ಸಂಪಾದಕೀಯ್:
ಸ್ವಾಸ್ ಸಾಂಬಾಳುಂಕ್ ಗರ್ಜೆಚ್ಯೊ ಸುವಿಯೊ
ಕೂಡ್, ಜೀವ್ ಉರಜಾಯ್ ಜಾಲ್ಯಾರ್ ತಿಚೆ ಭಿತರ‍್ಲ್ಯಾನ್ ಸ್ವಾಸ್ ವ್ಹಾಳಜಾಯ್. ಸ್ವಾಸ್ ಆಸ್ತಾ ಪಾಸುನ್ ಜೀವ್ ಆಸ್ತಾ, ಜಿವಾಂತ್ ಜೀವ್ ಆಸ್ತಾ ಪಾಸುನ್ ಕೂಡ್ ಉರ‍್ತಾ. ಸ್ವಾಸ್ ಸಾಸ್ಣಿಕ್ ನ್ಹಯ್. ತಾಕಾಯ್ ಆವ್ದಿ ವಾ ಎಕ್ಸ್‌ಪಾಯರಿ ಡೇಟ್ ಆಸಾ.
ರೋಶು ಬಜ್ಪೆನ್ ಆಪ್ಲ್ಯಾ ಗಝಲಾ ಮಾರಿಫಾತ್ ಸ್ವಾಸ್ ಸಾಂಬಾಳುನ್ ವ್ಹರುಂಕ್ ಗರ್ಜೆಚ್ಯೊ ಸುವಿಯೊ ತೊಪ್ಲ್ಯಾತ್. ಹಾಂತುಂ ಕಾಂಯ್ ಥೊಡ್ಯಾಂಕ್ ಜಾಗ್ ಆಯ್ಲಿ ಜಾಲ್ಯಾರ್, ತಿ ಹ್ಯೆ ಕವಿತೆಚಿ ಸಾರ್ಥಕತಾ ತಶೆಂ ಆಮಿ ಲೆಖ್ತಲ್ಯಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸ್ವಾಸ್
ಸ್ವಾಸಾಕ್ ಸಯ್ತ್ ಆವ್ದಿ ಆಸಾ, ವೆಳಾ ಆದಿಂಚ್ ರಾವುಂಕ್ ಸೊಡಿನಾಕಾ
ದೀಂವ್ಕ್ ಕಾಡುಂಕೀ ಪದ್ವಿ ಆಸಾ, ಕೊಣಾಯ್ಚ್ಯಾ ಬಲಾತ್ಕಾರಾನ್ ಸೊಂಪುಂಕ್ ಸೊಡಿನಾಕಾ
ರಾಜ್ ರಾಜ್ವಟ್ಕಿ ಕಿತ್ಯಾಕ್ ಪಾಸುನ್, ಕುಡಿಂತ್ ಸ್ವಾಸ್ ನಾ ತರ್
ಪುತ್ಳ್ಯಾಂಕೀ ಹಾಂಗಾ ಕರ‍್ತಿತ್ ಜೀವ್, ತುಜೆಂ ಮಡೆಂ ಪಡುಂಕ್ ಸೊಡಿನಾಕಾ
ಕುಡಿಚೊ ಹಾಂಗಾ ವಿಕ್ರೊ ಕರ‍್ತಲೆ, ಜೀವ್ ಬಿಲ್ಕುಲ್ ಮೊಲಾಂವ್ಕ್ ತಾಂಕ್ಚೆನಾಂತ್
ಸ್ವಾಸ್ ಸಕ್ಡಾಂಕೀ ದಾನ್‍ಚ್ ದಿಲಾ, ತುಕಾಚ್ ದೇವ್ ಜಾಂವ್ಕ್ ಸೊಡಿನಾಕಾ
ದುಬ್ಳೊ ಜಾವ್ನೀ ಸೊಸುನ್ ವ್ಹರಾತ್, ಪಿಡೇಸ್ತ್ ಜಾವ್ನೀ ವಾಂಚುನ್ ಉರಾತ್
ಗುಲಾಮ್‌ಪಣಾಂತ್ ಸಾಂಪ್ಡುನ್ ಪಡ್ಲ್ಯಾರ್ ಅರ್ಧೆ ವಾಟೆರ್‌ಚ್ ಚಿರ್ಡುಂಕ್ ಸೊಡಿನಾಕಾ
ಕಾಮಾಂನಿ ಸಕ್ಕಡ್ ವ್ಯಸ್ತ್ ರೋಶು, ಉಸ್ವಾಸ್ ಕಾಡುಂಕೀ ಫುರ‍್ಸತ್ ನಾ
ಧನ್ ದಿರ್ವೆಂ ಪುಂಜಾವ್ನ್ ದವರ‍್ಲಾಂ, ಬರೆಂ ಆಸ್ ಲ್ಲೆಂ ಕುಸುಂಕ್ ಸೊಡಿನಾಕಾ
-ರೋಶು, ಬಜ್ಪೆ
संपादकीय:
स्वास सांबाळुंक गर्जेच्यो सुवियो
कूड, जीव उरजाय जाल्यार तिचे भितर्ल्यान स्वास व्हाळजाय. स्वास आसता पासून जीव आसता, जिवांत जीव आसता पासून कूड ऊर्ता. स्वास सासणीक न्हय. ताकाय आवदी वा एक्सपायरी डेट आसा.
रोशू बजपेन आपल्या गझला मारिफात स्वास सांबाळून व्हरुंक गर्जेच्यो सुवियो तोपल्यात. हांतूं कांय थोड्यांक जाग आयली जाल्यार, ती ह्ये कवितेची सार्थकता तशें आमी लेख्तल्यांव.
-मेलवीन रोड्रिगस
कविता:
स्वास
स्वासाक सयत आवदी आसा, वेळा आदिंच रावुंक सोडिनाका
दीवंक काडुंकी पद्वी आसा, कोणायच्या बलात्कारान सोंपुंक सोडिनाका
राज राज्वटकी कित्याक पासून, कुडिंत स्वास ना तर
पुतळ्यांकी हांगा कर्तीत जीव, तुजें मडें पडुंक सोडिनाका
कुडिचो हांगा विक्रो कर्तले, जीव बिल्कूल मोलावंक तांकचेनांत
स्वास सकडांकी दानच दिला, तुकाच देव जावंक सोडिनाका
दुबळो जावनी सोसून व्हरात, पिडेसत जावनी वांचून उरात
गुलामपणांत सांपडून पडल्यार अर्धे वाटेरच चिर्डुंक सोडिनाका
कामांनी सक्कड व्यसत रोशू, उस्वास काडुंकी फूर्सत ना
धन दिर्वें पुंजावन दवर्लां, बरें आस ल्लें कुसुंक सोडिनाका
-रोशू, बजपे