ ಉಲೊ ದಿತಾತ್.
ಪುಣ್ ಆಜ್ ಕಾಳೊಕಾಂತೀ ಜಿಗ್‌ಮಿಗ್ಚ್ಯಾ ಉಜ್ವಾಡಾಚಿಂ ಫಿಂತಾಂ, ಗೊಟ್ಯಾ ಸುವಾತೆರ್ ಉಬಾರ್ ಉಬಾರ್ ಬಾಂದ್ಪಾಂ, ಮನ್ಶಾಕ್ ಆಬ್ಲೆಸಾಕ್ ಪೊಕೊರ್‍ನ್ ಖೆಲಾಂ ಆಸ್ತಾಂ ಜೆಜು ಸ್ವಾಮಿಚ್ಯಾ ಜಲ್ಮಾಚ್ಯಾ ಸಂಕೇತಾಂಚೆಂ ಮಹತ್ವ್ ಕಿತ್ಲೆಂ ಉರ್‍ಲಾಂ ಮ್ಹಣುನ್ ಹಿ ಕವಿತಾ ಸವಾಲ್ ಕರ್‍ತಾ.
-ಮೆಲ್ವಿನ್ ರೊಡ್ರಿಗಸ್
ಖಂಯ್ ಲಿಪ್ಲಾ ಬಾಳಕ್?
ಮ್ಹಜ್ಯಾ ರಸ್ಮಾ ಶೆಲ್ಯಾನ್
ತುಜೆಂ ವಿಣ್ಗೆಪಣ್ ಧಾಂಪ್ಲೆಂ
ಖಾವ್ಣೆಚ್ಯಾ ಕಾಳ್ಕೆ ಸಾವ್ಳೆಂತ್
ದವ್ಲತೆ ಬಿಂ ವೊಂಪ್ಲೆಂ
ಸೊಡ್ವಣ್ ತುಜಿ ಸಲ್ವೊಂಚೆಂ
ಮಿಸಾಂವ್ ಮ್ಹಜೆಂ ಸೊಂಪ್ಲೆಂ
ಖಂಯ್ ಉರ್‍ಲಿ ತುಜಿ
ದುರ್ಬಳ್ಕಾಯೆಚಿ ಗಾಜವ್ಣಿ
ಗಿಳುನ್ ಸೊಡ್ಲೆಂ ಸಾದೆಪಣ್
ರಾವ್ಳೆರಾಂಚ್ಯೆ ರಾಜ್ವಟ್ಕೆಂನಿ
ಮಾತೆಂ ತೆಂಕುಂಕ್ ಸುವಾತ್ ನಾತ್ಲೆ
ಸಾಸ್ಪತಾತ್ ಆತಾಂಯ್ ಗೊಟ್ಯಾಂನಿ
ಆತಾಂ ನಾ ಝಳಕ್
ತುಜ್ಯೆ ದೈವಿಕ್ ಕಾತಿಚಿ
ದೊಳ್ಯಾಂಕ್ ಲಾಗ್ಲ್ಯಾ ರೂಚ್
ಮಾನಾಚ್ಯಾ ತ್ಯೆ ವಾತಿಚಿ
ಭಸ್ಮ್ ಜಾಲ್ಲ್ಯಾ ಗೊಟ್ಯಾ ಗೊಬ್ರಾರ್
ರಾವ್ಳೆರ್ ಉಟ್ಲಾಂ ಊಂಚ್ ಉಬಾರ್
ಕಿತ್ಯಾಕ್ ತುಂ ವೊಗೊ ಬಸ್ಲಾಯ್
ವೀಜ್ ದಿವ್ಯಾಂಚ್ಯಾ ತ್ಯಾ ಗೊಟ್ಯಾಂನಿ
ತುಜಿ ಸುವಾರ್‍ತಾ ಆತಾಂ
ಬದ್ಲುನ್ ಸೊಡ್ಲ್ಯಾ ಖೊಟ್ಯಾಂನಿ
ಚಮ್ಕೊಂಕ್ ಸಕತ್ ನಾತ್ಲಿಂ
ಚಲ್ತಾತ್ ತುಜ್ಯಾ ಮೆಟಾಂನಿ
ಮೆಜ್ಯೆತ್ ತಾಂಕಾಂ
ಹಾತಾಂಚ್ಯಾ ಬೊಟಾಂನಿ
ಸುವಾರ್‍ತೆ ಬಿಂ ಹುಲ್ಪೊನ್ ಮೆಲಾಂ
ದಿಸ್ತಾ ದೊಳ್ಯಾಂಕ್ ಆಬ್ಲೆಸಾಚೆಂ ಆಗ್ಟೆಂ
ಉಜ್ವಾಡಾ ಕೀರ್ಣ್ ಪಾಲ್ವೊನ್ ಗೆಲಾಂ
ಪೃಥ್ವೆರ್ ಫಕತ್ ಕಾಳಕ್
ಆತಾಂ ಉರ್‍ಲ್ಯಾ ಖಾವಣ್
ಪುಣ್ ಲಿಪ್ಲಾ
ಮ್ಹಜೊ ದೈವಿಕ್ ಬಾಳಕ್
-ಸಿರಿಲ್ ವಾಸ್, ಲೊರೆಟ್ಟೊ
संपादकीय:
नातालांच्या नांवान आमच्या जिविताचेर आमी सवाल करुंक लांवची कविता
दुबळिकायेचो संकेत कसो जेजू स्वामीचो जल्म जाल्लो. दोन हजार वरसां आदलो तो गोरवांचो गोटो, ती खावण, तो काळोक - हें सगळें ती दुर्बळकाय आमकां सांगून दितात. आमचें जिवीत सादेपणाकुशीं वरच्याक, हेरांच्या गर्जां थंय पांवच्याक आमकां उलो दितात.
पूण आज काळोकांती जिगमिगच्या उजवाडाचीं फिंतां, गोट्या सुवातेर उबार उबार बांदपां, मनशाक आबलेसाक पोकोरन खेलां आसतां जेजू स्वामीच्या जल्माच्या संकेतांचें महत्व कितलें उअरलां म्हणून ही कविता सवाल करता.
-मेल्विन रोड्रीगस
कविता:
खंय लिपला बाळक?
म्हज्या रस्मा शेल्यान
तुजें विणगेपण धांपलें
खावणेच्या काळके सावळेंत
दवलते बीं वोंपलें
सोडवण तुजी सलवोंचें
मिसांव म्हजें सोंपलें
खंय उरली तुजी
दुर्बळकायेची गाजवणी
गिळून सोडलें सादेपण
रावळेरांच्ये राजवटकेंनी
मातें तेंकुंक सुवात नातले
सास्पतात आतांय गोट्यांनी
आतां ना झळक
तुज्ये दैवीक कातीची
दोळ्यांक लागल्या रूच
मानाच्या त्ये वातीची
भस्म जाल्ल्या गोट्या गोबरार
रावळेर उटलां ऊंच उबार
कित्याक तूं वोगो बसलाय
वीज दिव्यांच्या त्या गोट्यांनी
तुजी सुवारता आतां
बदलून सोडल्या खोट्यांनी
चमकोंक सकत नातलीं
चलतात तुज्या मेटांनी
मेज्येत तांकां
हातांच्या बोटांनी
सुवारते बीं हुलपोन मेलां
दिसता दोळ्यांक आबलेसाचें आगटें
उजवाडा कीर्ण पालवोन गेलां
पृथ्वेर फकत काळक
आतां उअरल्या खावण
पूण लिपला
म्हजो दैवीक बाळक
-सिरील वास, लोरेट्टो