ಸಂಪಾದಕೀಯ್:
ಫಾಲ್ಯಾಂಚ್ಯಾ ಜೈತಾಖಾತೀರ್ ಆಜ್ ಕಾಳೀಜ್ ಕಾಯ್ಲೆಚೆರ್ ಭಾಜೊಂಕ್ ಸೊಡ್ಚೆ ಮನೀಸ್
ಜಿವಿತಾಚ್ಯಾ ಸೊರ್ಮುಣಾಂತ್ ಕಣ್ಗಿ ಉಕಡ್ಲಲ್ಯಾಬರಿ ಭಾಜೊನ್ ವಚೊನ್, ವಾಂಚಜೆ ಮ್ಹಳ್ಳೊ ನಿಚೆವ್ ಕರುನ್ ಪರ್ಗಾಂವ್ಚಿ ವಾಟ್ ಧರ್‌ಲ್ಲ್ಯಾ ತರ್‍ನ್ಯಾ ಪ್ರೇಮಿಚೆಂ ಕಾಳೀಜ್ ಭಾಜೊನ್ ವೆಚೆಂ ಹೆ ಕವಿತೆಂತ್ ಉಟೊನ್ ದಿಸ್ತಾ. ಮೋಗ್ ಆನಿ ಜಿವಿತಾ ಮಧ್ಲ್ಯಾ ಝುಜಾಂತ್ ಕೋಣ್ ಕೆದಳಾ ಜಿಕ್ತಾ ಆನಿ ಹಾರ್‍ತಾ ಮ್ಹಳ್ಳೆಂ ಸಾಂಗೊಂಕ್ ಕಷ್ಟ್. ಪುಣ್ ತಸಲೆ ಪರಿಗತೆಚಿ ಜಾಣ್ವಿಕಾಯ್ ಆಸೊನ್‌ಯ್ ಫಾಲ್ಯಾಂಚ್ಯಾ ಜೈತಾಖಾತೀರ್ ಆಜ್ ಕಾಳೀಜ್ ಕಾಯ್ಲೆಚೆರ್ ಭಾಜೊಂಕ್ ಸೊಡ್ಚೆಂ ಹಿ ಕವಿತಾ ದಾಕಯ್ತಾ.
ವಿಲ್ಫಿ ಕಿನ್ನಿಗೋಳಿ ಪಯ್ಲೆಚ್ ಪಾವ್ಟಿಂ ಕವಿತಾ ಕುಳಾರಾಕ್ ಆಯ್ಲಾ ತರೀ, ತೊ ಆಮ್ಕಾಂ ಪಯ್ಶಿಲೊ ನ್ಹಯ್. ಆಮ್ಚ್ಯಾ ವಾವ್ರಾಚಿ ತೋಖ್ಣಾಯ್ ಕರೀತ್ ಆಸ್ಚೊ ಕವಿ. ಸ್ವತಾ ಪದಾಂ ಘಡ್ತಾ ಆನಿ ಸಂಗೀತ್ ಬಸಯ್ತಾ ಜಾಲ್ಲ್ಯಾನ್ ಆಮ್ಚ್ಯಾ ಮಿಸಾಂವಾಚೆ ವಾಟೆರ್ ತಾಚೊ ಸಹಯೋಗ್ ಆಮ್ಕಾಂ ಭಿಲ್ಕುಲ್ ಜಾಯ್.
ಹಿ ಕವಿತಾ ಪರ್ಗಾವಾಂತ್ಲ್ಯಾ ಲ್ಹಾನಾಂಚಿಂ ತಶೆಂ ವ್ಹಡಾಂಚಿ ಕಾಳ್ಜಾಂ ಜಿಕ್ತಲಿ ಮ್ಹಣ್ ಸಾಂಗೊಂಕ್ ಕುಸ್ಕುಟ್ ದುಭಾವ್ ಮ್ಹಾಕಾ ಉರೊಂಕ್ ನಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮೊಗಾ ಮನಾಂತ್ಲಿಂ ಸವಾಲಾಂ
ಸಾತ್ ಸಮ್ದಿರ್ ಉತ್ರೊನ್ ಆಯ್ಲಾಂ
ಹಾಂವ್ ಜಾಣಾಂ, ತೂಂಯ್ ಜಾಣಾ೦ಯ್
ಪುಣ್
ಮನ್ ಕಿತ್ಯಾಕ್ ಆಯ್ಕನಾ?
