ಸಂಪಾದಕೀಯ್:
ಹೆರಾಂಚೆರ್ ಉಜ್ವಾಡ್ ಫಾಂಕೊವ್ನ್ ಕಾಳೊಕಾಕ್ ಪಾಂಗರ‍್ಚ್ಯೊ ಸ್ತ್ರೀಯೊ
ಎಕಾ ಫುಲಾಚ್ಯಾ ಜಿವಿತಾಕ್ ಸ್ತ್ರೀಯೆಚ್ಯೆ ಜಿಣ್ಯೆಸಂಗಿಂ ಸರ್ ಕರುನ್ ಹಿ ಕವಿತಾ ಲಿಖ್ಲ್ಯಾ ಫ್ಲಾವಿಯಾ ಆಲ್ಬುಕೆರ್ಕಾನ್. ಎಕ್ಯೆ ಸ್ತ್ರೀಯೆಚ್ಯಾ ಕಷ್ಟಾಂ-ಸಂಕಷ್ಟಾಂಕ್, ತಿಣೆ ಹೆರಾಂಚ್ಯಾ ಜಿವಿತಾಂತ್ ಉಜ್ವಾಡ್ ಫಾಂಕೊಂವ್ಚ್ಯಾ ಖಾತೀರ್ ಸ್ವತಾ ಪೊಟ್ಲುಂಚ್ಯಾ ಕಾಳೊಕಾಕ್ ಹ್ಯೆ ಕವಿತೆಂತ್ ಫುಲಾಚೆಂ ರೂಪಕ್ ವಾಪರುನ್ ಆಮ್ಕಾಂ ದಾಕಯ್ಲಾಂ.
ಆಜ್ ಸ್ತ್ರೀ ಸ್ವತಂತ್ರ್ ಜಾಲ್ಯಾ ವಾ ತಶಿ ಜಾಂವ್ಚೆ ದಿಶೆನ್ ಬಳ್ವಂತ್ ಪಾವ್ಲಾಂ ಕಾಡುನ್ ಆಸಾ. ತಿಚೆಂ ಆಪ್ಲೆಪಣ್ ತಿಣೆ ಪಾಟಿಂ ಜೊಡುಂಕ್‍ಜಾಯ್ ಆನಿ ತಿಣೆಂ ಸ್ವಾಭಿಮಾನಾನ್ ಜಿಯೆಂವ್ಕ್ ಜಾಯ್ ಮ್ಹಳ್ಳೊಚ್ ಹ್ಯೆ ಕವಿತೆಚೊ ಆಶಯ್ ಆಸಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಫುಲಾಂ ಸರ‍್ತಾತ್
ಫುಲಾಂ ಸರ‍್ತಾತ್
ಫುಲಾಂ ತಸಲ್ಯೊ
ಸ್ತ್ರಿಯೋಯ್ ಸರ‍್ತಾತ್!
ದೇಂಟ್ ಬಾವುನ್ ಝಾಡಾರ್
ಸಕತ್ ಮೊಡುನ್ ಜಿವಾಂತ್
ಪಾಕ್ಳ್ಯೊ ಝಡುನ್ ಮಾತ್ಯೆಂತ್
ಸಾಕ್ರಿಫಿಸ್ ವ್ಹಾವೊವ್ನ್ ಜಿಣ್ಯೆಂತ್!
ಘೆವುನ್ ಉಮ್ಕೊಳ್ ಸುತಾರ್
ಜಿವಿತ್ ರಿಸ್ಕೆರ್ ಘಾಲುನ್
ಸೊಭೊಂವ್ಕ್ ಗುಂತುನ್ ಸುವ್ಯೆರ್
ಕಾಳ್ಜಾಕ್ ಭಾಲ್ಯಾಂನಿ ತೊಪುನ್!
