ಸಂಪಾದಕೀಯ್:
ಬಾಪಾಯ್ಚೆಂ ಕಾಳೀಜ್ ತೊ ಮೆಲ್ಯಾ ಉಪ್ರಾಂತಚ್ ಕಳ್ತಾ
ವಿಜಯ್ ಡಿಕುನ್ಹಾ ಪಯ್ಲೆ ಪಾವ್ಟಿಂ ಕವಿತಾ ಕುಳಾರಾಕ್ ಆಯ್ಲಾ. ಬಾಪಾಯ್‌ವಿಶಿಂ ತಾಣೆಂ ಕವಿತಾ ಲಿಖ್ಲ್ಯಾ. ಆವಯ್ ವಿಶಿಂ ಕವಿತಾ ಆಮಿ ಧಾರಾಳ್ ವಾಚ್ತಾಂವ್. ಪುಣ್ ಬಾಪಾಯ್‌ವಿಶಿಂ ಕವಿತಾ ವಾಚುಂಕ್ ಮೆಳ್ಚ್ಯೊ ಉಣ್ಯೊ. ಆವಯ್ಚೆಂ ಕಾಳೀಜ್ ಎಕಾ ಮನ್ಶಾಕ್ ಜಲ್ಮಾಥಾವುನ್ ಮೆಳ್ತಾ. ಪುಣ್ ಬಾಪಾಯ್ಚೆಂ ಕಾಳೀಜ್ ತೊ ಮೆಲ್ಯಾ ಉಪ್ರಾಂತಚ್ ಕಳ್ತಾ.
ಹಾಂಗಾಸರೀ ಕವಿಚೊ ಬಾಪಾಯ್ ತಾಕಾ ಸಾಂಡುನ್ ಗೆಲಾ. ತಾಚೊ ಉಪ್ಕಾರ್ ಭಾವ್ಡುಂಕ್ ತೊ ಜಿವಂತ್ ಆಸ್ತಾನಾ ತಾಚ್ಯಾನ್ ಜಾಲೆಂ ನಾ ಕೊಣ್ಣಾ. ಆತಾಂ ಆಪ್ಲಿಂ ಉತ್ರಾಂಚ್ ಕವಿತೆ ಮಾರಿಫಾತ್ ತಾಕಾ ತೊ ಸಮರ್ಪುನ್ ಆಸಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಬಾಬಾಕ್ ಹಾಂವ್ ಆಭಾರಿ
ಬಾಬಾ ಸಂಗಿಂ ಕಾಡ್ಲೆಂ ಹಾಂವೆಂ ಪಯ್ಲೆಂ ಮೇಟ್ ಜಿಣ್ಯೆಚೆಂ
ಹಾತಾಂತ್ ಹಾತ್ ಧರ್‍ನ್ ತಾಣೆಂ ಭರ್‍ಲೆಂ ಬಳ್ ಧೈರಾಚೆಂ
ಜೆದ್ನಾಂ ಪಡ್ತಚ್ ಉಟೊವ್ನ್ ದವ್ರುನ್ ದಿಲೊ ಆಧಾರ್ ಮೊಗಾಚೊ
ಪುರ್‍ತೆಂ ಚಲುಂಕ್ ಶಿಕ್ತಾ ಪರ್‍ಯಾಂತ್ ಜಾಲೊ ತೊ ಪಾಂಕ್ ಪಣ್ಸಾಚೊ
ಬಾಬ್ ತೊ ಮ್ಹಜೊ ಆನಂದ್ ಸದಾಂಚ್ ಮ್ಹಜ್ಯೆ ಜಿಣ್ಯೆಚೊ
ತೊಚ್ ಆಕಾಸ್, ಭುಂಯ್, ಸಕತ್ ಆನಿ ಭರ್ವಸೊ
ದೆವಾನ್ ಫಾವೊ ಕೆಲ್ಲೊ ಈಷ್ಟ್ ಮ್ಹಜ್ಯಾ ಕಾಳ್ಜಾಚೊ
ರಾಕಣ್ ಭಡ್ವೊ, ಆಂಜ್ ಆನಿ ರಕ್ಷಕ್ ಮ್ಹಜ್ಯೆ ಕುಶಿಚೊ
ಬಾಬ್ ತೊ ಮ್ಹಜ್ಯಾ ಭವಿಷ್ಯಾಚ್ಯಾ ರೂಪ್ ರೇಖಾಚೊ ಘಡ್ಣಾರ್
ದಾರ್ಶನಿಕ್, ಸ್ಪೂರ್ತಿ, ಮಾರ್ಗದರ್ಶಕ್ ಆನಿ ಸೂತ್ರದಾರ್
ತಾಣೆ ಕೆಲ್ಲ್ಯೆ ಮ್ಹಿನತೆಕ್, ವಾಂವ್ಟಿಕ್ ತಾಚೊ ಹಾಂವ್ ರಿಣ್ಕಾರಿ
ತಾಚ್ಯಾ ತ್ಯಾಗ್ ಆನಿ ಮಯ್ಪಾಸಾಕ್ ಉರ್‍ತಲೊಂ ಸದಾಂಚ್ ಆಭಾರಿ
- ವಿಜಯ್ ಡಿಕುನ್ಹಾ, ಗುರುವಾಯನಕೆರೆ / ಮಸ್ಕತ್
संपादकीय:
बापायचें काळीज तो मेल्या उप्रांतच कळता
विजय डिकुन्हा पयले फावटीं कविता कुळाराक आयला. बापायविशीं ताणें कविता लिखल्या. आवय विशीं कविता आमी धाराळ वाचतांव. पूण बापायविशीं कविता वाचूंक मेळच्यो उण्यो. आवयचें काळीज एका मनशाक जल्माथावून मेळता. पूण बापायचें काळीज तो मेल्या उप्रांतच कळता.
हांगासरी कविचो बापाय ताका सांडून गेला. ताचो उपकार भावडुंक तो जिवंत आसताना ताच्यान जालें ना कोण्णा. आतां आपलीं उत्रांच कविते मारीफात ताका तो समर्पून आसा.
-मेल्विन रोड्रीगस
कविता:
बाबाक हांव आभारी
बाबा संगीं काडलें हांवें पयलें मेट जिण्येचें
हातांत हात धरन ताणें भरलें बळ धैराचें
जेदनां पडतच उटोवन दवरून दिलो आधार मोगाचो
पुरतें चलुंक शिकता परयांत जालो तो पांक पणसाचो
बाब तो म्हजो आनंद सदांच म्हज्ये जिण्येचो
तोच आकास, भुंय, सकत आनी भर्वसो
देवान फावो केल्लो ईश्ट म्हज्या काळजाचो
राकण भडवो, आंज आनी रक्षक म्हज्ये कुशीचो
बाब तो म्हज्या भविष्याच्या रूप रेखाचो घडणार
दार्शनीक, स्पूर्ती, मार्गदर्शक आनी सूत्रदार
ताणे केल्ल्ये म्हिनतेक, वांवटीक ताचो हांव रिणकारी
ताच्या त्याग आनी मयपासाक ऊरतलों सदांच आभारी
- विजय डिकुन्हा, गुरुवायनकेरे / मस्कत