ಫುಡಾರ್ ಜಾಯ್ ಪಯ್ಶೆ ಜಾಯ್
ಘರ್ ಆಸ್ತ್-ಬದಿಕ್ ಜಾಯ್
ಪುಣ್
ನಶಿಬ್ ಕಿತ್ಯಾಕ್ ಫಳ್ಸನಾ?
ಗಾಂವಾಂತ್ ಆಮ್ಚೊ ವ್ಹಡ್ ವ್ಹಯ್ವಾಟ್
ತೊಟಾಂ-ಭಾಟಾಂ, ಇಟಾಳ್ ಶೆತಾಂ
ತರೀ
ಪಾವ್ಲಾಂ ಕಿತ್ಯಾಕ್ ಪರ್ಗಾಂವಾಕ್?
ಮಾಸಾಂ, ಜೆವ್ಣಾಂ, ರುಚಿಕ್ ರಾಂದ್ಪಾಂ
ಘರ್‍ಚ್ಯಾ ಜೆವ್ಣಾಂತ್ ಸದಾಂಚ್ ಕುಲ್ಪಾಂ
ತರೀ
ತೆಂಚ್ ಕಿತ್ಯಾಕ್ ಆಶೆತಾಂ?
ಮೋಗ್ ಕೆಲೊ, ಮೋಗ್ ಘೆತ್ಲೊ
ಸಂಸಾರ್ ಸಗ್ಳೊ ಸೊಭಿತ್ ದಿಸ್ಲೊ
ಪುಣ್
ಹಕೀಗತ್ ಕಿತ್ಯಾಕ್ ವೊಳ್ಕನಾ?
ಭಾಸ್ ಹಾಂವೇಂಯ್ ತುಂವೇಂಯ್ ದಿಲ್ಯಾ
ಪಾದ್ರಿಕ್ ಆಪಂವ್ಕ್ ನಾ ತ್ಯಾ ವಗ್ತಾ
ದೆಕುನ್
ಸಮಾಜ್ ಆತಾಂ ಅಶೇಂಯ್ ಧೊಸ್ತಾ?
ಎಕ್ಸುರೊ ದರ್ಯಾವೆಳೆರ್ ಆಸಾಂ
ಸವಾಲಾಂ ವಯ್ರ್ ಸವಾಲಾಂ ಧೊಸ್ತಾತ್
ತರೀ
ಜಾಪ್ ಕಿತ್ಯಾಕ್ ಮೆಳನಾ?
ಮೊಗಾ ತುಕಾ ಆಸಾಂ ರಾಕೊನ್
ಜಾಣಾಂ ಹಕೀಗತೆಂತ್ ಮೆಳ್ನಾಂಯ್ ಮ್ಹಣೊನ್
ತರೀ
ಸ್ವಪ್ಣಾಂತ್ ತರೀ ಯೇಗೊ ವೆಂಗೊನ್
ಉಮ್ಯಾ ರೆಕಾದ್ ಪಾಟವ್ನ್ ಆಸಾಂ
ಕೆಸಾಂತ್ ತುಜ್ಯಾ ಖೆಳೊನ್ ಆಸಾಂ
ಸ್ವಪಣ್ ಮ್ಹಜೆಂ ಖರೆಂ ಜಾಂವ್
ವೆಗಿಂಚ್ ಆಮ್ಚೆಂ ಮಿಲನ್ ಜಾಂವ್
-ವಿಲ್ಫಿ ಕಿನ್ನಿಗೋಳಿ, ಆಬುಧಾಬಿ