ಸಂಪಾದಕೀಯ್:
ಜಿವಿತಾಂತ್ಲಿಂ ಸತಾಂ ಬದ್ಲುಂಕ್ ಜಾಯ್ನಾಂತ್
ಜಿಣ್ಯೆಚಿಂ ಜಿಂ ಸತ್ಯಾಂ ಆಸಾತ್, ತಿಂ ಆಸಾ ತಶೀಂಚ್ ಆಸ್ತಾತ್. ಬದ್ಲನಾಂತ್. ಆಮ್ಚೆಂ ದುಖ್ ಜೆಂ ಆಸಾ, ತೆಂ ಆಮ್ಕಾಂ ಮಾತ್ರ್ ಕಳೀತ್. ಹೆರಾಂನಿ ತೆಂ ಆಮ್ಚೆಂ ಆಸಲ್ಲೆಂ ತಾಂಚೆಂ ಕರುಂಕ್ ಜಾಯ್ನಾ. ಏಕ್ ಚಲಿ ತಿಚ್ಯಾ ಲಗ್ನಾಂತ್ ಘರಾ ಭಾಯ್ರ್ ಸರ‍್ಲಿ ಜಾಲ್ಯಾರ್, ತಿಚ್ಯಾ ಘರ‍್ಚ್ಯಾ ಹುಂಬ್ರಾಕ್ ಕಾಂಯ್ ಕಿತೆಂಚ್ ಫರಕ್ ಜಾಯ್ನಾ.
ಕಾಂಯ್ ಥೊಡಿಂ ಜಿವಿತಾಚಿಂ ಸತಾಂ ಆಮಿ ಮಾಂದುನ್ ಘೆತ್ಲ್ಯಾರ್ ಮಾತ್ರ್ ಆಮ್ಚೆಂ ಜಿಣೆಂ ಸುಖಿ ಜಾತಲೆಂ ಮ್ಹಣುನ್ ಹ್ಯೆ ಕವಿತೆಂತ್ ಗುಲಾಬ್ ವೆರ್ಣೆಕಾರ್ ಸಾಂಗ್ತಾ. ತಿ ಪಯ್ಲೆಚ್ ಫಾವ್ಟ್ ಹಾಂಗಾಸರ್ ಆಯ್ಲ್ಯಾ, ತಿಕಾ ಯೆವ್ಕಾರ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕೊಣ್ ಕೊಣಾಚೊ ನಾ
ದುಖ್ ಜಾಚೆಂ ತಾಂಚೆಂ
ತೆ ವಾಂಟೂಂಕ್ ಮೆಳನಾ
ಯಾ ಜಗಾನ್ ಮನ್ಶಾಂ
ಕೊಣ್ ಕೊಣಾಚೊ ನಾ
ಆವಯ್ ಸೊಡೂನ್ ವತಾ
ತೆವ್ಹಾ ಕುಳಾರ್ ಶೆಣ್ತಾ
ಉಮ್ರ್ಯಾಕ್ ಮಾತ್ ಶೆಣಿಲ್ಯಾಚೆಂ
ದುಖ್ ಕಸ್ಲೆಂಚ್ ಆಸನಾ
ನಾತ್ಯಾನ್ ಭರುನ್ ಉರ‍್ತಾ
ಸ್ವಾರ್ಥ್ ದಿವ್ಪಾಚೊ ಘೆವ್ಪಾಚೊ
ಮಾಯೆನ್ ಭರಿಲ್ಲೆಂ ಕಾಳೀಜ್
ಕೊಣಾಚೆಂಚ್ ಕಶೆಂ ಆಸನಾ
ಸುಖಾಫಾಟ್ಲ್ಯಾನ್ ಧಾಂವ್ತಾನಾ
ಮನೀಸ್ ಮನ್ಶಾಕ್ ವಳ್ಖನಾ
ಮನೀಸಪಣ್ ಶೆಣ್ಲಾಂ, ದುಖಾವಾಟೆರ್
ಸಾಥ್ ಕೊಣಾಚಿ ಆಸನಾ
ಕಾಂಟ್ಯಾಂಕ್ ಸಮ್ಜೂನ್ ಫುಲಾಂ
ಹಾಂಸತ್ ಹಾಂಸತ್ ಜಿಯೊಪಾಚೆಂ
ಕಿಸ್ಕಿಸ್ತಾ ತ್ಯಾ ಘಾವ್ಯಾರ್
ನಾಂವ್ ಕೊಣಾಚೆಂ ಆಸನಾ
ಜೀಣೆಚ್ಯೆ ವಾಟೆರ್ ಮೆಳ್ತಾತ್
ಕಿತ್ಲೆ ನವೆ ಸಾಂಗಾತಿ
ವಳ್ಖಿಚೆ ತೆ, ಗಾಂವ್
ಮಾತ್ ಕೊಣಾಚೆ ಆಸನಾ
- ಗುಲಾಬ್ ವೆರ್ಣೆಕರ್, ಗೊಂಯ್
संपादकीय:
जिवितांतलीं सतां बदलुंक जायनांत
जिण्येचीं जीं सत्यां आसात, तीं आसा तशींच आसतात. बदलनांत. आमचें दूख जें आसा, तें आमकां मात्र कळीत. हेरांनी तें आमचें आसल्लें तांचें करुंक जायना. एक चली तिच्या लग्नांत घरा भायर सरली जाल्यार, तिच्या घरच्या हुंबराक कांय कितेंच फरक जायना.
कांय थोडीं जिविताचीं सतां आमी मांदून घेतल्यार मात्र आमचें जिणें सुखी जातलें म्हणून ह्ये कवितेंत गुलाब वेर्णेकार सांगता. ती पयलेच फावट हांगासर आयल्या, तिका येवकार.
-मेल्विन रोड्रीगस
कविता:
कोण कोणाचो ना
दुःख जाचें तांचें
ते वाटूंक मेळना
या जगान मनशां
कोण कोणाचो ना
आवय सोडून वता
तेव्हा कुळार शेणता
उमऱ्याक मात शेणिल्याचें
दुःख कसलेंच आसना
नात्यान भरुन उरता
स्वार्थ दिवपाचो घेवपाचो
मायेन भरिल्लें काळीज
कोणाचेंच कशें आसना
सुखाफाटल्यान धांवताना
मनीस मनशाक वळखना
मनीसपण शेणलां, दुखावाटेर
साथ कोणाची आसना
काट्यांक समजून फुलां
हांसत हांसत जियोपाचें
किसकिसतां त्या घाव्यार
नांव कोणाचें आसना
जीणेच्या वाटेर मेळतात
कितले नवे सांगाती
वळखिचे ते गाव
मात कोणाचे आसना
- गुलाब वेर्णेकर, गोवा