ಸಂಪಾದಕೀಯ್:
ಜಿವಿತಾಚ್ಯಾ ಹುಂವಾರಾಂತ್ಲಿ ಸುಟ್ಕಾ ಜೊಡುಂಕ್ ಕೊಪ್ ಮಾರ‍್ಚೆಂ ಪಡ್ತಾ?
ಖಂಯ್ಚ್ಯಾ ನಮುನ್ಯಾಚೊ ಹೊ ಹುಂವಾರ್ ಕೊಣ್ ಜಾಣಾ? ಹ್ಯಾ ಹುಂವಾರಾಚಿ ಫೊರ್ತ್‍ಸಾಣ್ ವಾ ಗತಿ ಕಿತ್ಲಿ ಕೊಣ್ ಜಾಣಾ? ತಾಕಾ ಮಾತ್ರ್ ಹೆಂ ಕಳಿತ್. ಆನಿ ಹ್ಯಾ ಹುಂವಾರಾಂತ್ಲಿ ಬಚಾವಿ ವಾ ಸುಟ್ಕಾ ಜೊಡುಂಕ್ ತೊ ಪಿಯೆತಾ, ಆಖ್ಖಿ ರಾತ್.
ಎಕಾ ಪಿಂವ್ಡ್ಯಾಚಿ ಕಥಾ ಹ್ಯೆ ಕವಿತೆಂತ್ಲ್ಯಾನ್ ಆಮ್ಕಾಂ ದಿಲ್ಯಾ ರುಪಾಲಿ ಮಾವ್ಜೊ ಕೀರ್ತನಿನ್. ತಿ ವಾಚ್ತಾನಾ ಜಿಣ್ಯೆಚ್ಯಾ ಸಂಘರ್ಶಾಂತ್ ಆಪ್ಟುನ್ ದಾಪ್ಟುಂಚ್ಯಾಂಕ್ ಎಕಾ ಥರಾಚಿ ನಶಾ ಪಾಂಗ್ರುಂಕ್ ಯೆತಲಿ ತೆಂ ಖಂಡಿತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಹುಂವಾರ್
ಆಜ್ ಬರೊಚ್ ವೇಳ್ ತೊ ಕೊಪ್ ಘೆವ್ನ್ ಬಶಿಲ್ಲೊ
ಪಳೊಂವ್ಕ್ ಸದಾಂಚೆಂ ಪೇಯ್ ದಿಸ್ಲೆಂ
ಪುಣ್ ಕಿತೆಂ ತರಿ ಆಜ್ ವೆಗ್ಳೆಂ ಆಸ್ಲೆಂ
ಝೆಲ್ ವಿತಳ್ಟಾಲೊ
ಆನಿ ತ್ಯಾ ಝೆಲಾ ವಾಂಗ್ಡಾ
ಕಿತೆಂ ಕಿತೆಂ ತಾಂತೂನ್ ವಿತಳ್ಟಾಲೆಂ ದೇವ್ ಜಾಣಾ
ದರ್ ಘೊಂಟಾಂತ್ ತೊ ತೆಂ ತಾಳ್ಯಾ ಸಕಯ್ಲ್ ಧುಕಲ್ತಾಲೊ
ಏಕ್ ಘೊಂಟ್ ತಾಕಾ ಹಾಂಸಯ್ತಾಲೊ
ಏಕ್ ಘೊಂಟ್ ದೊಳ್ಯಾಂತ್ಲ್ಯಾನ್ ದೆಂವುಂಕ್ ಸೊದ್ತಾಲೊ
ಏಕ್ ಘೊಂಟ್ ಪೊರ್ನ್ಯಾ ಯಾದಿಂನಿ ಘುಸ್ಪಾಯ್ತಾಲೊ
ಏಕ್ ಘೊಂಟ್ ಫುಡಾರಾಚೊ ಹಾರ್ಸೊ ದಾಖಯ್ತಾಲೊ
ತ್ಯಾ ಕೊಪಾಂತ್ ಆಜ್ ಕಿತೆಂ ತರಿ ವೆಗ್ಳೆಂಚ್ ಭರ್ಸಲ್ಲೆಂ
ಆನಿ ತೊ ತೆಂ ಪೊಟಾಂತ್ ರಿಗಯ್ತಾಲೊ
ಎಕಾ ಎಕಾ ಘೊಂಟಾಂತ್ ತೊ ಏಕ್ ಏಕ್ ಖಿಣ್ ಗಿಳ್ಟಾಲೊ
ಮದೀಂಚ್ ಹಾಂಸ್ತಾಲೊ, ಮದೀಂಚ್ ರಡ್ಟಾಲೊ
ಮದೀಂಚ್ ಪುಟ್ಪುಟ್ಟಾಲೊ,
ಮದೀಂಚ್ ಕಿಟ್ಕಿಟ್ಟಾಲೊ
ಬಾಟ್ಲಿ ತಾಠ್ ಉಬಿ ಆಸ್ಲಿ
ಗ್ಲಾಸ್ ಭರ್ತಾಲೊ, ರಿತೊ ಜಾತಾಲೊ
ಝೆಲ್ ವಿತ್ಳೂನ್ ಪೆಯ್ ಪಾತಳ್ ಕರ‍್ತಾಲೊ
ಮನಾಕ್ ಮಾತ್ ತೊ ಜಡ್ ಕರ‍್ತಾಲೊ
ಕಾಳೀಜ್ ದಾಟಿಲ್ಲೆಂ, ಗಚ್ಚ್ ಭರಿಲ್ಲೆಂ
ತರೀಯ್ ದಿಸ್ತಾಲೆಂ, ಪಿಸುಡತ್ ವತಾಲೆಂ
ಉಬೊ ರಾಂವ್ಚಿ ತಾಂಕ್ ನಾಸ್ಲಿ
ಪಾಪ್ಣಿ ಬಂದ್ ಜಾಯ್ನಾಸ್ಲಿ
ಗಝಲ್ ಗಿತಾಂತ್ ತೊ ಶೆಣತ್ ಚಲಿಲ್ಲೊ
ಜಿವಿತಾಚೊ ಅರ್ಥ್ ಜಣು ಸೊದೀತ್ ಬಶಿಲ್ಲೊ
ಸ್ವತಾಚ್ ಸ್ವತಾಕ್ ಪ್ರಸ್ನ್ ವಿಚಾರ‍್ತಾಲೊ
ಸ್ವತಾಚ್ ತಾಚಿ ಜಾಪ್ ದಿತಾಲೊ
ಸಗ್ಳಿ ರಾತ್ ತೊ ಕೊಪ್ ಘೆವ್ನ್ ಬಶಿಲ್ಲೊ
ಮನಾಕ್ ತಾಚ್ಯಾ ಒತೊ ಆಯಿಲ್ಲೊ
ತ್ಯಾ ಕೊಪಾಂತ್ ಜಸೊ ಕಾಯ್ ಹುಂವಾರ್ ಆಯಿಲ್ಲೊ
-ರುಪಾಲಿ ಮಾವ್ಜೊ ಕೀರ್ತನಿ
