ಸಂಪಾದಕೀಯ್
ಕವಿತೆಚ್ಯಾ ದಾಸಾಕ್ ರೆವ್ಡಲ್ಲೊ ಪ್ರಕೃತಿಚೊ ಪಾಸ್
'ಕವಿತಾ ಕುಳಾರ್' ಪಾಂಚ್ ವರ್ಸಾಂಚೆಂ ಜಾತಾನಾ ತುಮ್ಕಾಂ ಮ್ಹಜಿ ಏಕ್ ಕವಿತಾ ದಿಂವ್ಯಾಂ ಮ್ಹಣೊನ್ ಚಿಂತುನ್ ಆಸ್‌ಲ್ಲೊಂ. ಮ್ಹಜ್ಯಾ ಪುಸ್ತಕಾಂತ್ಲ್ಯೊ ಸರ್‍ವಯ್ ಚಾಳ್ಳ್ಯಾ ಉಪ್ರಾಂತ್ ಹ್ಯಾ ಸಂದರ್ಭಾಕ್ ಜೊಕ್ತಿ ಮ್ಹಣೊನ್ ಹಿ ಏಕ್ ಕವಿತಾ ಹಾಂವೆಂ ವಿಂಚ್ಲ್ಯಾ.
ಮನಾಲಿ ಥಾವ್ನ್ ದೊಂಗ್ರಾಳ್, ಅಶೀರ್, ಥಳಾಂತ್ ಪಳೆತಾನಾ ಝಿಂಟ್ ಉಡ್ಚೆ ತಸಲಿ, ಝರಿಚಿ, ಕರ್‍ಯಾಚ್ಯಾ ಪಾವ್ಸಾನ್ ನ್ಹಾಲ್ಲಿ, ಸೊಭಿತ್ ಸುಂದರ್ ವಿಜ್ಮಿತ್ಮಾಯೆಚಿ ವಾಟ್ ಮಸ್ತುನ್ ದೊಂಗ್ರಾಚ್ಯಾ ಮಾತ್ಯಾಕ್ ಪಾವ್ಲ್ಯಾರ್‌ಯ್ ಆನಿಕ್‌ಯ್ ಮುಕಾರ್ ವಚೊಂಕ್ ಆಸಾ ಮ್ಹಣ್ ಆಯ್ಕತಾನಾ ಜಾಲ್ಲೊ ಅನ್ಭೋಗ್ ಹಾಂವ್ ವಿಸ್ರೊಂಚೆಬರಿ ನಾ! ಮಾಗೀರ್ ಘೊಡ್ಯಾಚೆರ್ ಬಸೊನ್, ಘೊಡೆ ಥಕ್ಲ್ಯಾಉಪ್ರಾಂತ್ -ಒಕ್ಸಿಜನ್ ಸೈತ್ ನಾಸ್ತಾನಾ ಸವ್ಕಾಸ್ ಚಲೊನ್, ಬಸೊನ್, ಚಡೊನ್ ಚೀನಾಚೆ ಗಡಿಲಾಗಿಂ 'ರೊಹ್ಟಾಂಗ್ ಪಾಸ್' ಪಾವ್ತಾನಾ ಹಾಂವ್ ಖಂಯ್ಚ್ಯಾಕಿ ಎಕಾ ಪ್ರಕೃತಿಚ್ಯಾ ಪಾಸಾಂತ್ ಶಿರ್‍ಕಲ್ಲೊಂ.
ತೊಚ್ ಅನ್ಭೋಗ್ ಹೆ ಕವಿತೆರುಪಿಂ ವ್ಹಾಳ್ಳಾ. ಮ್ಹಜ್ಯಾ ಜಿವಿತಾಂತ್ಲೆ ಏಕ್ ಆಮೊಲಿಕ್ ಘಡಿತ್ ಕವಿತೆದ್ವಾರಿಂ ಹಾಂವೆಂ ವಾಂಟುನ್ ಘೆಂವ್ಚೆಂ ಪ್ರೇತನ್ ಕೆಲಾಂ. ಕವಿಂನಿ ಅಸಲ್ಯಾಚ್ ನ್ಹಯ್ ತರೀ ಅಸಲೆಚ್ ಪ್ರಭಾವ್ ಘಾಲ್ಚ್ಯಾ ಅನ್ಭೋಗಾಂತ್ಲ್ಯಾನ್ ಪಾಶಾರ್ ಜಾಲ್ಯಾರ್ ವೀರ್‍ಯಭರಿತ್ ಕವಿತಾ ಕೊಂಕಣಿಂತ್ ವಾಚುಂಕ್ ಮೆಳ್ತಲ್ಯೊ ಮ್ಹಳ್ಳ್ಯಾಚಿ ಗ್ಯಾರಂಟಿ ಮ್ಹಾಕಾ ಆಸಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಪ್ರಕೃತಿಚೊ ಪಾಸ್
ಸಂಸಾರಾಂತ್ಲೆಂ ಸರ್‍ವಯ್ ಮ್ಹೆಳೆಂ
ತಶೆಂ ಸರ್‍ವಯ್ ಮ್ಹೆಳ್ಯಾಂಕ್
ಥಳಾಂತ್ ಸಾಂಡುನ್
'ರೊಹ್ಟಾಂಗ್ ಪಾಸಾ'ಚ್ಯಾ ಮಸ್ತಕಾರ್ ಬಸೊನ್
ಮೊಳ್ಬಾಥಾವ್ನ್ ಪಾವ್ಶೆಂವ್ಚೊ
ಮಯ್ಪಾಸಾಚೊ ಸ್ವಾಸ್ ಸೆವ್ನ್
ಮೊಳ್ಬಾಪೊಂದ್ಲೆ ವಿಸ್ತಾರಾಯೆಂತ್
ಹಾಂವೆ ಮ್ಹಜೆ ಬಾವ್ಳೆ ವಿಸ್ತಾರಾಯ್ಲೆ
ತಳಾತ್ ಉದಾರೆ ಕರುನ್!
