ಸಂಪಾದಕೀಯ್:
ರಾಜಕೀಯಾಚ್ಯಾ ಗಲೀಜ್ ಖೆಳಾಂತ್ ಗರೀಬ್ ಲೊಕಾಚೊ ಗೋಳ್
ಗಾಂವ್ಚ್ಯಾ ರಾಜಕೀಯಾಚೊ ಗಲೀಜ್ ಖೆಳ್ ಆನಿ ತಾಚೆವರ್‍ವಿಂ ಜಾಂವ್ಚೊ ಗರೀಬ್ ಲೊಕಾಚೊ ಗೋಳ್ ಹೆ ಕವಿತೆಂತ್ಲೊ ಮೊಡ್ಲಲೊ 'ಸಾಂಕೊವ್' ಭಾಯ್ರ್ ಘಾಲ್ತಾ. ಸಗ್ಳ್ಯಾ ಗಾಂವ್ಚೆಂ ಜಿವಿತ್ ದೋನ್ ನಂಯೆಂ ಮದ್ಲ್ಯಾ ಸಾಂಕ್ಯಾಚೆರ್ ಬಾಂದ್ಲಲೆಂ ಆಸೊನ್, ತೊ ಮೊಡ್ಲಲ್ಯಾವೆಳಾರ್ ಕಾಂಯ್ ಘಡನಾತ್‌ಲ್ಲ್ಯಾಬರಿ ಆಮ್ಚ್ಯಾ ರಾಜಕೀಯ್ ಫುಡಾರ್‍ಯಾಂನಿ ವೇಸ್ ಪಾಂಗರ್‍ನ್ ಹೆರಾಂಚೆರ್ ಜೊಕ್ಚಿಂ ಬೊಟಾಂ ಹಾಂಗಾ ರಾಕ್ಸಾಚ್ಯೊ ಮುಟಿ ಕಶ್ಯೊ ಆಮ್ಚ್ಯಾ ಮುಸ್ಕರಾಚೆರ್ ಅಂರ್ದತಾತ್.
ಹೊ ಜಾಂವ್ಕ್ ಪುರೊ ಹೊನ್ನಾವರ್‍ಚೊ ಪೂಲ್ ಯಾ ಬಾರ್ಕೂರ್‍ಚೊ ಸಾಂಕೊವ್ ಯಾ ಮಾಂಡೊವಿ ಆನಿ ಜುಂವಾರಿಚೊ. ಕಿಶೂ ಬಾರ್‍ಕುರಾನ್ ಹೆ ಆಟೆವಿಟೆ ಬೋವ್‌ಚ್ ಲಾಗ್ಶಿಲ್ಯಾನ್ ಪಳೆಲ್ಲ್ಯಾನ್, ಹಿ ಕವಿತೆಚ್ಯಾ ಹರ್‍ಯೆಕಾ ಉತ್ರಾಂನಿ ಹಜಾರಾಂನಿ ಇಮಾಜಿ ಉಬ್ಯೊ ಕರ್‍ಚ್ಯಾಂತ್ ತೊ ಯಶಸ್ವಿ ಜಾಲಾ.
ಅಪ್ರೂಪ್ ವಿಶಯಾಕ್ ಲಾಗೊನ್, ಶೈಲೆಕ್ ಲಾಗೊನ್ ಹಿ ಕವಿತಾ ಕಾಳ್ಜಾಚೆ ಮೆರೆರ್ ಸರಾಗ್ ಪಾಸಾಯೊ ಮಾರುನ್ ರಾವ್‌ಲ್ಲ್ಯಾಂತ್ ನವಲ್ ನಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸಾಂಕೊ ಮೊಡ್ಲಾ ಮಾತ್
ಗಾಂವಾರ್ ಆತಾಂ ಆಕಾಂತ್ ಉಟ್ಲಾ
ಬೊಬೋ ಉಟ್ಲ್ಯಾತ್ ಲಾಕ್
ಗಾಂವ್ಚೆಂ-ಮುಂಗಾ ಪೆಂಕಾಡ್ ಮೊಡ್ಲಾಂ
ಮಂತ್ರಿ ಸಾಯ್ಬಾ ರಾಕ್
ಅನ್ವಾರಾಂಚೆಂ ಕೊಳ್ಸುಲ್ ಫುಟ್ಲಾಂ
