ಸಂಪಾದಕೀಯ್:
ನಿರಾಶಿ ಕಾಳ್ಜಾಂಕ್ ಸುಖಾಚೆ ಚುಡೆತ್ಯಾಂನಿ ವಾರೆಂ ಘಾಲ್ಚೆ ಗುಲೊಬ್
ಏಕ್ ಸಾದಿ, ಸೊಂಪಿ ಕವಿತಾ ಭೊಗ್ತಲ್ಯಾಂನಿ ಹಿ ಕವಿತಾ ಆಪ್ಲ್ಯಾ ಮೊಗಾಚ್ಯಾ ಮನ್ಶಾಂಚ್ಯಾ ಜಾಗ್ಯಾರ್ ಪೊಟ್ಲುನ್ ಧರ್‍ಲಿ ತರ್ ಹೆ ಕವಿತೆಚೆಂ ಮಹತ್ವ್ ಕೊಣಾಯ್ಕಿ ಕಳೊಂಕ್ ಸಾಧ್ಯ್ ಆಸಾ. ಗುಲೊಬ್ ಝಾಡಾವಯ್ಲೊ ಲೆಕಿನಾಸ್ತಾಂ ಘರಾಭಿತರ್‍ಲೊ ಕೊಣ್‌ಯ್ ಜಾಂವ್ಕ್ ಪುರೊ ಮ್ಹಣ್ ಚಿಂತ್ಲ್ಯಾರ್ ಹಿ ಕವಿತಾ ತುಜ್ಯಾ ಕಾಳ್ಜಾಕ್ ಪೊಟ್ಲುನ್ ಧರ್‍ತಲಿ ಮ್ಹಳ್ಳೆಂ ಖಂಡಿತ್. ಗುಲೊಬಾಚೆಂ ಜಿವಿತ್ ನಿಸ್ವಾರ್ಥಿ. ಲ್ಹಾನ್‌ಶ್ಯಾ ಜಿವಿತಾಚೆ ಆವ್ದೆಂತ್ ಎಕಾ ನಿರಾಶಿ ಕಾಳ್ಜಾಕ್ ಖಿಣಾಕ್ ತರ್‌ಯ್ ಸಂತೊಸಾಂವ್ಚೆಂ ಬಳ್ ಗುಲೊಬಾಕ್ ಆಸಾ.
ಆಮ್ಚ್ಯಾ ಕವಿಂಕ್ ಸೈತ್ ಅಸಲೆಂಚ್ ಬಳ್ ಆಸಾ. ಎಕಾ ಸುಕ್ಯಾ ಜಿವಿತಾಂತ್ ಎಕಾ ಖಿಣಾಕ್ ತರೀ ಸುಖಾಚಿ ಝರ್ ವ್ಹಾಳಂವ್ಚಿ ತಾಕತ್ ಕವಿಂಕ್ ಆಸಾ. ರೇಖಾಕ್ ಸೈತ್ ತಸಲೆಂ ಬಳ್ ಆಸಾ. ಹ್ಯಾ ಆದೀಂಯ್ ರೇಖಾಚಿ ಕವಿತಾ ಆಮಿ ಹಾಂಗಾಸರ್ ಪರ್ಗಟ್ ಕೆಲ್ಯಾ. ತವಳ್ ದಿಲ್ಲೊ ಯೆವ್ಕಾರ್ ಹ್ಯಾಪಾವ್ಟೀಂಯ್ ದಿತಲ್ಯಾತ್ ಮ್ಹಳ್ಳೊ ಭರ್‍ವಸೊ ಮ್ಹಾಕಾ ಆಸಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಗುಲೊಬ್
ಸುರ್ಯೊ ತೊ ಸಕಾಳಿಂ
ಉದೆವ್ನ್ ಯೆತಾನಾ
ಫುಲ್ತಾಯ್ ತುಂ ಸೃಷ್ಟೆಚ್ಯಾ
ಅಪೂರ್ವ್ ಫುಲಾ
ಪರ್ಮಳ್ ತೊ ತುಜೊ
ವಾರ್‍ಯಾರ್ ಧಲ್ತಾನಾ
ಆಕರ್ಷಿತಾಯ್ ಆಮ್ಕಾಂ
ಫುಲಾಂಚ್ಯಾ ರಾಯಾ
ಫುಲಾಂಚೊ ರಾಯ್ ಮ್ಹಣ್
ಮುಕುಟಾಯ್ತಾತ್ ತುಕಾ
ಮೊಗಾಚೊ ಸಂಕೇತ್ ಮ್ಹಣ್
ಹೊಗಳ್ಶಿತಾತ್ ತುಕಾ
ಘರಾಘರಾಂನಿ ವಾಜಾಂತ್
ಸೊಭಯ್ತಾತ್ ತುಕಾ
ಚಲಿಯೊ ತ್ಯೊ ಆಪ್ಣಾವ್ನ್
ಮಾಳ್ತಾತ್ ತುಕಾ
ಮನ್ ಮ್ಹಜೆಂ ಸಂತೊಸ್ತಾ
ತುಕಾ ದೆಖ್ತಾನಾ
ಉಲ್ಲಾಸ್ತಾ ಕಾಳೀಜ್ ಮ್ಹಜೆಂ
ತುಂ ಫುಲೊನ್ ಯೆತಾನಾ
ನಿರಾಸ್ತಾ ಮನ್ ಮ್ಹಜೆಂ
ತುಂ ಬಾವೊನ್ ಝಡ್ತಾನಾ
ನಿಯಮ್ ತೆಂ ದೆವಾಚೆಂ
ಬದ್ಲೊಂಕ್ ಕೊಣಿ ಸಕನಾ
-ರೇಖಾ ಮಸ್ಕರೇನ್ಹಸ್