ಯುಗಾಂ ಯುಗಾಂನಿ
ಮೊನ್ಯಾಂನಿ ಮೊಳ್‌ಲ್ಲೊ
ಸುರ್ಯಾದೇವ್
ದೊನ್ಪಾರಾಂಚ್ಯಾ ಮೊಡಾಂ ಮದ್ಲ್ಯಾನ್
ಮೊನ್ಯಾನೀಂಚ್ ಉಲಯ್ಲೊ ಮ್ಹಜೆಲಾಗಿಂ:
"ಮಾತ್ಸೊ ಮೋಗ್ ವೋತ್ ಮ್ಹಜೆರ್
ಹಾತಾರ್ ತುಜ್ಯಾ ವಿಶೆವ್ ಘೆತಾಂ
ಖಿಣಾಕ್ ವಚೊಂ ಸಂಸಾರ್ ರಜೆರ್"
ತೊ ಬಸ್ಲೊ ಮ್ಹಜ್ಯಾ ಹಾತಾಂಚೆರ್
ಸವ್ಕಾಸ್ ಮ್ಹಜ್ಯಾ ಮನಾಚೆರ್
ಮ್ಹಜ್ಯಾ ಕಾಳ್ಜಾಚೆರ್
ಆನಿ ಸಗ್ಳೊಚ್ ಮ್ಹಜೆರ್
ಆತಾಂ ತಾಚ್ಯಾಂತ್ ಹಾಂವ್
ಸೊಧುಂಕ್ ಮೆಳ್ಳೊನಾ
ಆನಿ ಮ್ಹಜ್ಯಾಂತ್ ತೊ
ಕಾಡುಂಕ್ ಕಳ್ಳೊನಾ
'ರೊಹ್ಟಾಂಗ್ ಪಾಸಾ'ಚೆ ಪಲ್ತಡಿಚೊ
ಪಾಸ್ ಹೊ ಆಮ್ಚೊ
ಹ್ಯಾ ಪಾಸಾಂತ್ಲೆಂ ಕೊಣ್‌ಯ್ ಸುಟನಾ,
ಪಾಟಿಂ ಪರ್‍ತನಾ -
ಥಳಾಂತ್ಲ್ಯಾ ಮ್ಹೆಳ್ಯಾಕ್!
ಹಾಂಗಾಸರ್ ಸಗ್ಳೆಂ ಶಾಂತ್
ನಾ ಕಸ್ಲೀಯ್ ಭಿರಾಂತ್
ಖಿಣಾ ಕಣಾಂತ್
ಕವಿತೆಚಿಂ ಫುಲಾಂ ಮನಾಂತ್
ನಕ್ತಿರಾಂಚಿ ಮಾಳಾ ಗಳ್ಯಾಂತ್
ಮುಕ್ತಿಚಿಂ ಕಿರ್‍ಣಾಂ ದೊಳ್ಯಾಂತ್
ಹಾಂಗಾಸರ್ ಸಂಸಾರ್-ಸರ್‍ಗಾಚ್ಯಾ
ಫರಕಾಚೊ ಪಡ್ದೊ ಪಿಂಜುನ್
ಉಗ್ತಿ ಪಡ್‌ಲ್ಲೆ ರಂಗ್‌ಮಾಂಚಿಯೆರ್
ಸೀತೆಚ್ಯಾ ಭುರ್‍ಗ್ಯಾಂಕ್
ನಾಝರೆನಾಚಿ ಆವಯ್ ಪಾನೊ ಖಾವಯ್ತಾ,
ಪೈಗಂಬರ್ ಪಾಯಾಂಕ್ ಪಾಂಯ್ಜಣಾಂ
ಬಾಂದುನ್ ನಾಚ್ತಾ
ಆನಿ ರಡ್ಚ್ಯಾ ಭುರ್‍ಗ್ಯಾಂಕ್
ಖೆಳಯ್ತಾ, ಭುಜಯ್ತಾ
ರಾಮಾಚೇಂಯ್ ಮನ್ ಪಿಸ್ವಯ್ತಾ
ಕವಿತೆಂಚ್ಯಾ ದಾಸಾಕ್ ರೆವ್ಡಲ್ಲೊ
ಪಾಸಾಂಚೊ ಪಾಸ್ ಹೊ
ಪ್ರಕೃತಿಚೊ ಪಾಸ್
'ರೊಹ್ಟಾಂಗ್ ಪಾಸಾ'ಚೆ ಪಲ್ತಡಿಚೊ!
-ಮೆಲ್ವಿನ್ ರೊಡ್ರಿಗಸ್