ಸಂಪಾದಕೀಯ್:
ಲೊಕ್ಡೌನಾನ್ ಸಗ್ಳೇಂಯ್ ನವ್ಯಾನ್ ಚಿಂತುಂಕ್ ಚಿಮ್ಟೊ ಕಾಡ್ಲಾ
ಕಾಂಯ್ ಥೊಡ್ಯಾಚ್ ದಿಸಾಂ ಭಿತರ್ ಸ್ವರ್ಗ್-ದೇವ್, ಭುಕ್-ಖಾಣ್, ಕೂಡ್-ನ್ಹೆಸಣ್, ಸ್ವಾಸ್-ಪ್ರಕೃತಿ, ಮನೀಸ್-ಮನ್ಶಾಪಣ್ - ಅಶೆಂ ಜಾಯ್ತ್ಯಾ ಸಂಗ್ತಿಂಚೆ ಅರ್ಥ್ ಬದ್ಲುನ್ ಗೆಲ್ಯಾತ್. ಯೆದೊಳ್ ಹ್ಯೆ ಸಂಗ್ತಿಂ ಖಾತೀರ್ ಆಮಿ ದಿಂವ್ಚೆಂ ಮೊಲ್, ವಜನ್ ಸಗ್ಳೆಂ ಬದ್ಲುನ್ ಗೆಲಾಂ.
ಲೊಕ್ಡೌನಾಚ್ಯೆ ಪಾಟ್ಭುಂಯ್ಚೆರ್ ರೋಶು ಬಜ್ಪೆನ್ ಹಿ ಸುಂದರ್ ಕವಿತಾ ಲಿಖ್ಲ್ಯಾ. ’ತೀಂತ್ ಜಾಲೆಂ ರಗತ್’ ಪುಸ್ತಕಾ ಮಾರಿಫಾತ್ ಕಾವ್ಯಶೆತಾಂತ್ ಬಳ್ವಂತ್ ಪಾವ್ಲಾಂ ರೊಂಬಯಿಲ್ಲ್ಯಾ ರೋಶು ಬಜ್ಪೆಚ್ಯಾ ಕವಿತಾಂವಿಶಿಂ ಗಾಂವಾಂ ಥಾವ್ನ್ ಮಾತ್ ನ್ಹಯ್ ಗೊಂಯಾಂ ಥಾವ್ನ್ ಸಯ್ತ್ ಜಾಯ್ತ್ಯಾಂನಿ ಮ್ಹಾಕಾ ಗುಣ್ಗಾನ್ ಕರುನ್ ಸಂದೇಶ್ ಧಾಡ್ಲ್ಯಾತ್. ತಾಚಿಂ ಭುಜಾಂ ಚ್ಯಾರ್ ಜಾಂವ್ ಆನಿ ಕೊಂಕಣಿಚಿಂ ಆಟ್ರಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಜಾಣಾ ಜಾ
ದೆವಾಚ್ಯಾಕೀ ಪಯ್ಲೆಂ
ತಾಕಾ ಮೆಳುಂಕ್ ವೆಚ್ಯೆ
ವಾಟೆವಿಶಿಂ ಜಾಣಾ ಜಾಂವ್ಚೆಂ ಬರೆಂ
ಕಿತ್ಯಾಕ್
ತಾಕಾ ಖಾಂದಾರ್ ಘೆವ್ನ್ ಪುರ್ಶಾಂವ್ ಕಾಡ್ಲೆಲ್ಯಾ
ತ್ಯಾಚ್ ರಸ್ತ್ಯಾನ್
ಆಜ್ ತಾಕಾ ಭೆಟುಂಕ್ ವೆಚ್ಯೊ
ಸಕ್ಕಡ್ ವಾಟೊ ಬಂಧ್ ಕೆಲ್ಯಾತ್
ಖಾಣಾಂಚ್ಯಾಕೀ ಪಯ್ಲೆಂ
ಜಿವಾವಿಶಿಂ ಜಾಣಾ ಜಾಂವ್ಚೆಂ ಬರೆಂ
ಕಿತ್ಯಾಕ್
ಆಂಗಾಲಾಪಾನ್ ಖಾವ್ನ್ ವಿಭಾಡ್ಲೆಲ್ಯಾ
ತ್ಯಾಚ್ ಖಾಣಾಂನಿ
ಆಜ್ ಭುಕೆನ್ ವಳ್ವಳಾಶೆಂ ಕೆಲಾಂ
ನ್ಹೆಸ್ಣಾಚ್ಯಾಕೀ ಪಯ್ಲೆಂ
ಕುಡಿವಿಶಿಂ ಜಾಣಾ ಜಾಂವ್ಚೆಂ ಬರೆಂ
ಕಿತ್ಯಾಕ್
ನ್ಹೆಸಣ್ ಆಸುನ್ಯ್, ವಿಣ್ಗೆಂ ಭೊಂವ್ತೆಲ್ಯಾಂಚ್ಯೊ ಕುಡಿ
ತ್ಯಾಚ್ ನ್ಹೆಸ್ಣಾಂನಿ
ಗುಟ್ಲಾವ್ನ್ ಮಾತಿಯೆಕ್ ಪಾಯ್ಲ್ಯಾತ್
ವಾಪರ್ಚ್ಯಾಕೀ ಪಯ್ಲೆಂ
ಪ್ರಕೃತೆ ಸಂರಕ್ಷಣಾವಿಶಿಂ ಜಾಣಾ ಜಾಂವ್ಚೆಂ ಬರೆಂ
ಕಿತ್ಯಾಕ್
ವರ್ಸಾಂ ಆದಿಂ ಸಾಂಡುನ್ ಗೆಲ್ಲೆಂ ನಿತಳ್ ವಾರೆಂ
ಆಜ್ ಪರತ್ ಆಯ್ಲ್ಯಾರೀ
ನಾಕಾಕ್ ಕುಡ್ಕೊ ಬಾಂಧ್ಚೆಬರಿಂ ಕೆಲಾಂ
ಸಕ್ಡಾಂಪ್ರಾಸ್ ಗರ್ಜೆಚೆಂ
ಮನ್ಶಾಚ್ಯಾಕೀ ಪಯ್ಲೆಂ
ಮನ್ಶಾಪಣಾವಿಶಿಂ ಜಾಣಾ ಜಾಂವ್ಚೆಂ ಬರೆಂ
ಕಿತ್ಯಾಕ್
ಮನ್ಶಾಕ್ ನಾಸ್ ಕರುಂಕ್
ದಾಂಡೊ, ಸುರಿ, ಬಂದೂಕ್, ಬಾಂಬ್