ಬಾವುನ್, ಸುಕೊನ್ ಫಾಂಟ್ಯಾರ್
ನಿರಾಸ್, ದೆದೆಸ್ಪೊರ್ ಜಾವುನ್
ಎ.ಸಿ. ಕುಡಾಂನಿ ಕರುನ್ ಫಿಚಾರ್
ಸ್ವಾಸ್ ದಾಂಬುನ್ ಧರುನ್!
ತಾಪುನ್, ಕರ್ಪುನ್ ವೊತಾಕ್
ಉಜ್ಯಾ ಧಾವೆಕ್ ಶಿಜುನ್
ಮೊಲ್ಯಾಂತ್ ಲಿಪುನ್ ಆಡೊಸಾಕ್
ರಾಂದ್ಪಾಕುಡಾ ಮುಲ್ಯಾಂತ್ ಝರುನ್!
ಲೊಳುನ್ ಇಮಾಜಿಂ ಮುಳಾಂತ್
ಅಧಿಕಾರಾಚ್ಯಾ ಪಾಯಾಂನಿ ಮಸ್ತುನ್
ವ್ಯಸ್ತ್, ಆಕರ್ಶಿತ್ ಕರ‍್ಚ್ಯಾಂತ್
ಭುಕ್ ಥಾಂಬೊಂವ್ಚಿಂ ಬೊಂಬಿಂ ಜಾವುನ್!
ಪರ್ಜಳುನ್ ಹೆರಾಂ ಖಾತಿರಚ್
ಚಾಕ್ರೆಂತ್ ಮೆತೆರ್ ಜಾವುನ್
ವಿಸ್ರುನ್ ಖುದ್ಧ್ ಆಪ್ಣಾಕಚ್
ಆಪ್ಲೆಪಣ್‌ಚ್ ಹೊಗ್ಡಾವ್ನ್!
-ಫ್ಲಾವಿಯಾ ಆಲ್ಬುಕೆರ್ಕ್, ಪುತ್ತೂರ್
संपादकीय:
हेरांचेर उजवाड फांकोवन काळोकाक पांगरच्यो स्त्रीयो
एका फुलाच्या जिविताक स्त्रीयेच्ये जिण्येसंगीं सर करून ही कविता लिखल्या फ्लाविया आलबुकेर्कान. एक्ये स्त्रीयेच्या कष्टां-संकष्टांक, तिणे हेरांच्या जिवितांत उजज्वाड फांकोंवच्या खातीर स्वता पोटलुंच्या काळोकाक ह्ये कवितेंत फुलाचें रूपक वापरून आमकां दाकयलां.
आज स्त्री स्वतंत्र जाल्या वा तशी जांवचे दिशेन बळवंत पावलां काडून आसा. तिचें आपलेपण तिणे फाटीं जोडुंकजाय आनी तिणें स्वाभीमानान जियेवंक जाय म्हळ्ळोच ह्ये कवितेचो आशय आसा.
-मेल्विन रोड्रीगस
कविता:
फुलां सरतात
फुलां सरतात
फुलां तसल्यो
स्त्रियोय सरतात!
देंट बावून झाडार
सकत मोडून जिवांत
पाकळ्यो झडून मातयेंत
साक्रीफीस व्हावोवन जिणयेंत!
घेवून उमकोळ सुतार
जिवीत रिस्केर घालून
सोभोवंक गुंतून सुवयेर
काळजाक भाल्यांनी तोपून!
बावून, सुकोन फांट्यार
निरास, देदेस्पोर जावून
ए.सी. कुडांनी करून फिचार
स्वास दांबून धरून!
तापून, करपून वोताक
उज्या धावेक शिजून
मोल्यांत लिपून आडोसाक
रांदपाकुडा मुल्यांत झरून!
लोळून इमाजीं मुळांत
अधिकाराच्या पायांनी मस्तून
व्यस्त, आकर्शीत करच्यांत
भूक थांबोंवचीं बोंबीं जावून!
पर्जळून हेरां खातीरच
चाक्रेंत मेतेर जावून
विसरून खुद्ध आपणाकच
आपलेपणच होगडावन!
-फ्लाविया आलबुकेर्क, पुत्तूर