ಸಂಪಾದಕೀಯ್:
ಜನೆಲಾ ಭಿತರ್‍ಲೊ ಕೈದಿ ಭಾಯ್ಲೊ ಸಂಸಾರ್ ಚಾಕೊನ್ ಆಸಾ!
ಜಿವಿತಾಂತ್ ಪಾಶಾರ್ ಜಾವ್ನ್ ಗೆಲ್ಲ್ಯಾ ದೆಖಾವ್ಯಾಂಚೊ ಉಡಾಸ್ ಹಾಡ್ನ್ ದಿಂವ್ಚ್ಯಾ ಜನೆಲಾಚಿ ಕವಿತಾ ಹಾಂಗಾಸರ್ ಸಾದರ್ ಜಾಲ್ಯಾ. ಕಸಲಿ ಏಕ್ ಸಕತ್ ಹ್ಯಾ ಜನೆಲಾಕ್! ಉಗ್ತ್ಯಾ ಸಂಸಾರಾಚೆ ಸಭಾರ್‌ಶೆ ಗುಟ್ ತಾಣೆ ಫಿಛಾರ್ ಕರ್‍ನ್ ಘೆತ್ಲ್ಯಾತ್. ಅಶೆಂ ಫಿಛಾರ್ ಕರ್‍ನ್ ಘೆತ್‌ಲ್ಲ್ಯಾ ನವಲಾಂನಿಂಚ್ ಕವಿ ಸಮಾಧಾನ್ ಭೊಗ್ತಾ ಶಿವಾಯ್ ಜನೆಲಾ ಭಾಯ್ಲೆಂ ಸ್ವಾತಂತ್ರ್ಯ್ ತೊ ಆಪ್ಣಾಚೆಂ ಕರ್‍ನ್ ಘೆಂವ್ಚ್ಯಾಂತ್ ಸಲ್ವತಾ. ಸಲ್ವತಾ ಮ್ಹಣ್ಚ್ಯಾಕ್‌ಯ್ ಜನೆಲಾ ಭಿತರ್ ತೊ ಕೈದಿ ಜಾಲಾ.
ಎಕಾ ವಿಚಿತ್ರ್ ವಿಪರ್‍ಯಾಸಾಚಿ ಕವಿತಾ ಘೆವ್ನ್ ಪಯ್ಲೆಚ್ ಪಾವ್ಟಿಂ ಕವಿ ವಿಲ್ಫ್ರೆಡ್ ಲೋಬೊ ಕವಿತಾ ಕುಳಾರಾಕ್ ಆಯ್ಲಾ. ಮ್ಹಜ್ಯಾ ಬೋವ್ ಪರ್‍ನೆ 'ಹ್ಯಾ ಜನೆಲಾಂತ್ ತಿಳ್ಳ್ಯಾರ್' ಕವಿತೆಚೊ ಪ್ರಭಾವ್ ಹೆ ಕವಿತೆಚೆರ್ ಪಡ್ಲಾ ಜಾಂವ್ಕ್‌ಯ್ ಪುರೊ ಕೊಣ್ಣಾ.
ಆಪ್ಲ್ಯಾ ತರ್‍ನಾಟ್‌ಪಣಾರ್ ಕೊಂಕಣಿಚಿ ಊಬ್ ಶಿರಾಂನಿ ವ್ಹಾಳ್ತಾನಾ ಆಪುರ್ಬಾಯೆಚ್ಯೊ ಕವಿತಾ ಲಿಖುನ್ ರಸಿಕಾಂಕ್ ಮಂತ್ರ್ ಮುಗ್ದ್ ಕರ್‍ನ್ ಆಸ್‌ಲ್ಲೊ ವಿಲ್ಫಿ ಎಕಾನೇಕ್ ಖಂಯ್ಚ್ಯಾನ್ ಮಾಯಾಗ್ ಜಾಲೊ ಮ್ಹಳ್ಳ್ಯಾಚಿ ಖಬರ್ ನಾತ್‌ಲ್ಲಿ. ಕನ್ನಡ ಶೆತಾಂತ್ ತಾಚೊ ವಾವ್ರ್ ಜಾತಾಲೊ ಜಾಲ್ಲ್ಯಾನ್ ಆಮಿ ತ್ಯಾವರ್‍ವಿಂ ದುಬ್ಳೆ ಜಾಲ್ಯಾಂವ್.
