ಸಂಪಾದಕೀಯ್:
ಸಲಾಮ್ ಮಾರುನ್ ಸೊಲಾಂ ಮಾಗ್ಚೆ ಗುಲಾಮ್
ಹೆಂ ಭುಗ್ಯಾಂಚ್ಯಾ ಗಾಯಾನಾಬರಿ ದಿಸೊಂಕ್ ಪುರೊ. ಪುಣ್ ವ್ಹಡಾಂಕ್‌ಯ್ ಪಿಶ್ಯಾರ್ ಘಾಲ್ಚಿ ತಾಕತ್ ಹ್ಯಾ ಉತ್ರಾಂನಿ ದಿಪ್ಕಲ್ಯಾ. ಸಲಾಮ್ ತೊ ಕಸಲೋಯ್ ಜಾಂವ್, ಮಾರ್‍ಲ್ಯಾ ಶಿವಾಯ್ ಆಯ್ಚ್ಯಾ ಹ್ಯಾ ಸಂಸಾರಾಂತ್ ಕೊಣಾಯ್ಚೆಂ ಆಳುಂ ಶಿಜಾನಾ, ಕೊಣಾಯ್ಚೆ ರಾಂದ್ಣಿರ್ ಆದಾನ್ ಚಡನಾ. ಸಲಾಮ್ ಮಾರ್‍ಲ್ಯಾರ್ ಮಾತ್ರ್ ಕೊಲ್ವಾಚ್ಯಾ ಜಾಗ್ಯಾರ್ ಮಾತ್ಯಾಚೆರ್ ನಳೆ ಯೆತಾತ್, ಸಲಾಮ್ ಮಾರ್‍ಲ್ಯಾರ್ ಮಾತ್ರ್ ಕಾಂಟ್ಯಾಂಚ್ಯಾ ಮುಕುಟಾಚೆರ್ ಮರ್‍ಯಾದಿಚಿಂ ಥಿಕಾಂ ಯೆತಾತ್.
ಭೋವ್ ಸೊಭಿತ್, ಸುಂದರ್, ಆಪುರ್ಬಾಯೆಚಿ ಕವಿತಾ ಘೆವ್ನ್ ವಾಲ್ಟರ್ ದಾಂತಿಸ್ ಪರ್‍ತ್ಯಾನ್ ಏಕ್ ಪಾವ್ಟಿಂ ಕವಿತಾ ಕುಳಾರಾಕ್ ಆಯ್ಲಾ. ಉತ್ರಾಂ ಮೊಳುನ್ ಕವಿತೆಚಿ ಮಾಳಾ ವಿಣ್ಚಿ ಕಲಾ ಕವಿ ಬರಿಚ್ ಜಾಣಾ. ತ್ಯಾ ದೆಕುನ್ ತೊ ಅಪ್ರೂಪ್ ಬರಯ್ತಾ ಜಾಲ್ಯಾರ್‌ಯ್ ಸಭಾರ್ ಕಾಳಾ ಪಾಸುನ್ ಕಾಳ್ಜಾಮೆರೆರ್ ಪಾಸಾಯೊ ಮಾರ್‍ತಾ.
ಮಾಗೀರ್ ಹೆಂ ಗಾಯಾನ್ ಖಂಯ್ಚ್ಯಾ ನಮುನ್ಯಾಚೆಂ ಆನಿ ಸಲಾಮ್ ಖಂಯ್ಚ್ಯಾ ನಮುನ್ಯಾಚೊ?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮಾಣ್ಕ್ಯಾಚೆಂ ಗಾಯಾನ್
ಆಲ್ತೊಡಿಚ್ಯಾ ತಳ್ಯಾಲಾಗಿಂ
ಸಾಂಗ್ತಾ ಮಾಣ್ಕೊ ಬಾಯ್ಲೆಲಾಗಿಂ
ಡುರುಂ ಡುರುಂ ಡುರುಂ ಡುರುಂ
ಪಾವ್ಸಾ ಮೊಡಾಂಕ್ ಸಲಾಮ್ ಮಾರುಂ
ವಾರೆಂ ಮೊಡಾಂಕ್ ಥಂಡ್ ಕರುಂ
ಶಿರಾಂಧಾರಿಚೊ ಪಾವ್ಸ್ ಮಾರುಂ
ತಳೆಂ ಆಮ್ಚೆಂ ಉದ್ಕಾಂತ್ ಭರುಂ
ಉಪ್ರಾಂತ್ ಆಮ್ಚೊ ಮೋಗ್ ಸುರು
ಸೊರ್ಪಾ ದಿವ್ಡಾಂಕ್ ಕೊಲೊ ವ್ಹರುಂ
ಆಮ್ಚಿ ಪಿಳ್ಗಿ ಸಗ್ಳ್ಯಾನ್ ಭರುಂ
ಗಾಯಾನ್ ಆಮ್ಚೆಂ ಅಮರ್ ಉರೊಂ
ಡುರುಂ ಡುರುಂ ಡುರುಂ ಡುರುಂ
ಪಾವ್ಸಾ ಮೊಡಾಂಕ್ ಸಲಾಮ್ ಮಾರುಂ
-ವಾಲ್ಟರ್ ದಾಂತಿಸ್, ಕಿನ್ನಿಗೋಳಿ