ಸಂಪಾದಕೀಯ್:
ಕೊಣಾಯ್ಚಿಂ ಮನಾಂ ವೊಡ್ಚೊ ಜಾದೂ ಹ್ಯಾ ತಾಳ್ಯಾಂನಿ ಆಸ್ತಾ
ಜಿವಿತಾಂತ್ ಅಸಲೊ ಜಾದೂ ಕರ‍್ಚ್ಯಾ ತಾಳ್ಯಾಂಕ್ ಕಮೀ ನಾ. ಹ್ಯಾ ತಾಳ್ಯಾಂತ್ಲಿ ಮಧುರತಾ ಇತ್ಲಿಕೀ, ತೆವ್ಶಿಲ್ಯಾನ್ ಕಸಲ್ಯೋಯ್ ಚುಕಿ ಜಾಲ್ಯೊ ಜಾಲ್ಯಾರೀ, ತ್ಯೊ ಸೊಸುನ್ ವ್ಹರ‍್ಚಿ ತಾಂಕ್ ಆಮಿ ಆಪ್ಣಾಯ್ತಾಂವ್. ತ್ಯಾ ತಾಳ್ಯಾಂತ್ಲ್ಯಾ ಗೊಡ್ಶಾ ಮೆಲಾಂಕ್ ಆಮಿ ಘಡ್ಯೆನ್ ಚಿಡ್ಕುನ್ ವೆತಾಂವ್.
ಗಾಂವಾಂತ್ ಆತಾಂ ಆಯಿಲ್ಲ್ಯಾ ವೈರಸಾಚ್ಯಾಕಿ, ಖಿಣಾ ಖಿಣಾಕ್ ಆಪ್ಲ್ಯಾ ಜಾದ್ವಾನ್ ಆಮ್ಕಾಂ ಪಿಶ್ಯಾರ್ ಘಾಲ್ಚೆಂ ಹೆಂ ವೈರಸ್ ಕಠಿಣ್ ಆಪಾಯಾಚೆಂ ಮ್ಹಣುನ್ ಹಿ ಕವಿತಾ ಸಾಂಗ್ತಾ.
ವಿನ್ಸಿ ಪಿಂಟೊ ಆಂಜೆಲೊರ್ ಜಾಯ್ತ್ಯಾ ತೆಂಪಾ ಉಪ್ರಾಂತ್ ಕವಿತಾ ಕುಳಾರಾಕ್ ಆಯ್ಲಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ತುಮ್ಚ್ಯಾ ತಾಳ್ಯಾಂತ್
ತುಮ್ಚ್ಯಾ ತಾಳ್ಯಾಂತ್ ಆಸಾ ಜಾದೂ
ಕೆದ್ನಾಂಯ್ ಮ್ಹಜೆಂ ಮನ್ ವೊಡೂಂ
'ಕೃಪಯಾ ರಾಜಧಾನಿ ಎಕ್ಸ್‌ಪ್ರೆಸ್
ಧೇರಿ ಸೆ ಚಲ್ ರಹೀ ಹೈ, ಹಮೇ... ಖೇದ್ ಹೈ...'
ಉತ್ರಾಂಚ್ಯೆ ಭುಜಾವಣೆಕ್ ಮ್ಹಜೊ ಆಂವ್ಸರ್ ಆನಿ ವೇಳ್
ಸವ್ಕಾಸ್ ವೆತಾ ಝಾಡುನ್
'ಆಪ್‌ಕೆ ದ್ವಾರಾ ಡಾಯಲ್ ಕಿಯಾ ಗಯಾ ನಂಬರ್
ಅಭೀ ವ್ಯಸ್ತ್ ಹೈ’,
ಉತ್ರಾಂಚ್ಯೆ ಸೊಸ್ಣಿಕಾಯೆಕ್...ಹಾಂವ್
ಸಾಂಗ್ಚೆಂ ಆಸಾ ತೆಂ ಹಳ್ವಾಯೆನ್
ಮೆಸೇಜ್ ಕರುನ್‌ ಧಾಡೂಂ
'ಗೋ ಸ್ಟ್ರೇಯ್ಟ್... ಟೇಕ್ ರೈಟ್’
ಕಾರಾ-ಪಯ್ಣಾರ್ ಚುಕಲ್ಲ್ಯಾ ಮ್ಹಾಕಾ,
ವಾಟ್ ದಾಕೊಂವ್ಚೆಂ ತೂಂ-ಗೊ
ಮೊಗಾನ್ ಪರತ್ ಪರತ್ ಜಾಗಯ್ತಾನಾ
ಉತ್ರಾಂ ತುಜಿಂ ಕಶಿಂ ಮೊಡುಂ
'ಹಾತ್ ಧು, ಮಾಸ್ಕ್ ಘಾಲ್, ಅಂತರ್ ಸಾಂಬಾಳ್'
ಭಲಾಯ್ಕೆಚೊ ಹುಸ್ಕೊ ಆಸ್ಚ್ಯಾ ತುಮಿ
ಕೊರೊನಾಚೆಂ ಭೆಂ ನಪಯಿಂಚ್
ಕರ‍್ಚ್ಯಾಕ್ ಬಾಂದ್ತಾತ್ ಖಾಡುಂ
ಆನಿ ಮ್ಹಜಿ ಜಿಣಿಯೆ ಸಾಂಗಾತಿಣ್
ಉತ್ರಾಂ ಉತ್ರಾಂಕ್ ಆದೇಶ್,
ಹರ್ ಕಾಮಾಂಕ್ ವೆವೆಗ್ಳೊ ಸಂದೇಶ್
ಜಾಪಿಂಕ್ ಸವಾಲಾಂಚೊ ದಾಳೊ
ಮೊಗಾನ್ ಖಿರೊವ್ನ್ ದಿತಾ ಕೊಡು
ದೊಳ್ಯಾಂಕ್ ದಿಸನಾಸ್ಚ್ಯಾ ವೈರಸಾಚ್ಯಾಕೀ,
ಸಾಂಗಾತ್ ದಿಂವ್ಚ್ಯಾ ಹ್ಯಾ ವೈರಸಾಚೊ