ಆತಾಂ ತೊ ಹಾಂಗಾಚ್ ರಾವೊಂಕ್ ಆಯ್ಲಾ. ಆಮ್ಕಾಂ ಖುಶಿ! ಹಿ ಖುಶಿ ತೊ ತಾಚ್ಯಾ ಕವಿತಾಂನಿ ದೊಡ್ತಿ ಕರ್‍ತಲೊ ಮ್ಹಣ್ ಭರ್‍ವಸೊ ದವರ್‍ಯಾಂ?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಪರ್ನೆಂ ಜನೆಲ್
ಹೆಂ ಪರ್ನೆಂ ಜನೆಲ್
ಮ್ಹಜ್ಯಾ ಕಾಳ್ಜಾಕ್ ಲಾಗ್ಶಿಲೆಂ
ಹಾಂತ್ಲ್ಯಾನ್ ಭಾಯ್ರ್ ತಿಳ್ಳ್ಯಾರ್
ಹಾಸೊನ್ ಖೆಳೊನ್
ಇಸ್ಕೊಲಾಕ್ ವೆಚಿಂ
ನೆಣ್ತಿಂ ಭುರ್ಗಿಂ ದಿಸ್ತಾತ್
ಪಳೆತಾಂ ಪಳೆತಾಂ ದೀಶ್ಟ್ ಮ್ಹಜಿ
ಧಾಕ್ಡ್ಯಾಂ ತಿತ್ಲೆಂ ಪಾಟಿಂ ವ್ಹರುನ್
ನೆಂಟ್ಯಾಪಣಾಕ್ ಪಾವಯ್ತಾ
ಹೆಂ ಪರ್ನೆಂ ಜನೆಲ್
ಮ್ಹಜ್ಯಾ ಕಾಳ್ಜಾಕ್ ಲಾಗ್ಶಿಲೆಂ
ಹಾಂತ್ಲ್ಯಾನ್ ಭಾಯ್ರ್ ತಿಳ್ಳ್ಯಾರ್
ಆಮ್ಸೊರಾನ್ ಆಮ್ಸೊರಾನ್
ಕಾಮಾಕ್ ವೆಚಿಂ
ಕಾಮ್ಗಾರಾಂ ದಿಸ್ತಾತ್
ಪಳೆತಾಂ ಪಳೆತಾಂ ದೀಶ್ಟ್ ಮ್ಹಜಿ
ಧಾಕ್ಡ್ಯಾಂ ತಿತ್ಲೆಂ ಪಾಟಿಂ ವ್ಹರುನ್
ಜಾಂಟ್ಯಾಪಣಾಕ್ ಪಾವಯ್ತಾ
ಹೆಂ ಪರ್ನೆಂ ಜನೆಲ್
ಮ್ಹಜ್ಯಾ ಕಾಳ್ಜಾಕ್ ಲಾಗ್ಶಿಲೆಂ
ಹಾಂತ್ಲ್ಯಾನ್ ಭಾಯ್ರ್ ತಿಳ್ಳ್ಯಾರ್
ಘಮ್ ಘಮ್ ಪರ್ಮಳ್
ನಾಕಾಕ್ ಮಾರ್ಚಿಂ
ಫುಲಾಂ ದಿಸ್ತಾತ್
ಪಳೆತಾಂ ಪಳೆತಾಂ ದೀಶ್ಟ್ ಮ್ಹಜಿ
ಧಾಕ್ಡ್ಯಾಂ ತಿತ್ಲೆಂ ಪಾಟಿಂ ವ್ಹರುನ್
ಪಾಂತಿಯೆಚೊ ಉಡಾಸ್ ಹಾಡಯ್ತಾ
ಹೆಂ ಪರ್ನೆಂ ಜನೆಲ್
ಮ್ಹಜ್ಯಾ ಕಾಳ್ಜಾಕ್ ಲಾಗ್ಶಿಲೆಂ
ಹಾಂತ್ಲ್ಯಾನ್ ಭಾಯ್ರ್ ತಿಳ್ಳ್ಯಾರ್
ಮೊಗಾ ಉಬೆನ್ ಖತ್ಕತ್ಚೆಂ
ತರ್ನೆಂ ತರ್ನೆಂ
ಜೊಡೆಂ ದಿಸ್ತಾ
ಪಳೆತಾಂ ಪಳೆತಾಂ ದೀಶ್ಟ್ ಮ್ಹಜಿ
ಧಾಕ್ಡ್ಯಾಂ ತಿತ್ಲೆಂ ಪಾಟಿಂ ವ್ಹರುನ್
ಆಂಗಾಂತ್ ಕುಲ್ಕುಲೊ ಚರಯ್ತಾ!
-ವಿಲ್ಫ್ರೆಡ್ ಲೋಬೊ, ಪಡೀಲ್