ವಾಪರ್ಲೆಲ್ಯಾ ಮನ್ಶಾ ಥಾವ್ನಚ್
ಆಜ್ ಫಕತ್ ತಾಕಾ ಆಪ್ಡುನ್
ನಾಸ್ ಜಾಂವ್ಚೆ ದೀಸ್ ಉದೆಲ್ಯಾತ್.
-ರೋಶು ಬಜ್ಪೆ
संपादकीय:
लॉकडौनान सगळेंय नव्यान चिंतूंक चिमटो काडला
कांय थोड्याच दिसां भितर स्वर्ग-देव, भूक-खाण, कूड-न्हेसण, स्वास-प्रकृती, मनीस-मनशापण - अशें जायत्या संगतिंचे अर्थ बदलून गेल्यात. येदोळ ह्ये संगतीं खातीर आमी दिंवचें मोल, वजन सगळें बदलून गेलां.
लॉकडौनाच्ये फाटभुंयचेर रोशू बजपेन ही सुंदर कविता लिखल्या. ’तींत जालें रगत’ पुस्तका मारीफात काव्यशेतांत बळवंत पावलां रोंबयल्ल्या रोशू बजपेच्या कवितांविशीं गांवां थावन मात न्हय गोंयां थावन सयत जायत्यांनी म्हाका गूणगान करून संदेश धाडल्यात. ताचीं भुजां च्यार जांव आनी कोंकणिचीं आटरा.
-मेल्विन रोड्रीगस
कविता:
जाणा जा
देवाच्याकी पयलें
ताका मेळूंक वेच्ये
वाटेविशीं जाणा जांवचें बरें
कित्याक
ताका खांदार घेवन पुरशांव काडलेल्या
त्याच रस्त्यान
आज ताका भेटूंक वेच्यो
सक्कड वाटो बंध केल्यात
खाणांच्याकी पयलें
जिवाविशीं जाणा जांवचें बरें
कित्याक
आंगालापान खावन विभाडलेल्या
त्याच खाणांनी
आज भुकेन वळवळाशें केलां
न्हेसणाच्याकी पयलें
कुडीविशीं जाणा जांवचें बरें
कित्याक
न्हेसण आसुनय, विणगें भोंवतेल्यांच्यो कुडी
त्याच न्हेसणांनी
गुटलावन मातयेक पायल्यात
वापरच्याकी पयलें
प्रकृते संरक्षणाविशीं जाणा जांवचें बरें
कित्याक
वरसां आदीं सांडून गेल्लें नितळ वारें
आज परत आयल्यारी
नाकाक कुडको बांधचेबरीं केलां
सकडांपरास गरजेचें
मनशाच्याकी पयलें
मनशापणाविशीं जाणा जांवचें बरें
कित्याक
मनशाक नास करुंक
दांडो, सुरी, बंदूक, बॉंब
वापरलेल्या मनशा थावनच
आज फकत ताका आपडून
नास जांवचे दीस उदेल्यात.
-रोशू बजपे