ನಿರ್ವೊಗ್ ನಾಸ್ತಾಂ,
ಜಿಣಿಭರ್ ಕಶೆಂ ಬಾಂದುನ್ ಧರುಂ
- ವಿನ್ಸಿ ಪಿಂಟೊ, ಆಂಜೆಲೊರ್.
संपादकीय:
कोणायचीं मनां वोडचो जादू ह्या ताळ्यांनी आसता
जिवितांत असलो जादू करच्या ताळ्यांक कमी ना. ह्या ताळ्यांतली मधुरता इतलिकी, तेवशिल्यान कसल्योय चुकी जाल्यो जाल्यारी, त्यो सोसून व्हरची तांक आमी आपणायतांव. त्या ताळ्यांतल्या गोडशा मेलांक आमी घड्येन चिडकून वेतांव.
गांवांत आतां आयिल्ल्या वैरसाच्याकी, खिणा खिणाक आपल्या जादुवान आमकां पिश्यार घालचें हें वैरस कठीण आपायाचें म्हणून ही कविता सांगता.
विन्सी पिंटो आंजेलोर जायत्या तेंपा उपरांत कविता कुळाराक आयला.
-मेल्विन रोड्रीगस
कविता:
तुमच्या ताळ्यांत
तुमच्या ताळ्यांत आसा जादू
केदनांय म्हजें मन वोडूं
'कृपया राजधानी एक्सप्रेस
धेरी से चल रही है, हमे... खेद है...'
उतरांच्ये भुजावणेक म्हजो आंवसर आनी वेळ
सवकास वेता झाडून
'आपके द्वारा डायल किया गया नंबर
अभी व्यस्त है’,
उतरांच्ये सोसणीकायेक...हांव
सांगचें आसा तें हळवायेन
मेसेज करून धाडूं
'गो स्ट्रेयट... टेक रैट’
कारा-पयणार चुकल्ल्या म्हाका,
वाट दाकोंवचें तूं-गो
मोगान परत परत जागयताना
उतरां तुजीं कशीं मोडूं
'हात धू, मास्क घाल, अंतर सांबाळ'
भलायकेचो हुसको आसच्या तुमी
कोरोनाचें भें नपयींच
करच्याक बांदतात खाडूं
आनी म्हजी जिणये सांगातीण
उतरां उतरांक आदेश,
हर कामांक वेवेगळो संदेश
जापींक सवालांचो दाळो
मोगान खिरोवन दिता कोडू
दोळ्यांक दिसनासच्या वैरसाच्याकी,
सांगात दिंवच्या ह्या वैरसाचो
निर्वोग नासतां,
जिणीभर कशें बांदून धरूं
- विन्सी पिंटो, आंजेलोर.