ದೆವಾ ಆಮ್ಚ್ಯಾ ಸರ್‍ವೆಸ್ಪೊರಾ
ಪೊರ್‍ಚೆ ರಾತಿಂ ಸಾಂಕೊ ತುಟ್ಲಾ
ನಿವಾರ್ ಸಾಯ್ಬಾ ಸೊಡ್ವೊಣ್ದಾರಾ
ಆಕಾಂತ್ ಕಿತ್ಯಾಕ್, ಕಿತ್ಯಾಕ್ ಬೊಬೋ
ಮೋಡ್ ಮಾತ್ಯಾರ್ ಮಾಂಡ್ಲಾಂ
ಹಾಂವ್-ಗಾ ಭೆಷ್ಟೊಚ್ ಚಿಂತುನ್ ಉಬೊ
ಕಾಳೀಜ್ ಘಾಮಾನ್ ಬುಡ್ಲಾಂ
ಪಯ್ಲಿಚ್ ನ್ಹಯ್‌ಗಿ ಯೇರ್ ಆಯಿಲ್ಲಿ
ಆಲ್ತಡ್ ಪಲ್ಟಡ್ ವಿಂಗಡ್ ಜಾಲ್ಲಿ
ನಾಂವಾ ತೆಕಿದ್ ಸಾಂಕೊ ಆಸ್ಲೊ
ಗಾಂವಾರ್ ಆಮ್ಚ್ಯಾ ಎಕ್ವಟ್ ನಾಸ್ಲೊ
ಮಾಯಾಮೊಗಾ ಮಾಸಾಂ ಖಿರುನ್
ಉರ್‌ಲ್ಲಿ ಫಕತ್ ಕಾತ್
ಆತಾಂ ತರ್‌ಯ್ ಜಾಲ್ಲೆಂ ಕಿತೆಂ
ಸಾಂಕೊ ಮೊಡ್ಲಾ ಮಾತ್!
ತೆನ್ನಾಂಚ್ ನ್ಹಯ್‌ಗಿ ಪಡ್‌ಲ್ಲಿಂ ಮೊಡಿಂ
ಜಾತಿ ಕಾತಿ ಮ್ಹಣೊನ್ ಥೊಡಿಂ
ಭೆಷ್ಟೊಚ್ ಉಬೊ ಆಸ್ಲೊ ಸಾಂಕೊ
ಕೊಣ್ ಕೊಣಾಕ್ ದಿತಲೊ ತೆಂಕೊ?
ಮನ್ಶಾಪಣ್‌ಚ್ ಕುಡ್ಡೆಂ ಜಾವುನ್
ದೆವಾಕ್‌ಚ್ ಜಾಲ್ಲೊ ಘಾತ್
ಆತಾಂ ತರ್‌ಯ್ ಜಾಲ್ಲೆಂ ಕಿತೆಂ
ಸಾಂಕೊ ಮೊಡ್ಲಾ ಮಾತ್!
ದುಬ್ಳ್ಯಾ ಧಾಕ್ಟ್ಯಾಂ ಘರಾಂ ಮೊಡ್ತಲೆ
ಗಿರೇಸ್ತ್ ಗಿರೇಸ್ತ್ ಜಾವ್ನ್‌ಚ್ ಗೆಲೆ
ಲೊರಿಯೆ ಜಡಾಯ್ ಭೆಷ್ಟೆಂಚ್ ನೀಬ್
ಸಾಂಕ್ಯಾಕ್ ವೊಡ್ಲ್ಯಾರ್‌ಯ್ ನಾತ್‌ಲ್ಲಿ ಜೀಬ್
ನೈತಿಕ್ ಮೊಲಾಂ ಉಬೊನ್ ಗೆಲ್ಲಿಂ
ದಿವುನ್ ಹಾಂಕಾಂ ಲಾತ್
ಆತಾಂ ತರ್‌ಯ್ ಜಾಲ್ಲೆಂ ಕಿತೆಂ
ಸಾಂಕೊ ಮೊಡ್ಲಾ ಮಾತ್!
ಆಕಾಂತ್ ಕಿತ್ಯಾಕ್, ಕಿತ್ಯಾಕ್ ಬೊಬೋ
ನವೆಂ ಕಾಂಯ್ ತರ್‌ಯ್ ಘಡ್ಲಾಂ
ಹಾಂವ್‌ಗಾ ಭೆಷ್ಟೊಚ್ ಚಿಂತುನ್ ಉಬೊ
ಕಾಳೀಜ್ ಘಾಮಾನ್ ಬುಡ್ಲಾಂ!
- ಕಿಶೂ, ಬಾರ್‍ಕೂರ್