ಸಂಪಾದಕೀಯ್:
ವಾದಳಾಚ್ಯಾ ದಾವ್ಲ್ಯಾಂಕ್ ಶಿರ‍್ಕನಾಸ್ತಾಂ ಸುರಕ್ಷಿತ್ ಕಶೆಂ ಉರ‍್ಚೆಂ?
ವಾದಳ್ ಆಯ್ಲೆಂ ಮ್ಹಣ್ ಜಾಲೆಂ ತರ್, ತಾಕಾ ಆಡಾಂವ್ಕ್ ಕೊಣಾಚ್ಯಾನ್ ಜಾಯ್ನಾ. ಸದ್ದ್ಯಾ ಅಂಫಾನ್ ವಾದಳಾಕ್ ಲಾಗುನ್ ಲೋಕ್ ಥರ್ಥರ‍್ಲಾ. ವಾದಳ್ ಕೊರೊನಾಚೆಂ ಜಾಂವ್ಕ್ ಪುರೊ, ವಾದಳ್ ಕೊಣಾ ಎಕ್ಲ್ಯಾಚ್ಯಾ ಜಿವಿತಾಂತ್ಲೆಂ ಬೋವ್ ವಯುಕ್ತಿಕ್ ಜಾಂವ್ಕ್ ಪುರೊ. ತೆಂ ಯೆತಾನಾ ತಾಕಾ ಹರ್ಧೆಂ ದೀಂವ್ಕ್ ಕೊಣಾಚ್ಯಾನ್ ಸಾಧ್ಯ್ ನಾ.
ಆಮಿ ಇತ್ಲೆಂಚ್ ಕರುಂಯೆತಾ, ಗರ್ಜೆಕ್ ಪಡನಾತಲ್ಲ್ಯೊ ಸಂಗ್ತಿಂ ಕುಶೀಕ್ ತಾಂಡುನ್ ಗರ್ಜೆಚ್ಯಾ ಥೊಡ್ಯಾ ಸಂಗ್ತಿಂಕ್ ಮಾತ್ರ್ ಪೊಟ್ಲುನ್ ಧರುನ್ ಥಿರಾಸಾಣ್ ಸಾಂಬಾಳುನ್ ಜಿವಿತಾಂತ್ ಫುಡೆಂ ಸರುಂಯೆತಾ.
ಜಿವಿತಾಕ್ ಗರ್ಜೆಚೆಂ ಬೋವ್ ಮೊಲಾಧಿಕ್ ಥಿಕ್ ಘೆವ್ನ್ ಹ್ಯೆ ಕವಿತೆ ಮಾರಿಫಾತ್ ಸಂಜಯ್ ಬೋರ್ಕರ್ ಹಾಂಗಾಸರ್ ಆಯ್ಲಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ವಾದಳ್
ತೆಂ ವಾದಳ್
ಜಲ್ಮತಾಚ್ ಉದ್ರೇಕ್ ಘೆವ್ನ್
ತೆಂ ಜಗಾರ್ ಹೆಡ್ಟಾ.
ಜಲ್ಮತಾಚ್;
ಕುನ್ನಾಟೆಪಣಾನ್ ವಾಗ್ತಾ.
ತೆಚ್ಯೆ ವಾಟೆಕ್ ವಚಪ್ ನಾ.
ತೆಕಾ ಹಡ್ಡೆಂ ದಾಖೊವ್ಪ್ ಚಲನಾ.
ತಾಚ್ಯಾ ಬದ್ಲಾ,
ಘರಾ ಕುಶೀಕ್ ವಾಡಿಲ್ಲಿಂ ಝಾಡಾಂ,
ಇಲ್ಲಿಂ ಮೊಟ್ವಿಂ ಕರ‍್ಚಿಂ.
ಘರಾರ್ ಪಡ್ಚಿಂ ನ್ಹಯ್ ಇತ್ಲಿಂ.
ಪುಣ್, ಮಾರ‍್ಚಿಂ ನ್ಹಯ್.
ತೆಕಾ ಖೋಸ್ ಜಾತಲಿ,
ಅಶೆಂ ಕಾಂಯಿಂಚ್ ಕರ‍್ಚೆಂ ನ್ಹಯ್.
ಹಿಂ ಭಿಜೂಡ್‌ಪಣಾಂ ನ್ಹಯ್.
ಪುಣ್ ವಾದಳಾ ಕಡೆನ್,
ವಾದ್ ಘಾಲುನ್ ಉದ್ರೇಕ್ ಥಾಂಬನಾ.
ತೆಂ ಜಲ್ಮತಲೆಂ
ಆನಿ ರೊಖ್ಡೆಂಚ್ ಮರ‍್ತಲೆಂ.
ಘಡ್ಯೆ ಹೆಚೊಚ್ ತೆಕಾ ರಾಗ್.
ಝಾಡಾಂ ಖೂಬ್ ಜಗ್ತಾ,
ಹುಮ್ಟಲಿಂನಾ ಜಾಲ್ಯಾರ್.
ವಾದಳ್,
ದಿಸನಾಶಿಲ್ಲಿ ಶಕ್ತ್.
ತೆಕಾ ಕಿತ್ಲೆಶೇಚ್ ಮಾರ್ಗ್.
-ಸಂಜಯ್ ಬೋರ್ಕರ್
ಹೆಡಪ್= ಕಾಂಯ್ ಕಾಮ್ ನಾತಲ್ಲೆಬರಿ ಭೊಂವಪ್.
ಕುನ್ನಾಟ್ಪಣ್= ದುಸ್ರ್ಯಾಂಚೆಂ ಬರೆಂ ಪಳೆಂವ್ಕ್ ಜಾಯ್ನಾ ಅಶೆಂ.
संपादकीय:
वादळाच्या दावल्यांक शिरकनासतां सुरक्षीत कशें उरचें?
वादळ आयलें म्हण जालें तर, ताका आडांवक कोणाच्यान जायना. सद्या अंफान वादळाक लागून लोक थरथरला. वादळ कोरोनाचें जांवक पुरो, वादळ कोणा एकल्याच्या जिवितांतलें बोव वयुक्तीक जांवक पुरो. तें येताना ताका हरधें दींवक कोणाच्यान साध्य ना.
आमी इतलेंच करुंयेता, गरजेक पडनातल्ल्यो संगती कुशीक तांडून गरजेच्या थोड्या संगतींक मात्र पोटलून धरून थिरासाण सांबाळून जिवितांत फुडें सरुंयेता.
जिविताक गरजेचें बोव मोलाधिक थिक घेवन ह्ये कविते मारीफात संजय बोरकार हांगासर आयला.
-मेल्विन रोड्रीगस
कविता:
वादळ
तें वादळ,
जल्मताच उद्रेक घेवन.
तें जगार हेडटा.
जल्मताच;
कुन्नाटेपणान वागता.
तेच्या वाटेक वचप ना.
तेका हड्डें दाखोवन चलना.
ताच्या बदला,
घरा कुशीक वाडिल्लीं झाडां,
इल्लीं मोटवीं करचीं.
घरार पडचीं न्हय इतलीं.
पूण, मारचीं न्हय.
तेका खोस जातली,
अशें कांयच करचें न्हय.
हीं भिजूडपणा न्हय.
पूण वादळा कडेन,
वाद घालून उद्रेक थांबना.
तें जल्मतलें
आनी रोखडेंच मरतलें.
घडये हेचोच तेका राग.
झाडां खूब जगता,
हुमटलींना जाल्यार.
वादळ,
दिसनाशिल्ली शक्त.
तेका कितलेशेच मार्ग.
- संजय बोरकार