ಹೊ ಸಂಸಾರು

ಸಂಪಾದಕೀಯ್:

ಕೊಂಕಣಿ ಕವಿತ್ವಾಚಿ ಗಿರೇಸ್ತ್‌ಕಾಯ್ ಗಾಜಂವ್ಚಿ ಅರುಣಾಬಾಯೆಚಿ ಕವಿತಾ

ಕವಿತಾ ಮ್ಹಳ್ಯಾರ್ ಅಶಿ ಆಸಜೆ, ಕಾಪ್ಸಾಚೆ ಬೊಂಡಿಯೆಭಾಶೆನ್. ಏಕ್ ಪಾವ್ಟಿಂ ಬೊಂಡಿ ಫುಟ್ಲಿ ಆನಿ ಕಾಪುಸ್ ವಾರ್‍ಯಾರ್ ಫಾಸಾಳ್ಳೊ, ತಶೀಚ್ ಕವಿತಾ ಏಕ್ ಪಾವ್ಟಿಂ ವಾಚ್ಲ್ಯಾ ಉಪ್ರಾಂತ್ ಕಾಪ್ಸಾಬರಿ ತಾಂತ್ಲ್ಯಾನ್ ಉಟ್ಚ್ಯೊ ಇಮಾಜ್ಯೊ ಮನಾಚ್ಯಾ ಅಂತ್ರಳಾಚೆರ್ ಉಬೊನ್‌ಚ್ ಆಸಜೆ. ಬೋವ್ ಸಾದ್ಯಾ ಉತ್ರಾಂನಿ ಬೋವ್ ಉಂಚ್ಲೆಂ, ಅಪ್ರೂಪ್ ಚಿಂತಪ್ ಹಾಂಗಾಸರ್ ಸಾದರ್ ಜಾಲಾಂ.

ಅನ್ಭೋಗಾಂಚೆ ಝರಿಂನಿ ಸುಶೆಗಾತ್ ನ್ಹಾಲ್ಲ್ಯಾ ಅರುಣಾ ಬಾಯೆ ತಸಲ್ಯಾಂಕ್ ಮಾತ್ರ್ ಅಸಲೆಂ ಏಕ್ ಚಿಂತಪ್ ಯೇಂವ್ಕ್ ಸಾಧ್ಯ್ ಆಸಾ.

ಅರುಣಾ ರಾವ್ (ಕುಂದಾಜೆ) ಭುರ್ಗ್ಯಾಂ ಖಾತಿರ್ ಚಡಿತ್ ಕವಿತಾ ಬರಯ್ತಾ. ನಾಟಕಾಂ ಬರಂವ್ಚ್ಯಾಂತ್‌ಯ್ ತಿ ಫಾಮಾದ್. ಆಗ್ರಾ ಘರಾಣಾ ಪದ್ದತಿಚೆರ್ ತಿಣೆ ಹಿಂದುಸ್ತಾನಿ ಗಾಯನಾಂಚಿ ತರ್ಬೆತಿ ಜೊಡ್ಲ್ಯಾ ಆನಿ ಧಾರಾಳ್ ಬಂಧಿಷಾಂ ರಚ್ಲ್ಯಾಂತ್.

ಅಂತರ್‌ಜಾಳಿಚೆರ್ ತಿಚ್ಯೊ ಜಾಯ್ತ್ಯೊ ಕವಿತಾ ವಾಚುಂಕ್ ಮೆಳ್ತಾತ್ ತರೀ ಆಮ್ಚ್ಯಾ ಉಲ್ಯಾಕ್ ಪಾಳೊ ದೀವ್ನ್ ಪಯ್ಲೆ ಪಾವ್ಟಿಂ ತಿ 'ಕವಿತಾ ಕುಳಾರಾ'ಕ್ ರಾವೊಂಕ್ ಆಯ್ಲ್ಯಾ. ತಿಚಿ ಕವಿತಾ ಸರ್ವಯ್ ಆಮ್ಚ್ಯಾ ಕವಿಂಕ್ ಹುಮೆದಿಚಿಂ ವೊಕ್ತಾಂ ದೀಂವ್ ಆನಿ ಹ್ಯಾವರ್ವಿಂ ಕವಯಿತ್ರಿಂಚೆಂ ಬಳ್ ವಾಡೊಂ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಹೊ ಸಂಸಾರು

ಹೊ ಸಂಸಾರು ಏಕ್ ಕಾಪ್ಸಾ ಬೊಂಡಿ
ಫೂ ಫುಂಕ್ಲ್ಯಾರ್ ಉಬ್ತಾ
ಸಂಸಾರು ಏಕ್ ಮೋಕ್ಷಾ ಕಂಡಿ
ದೇವ್ ಸೊದ್ಲ್ಯಾರ್ ದಿಸ್ತಾ

ಧರ್‍ಲ್ಯಾರ್ ಯೆತ್ತಾ ಸೊಳ್ಳ್ಯಾರ್ ವತ್ತಾ
ಹೊ ಸಂಸಾರು
ಕೆಲ್ಯಾರ್ ಕರ್‍ಯೇತ್ ಕಿತ್ಲೇಂಯ್ ಸಾರ್ಥಕ್
ನ್ಹೆಲ್ಯಾರ್ ಮಾತ್ಯಾರ್ ಭಾರು

ಸಂಸಾರಾಚ್ಚೆಂ ಏಕಚಿ ವರ್ಮ್
ಚಾಂಗ್ ಕರ್ಮ್ ತೋಚಿ ಧರ್ಮ್
ದುಸ್ರೆಂ ದೈವತ್ ನಾ
ಆಪ್ಣಾಲೊ ಸಂಸಾರ್ ದುಸ್ರ್ಯಾಂಲ್ ಸಂಸಾರ್
ಏಕ್ ಕಾರಂಡಿ
ದೊನೀ ರುಪ್ಪಾಂ ನಾ!

- ಅರುಣಾ ರಾವ್, ಕುಂದಾಜೆ

(ಬೊಂಡಿ=a cotton bulb; ಕಂಡಿ= window; ಕಾರಂಡಿ= mirror; ನ್ಹೆಲ್ಯಾರ್= if not; ಚಾಂಗ್=good)