ಹುಂವಾರ್=ಆವ್ರ್; ಪೇಯ್=ಪೀವನ್; ಝೆಲ್=ಬರಫ್, ಐಸ್; ವಿತಳುಂಕ್=ಖಿರೊಂವ್ಕ್; ಘೊಂಟ್=ಘೊಟ್; ಧುಕ್ಳುಂಕ್=ಲೊಟುಂಕ್, ವೊತುಂಕ್; ಹಾರ್ಸೊ=ಆರ್ಸೊ; ತಾಠ್=ಪ್ರಾಮಾಣಿಕ್ಪಣಿ, ನಿಟ್ಟ್, ಘಟ್ಟ್; ಪಾಪ್ಣಿ=ಆಸ್ಡಿ; ಜಣು=ಜಶೆಂ, ಕಾಂಯ್; ಒತೊ=ಶಿಜುನ್ ವೊತ್ಚಿ ಪ್ರಕ್ರಿಯಾ (ದೂಧ್ ವಾ ಶಿತ್ ವೊತ್ತಾ ತಶೆಂ).
संपादकीय:
जिविताच्या हुंवारांतली सुटका जोडूंक कोप मारचें पडता?
खंयच्या नमुन्याचो हो हुंवार कोण जाणा? ह्या हुंवाराची फोर्तसाण वा गती कितली कोण जाणा? ताका मात्र हें कळीत. आनी ह्या हुंवारांतली बचावी वा सुटका जोडूंक तो पियेता, आख्खी रात.
एका पिंवड्याची कथा ह्ये कवितेंतल्यान आमकां दिल्या रुपाली मावजो कीर्तनीन. ती वाचताना जिण्येच्या संघर्शांत आपटून दापटुंच्यांक एका थराची नशा पांगरूंक येतली तें खंडीत.
-मेल्विन रोड्रीगस
कविता:
हुंवार
आज बरोच वेळ तो कोप घेवन बशिल्लो
पळोवंक सदचेंच पेय दिसलें
पूण कितें तरी आज वेगळें आसलें
झेल वितळटालो
आनी त्या झेला वांगडा
कितें कितें तांतून वितळटालें देव जाणा
दर घोंटांत तो तें ताळ्या सकयल धुकलतालो
एक घोंट ताका हांसयतालो
एक घोंट दोळ्यांतल्यान देवंक सोदतालो
एक घोंट पोरन्या यादींनी घुसपायतालो
एक घोंट फुडाराचो हारसो दाखयतालो
त्या कोपांत आज कितें तरी वेगळेंच भरसल्लें
आनी तो तें पोटांत रिगयतालो
एका एका घोंटांत तो एक एक खीण गिळटालो
मदींच हांसतालो, मदींच रडटालो
मदींच पुटपुटटालो,
मदींच किटकिटटालो
बाटली ताठ उबी आसली
ग्लास भरतालो, रितो जातालो
झेल वितळून पेय पातळ करतालो
मनाक मात तो जड करतालो
काळीज दाटिल्लें, गच्च भरिल्लें
तरीय दिसतालें, पिसुडत वतालें
उबो रावची तांक नासली
पापणी बंद जायनासली
गझल गितांत तो शेणत चलिल्लो
जिविताचो अर्थ जणू सोदीत बशिल्लो
स्वताच स्वताक प्रस्न विचारतालो
स्वताच ताची जाप दितालो
सगळी रात तो कोप घेवन बशिल्लो
मनाक ताच्या ओतो आयिल्लो
त्या कोपांत जसो काय हुंवार आयिल्लो
-रुपाली मावजो किर्तनी