ಸಂಪಾದಕೀಯ್:
ಅನಾಥ್ ಜಾಲ್ಲಿಂ ಸ್ಟ್ರೋ ಆನಿ ಸಿಪ್ಪರ್!
ಸ್ಟೇನ್ ಸ್ವಾಮಿಚ್ಯಾ ಮರ್ಣಾಚ್ಯೆ ಪಾಟ್‍ಭುಂಯ್ಚೆರ್ ಹಿ ಕವಿತಾ ಉದೆಲ್ಯಾ. ತಾಣೆ ತಾಚ್ಯಾ ಜಿವಿತಾಚ್ಯಾ ನಿಮಾಣ್ಯೆ ಘಡಿಯೆ, ತಾಂಡ್-ವೊಡಿ ಹಳು ಕರುಂಕ್ ಸ್ಟ್ರೋ ಆನಿ ಸಿಪ್ಪರ್ ಮಾಗಲ್ಲೆಂ. ತಿ ದೊನೀ ತಾಚ್ಯಾ ಹಾತಾಂಕ್ ಪಾವ್ಲಿಂನಾಂತ್. ಧನ್ಯ್ ತಿಂ ಜಾತಿಂ ಜರೀ ತಾಚ್ಯಾ ತಾಂಡ್ ವೊಡಿಂಕ್ ಹಳೂ ಕರುಂಕ್ ಸಕಲ್ಲಿಂ ತರ್. ಪುಣ್ ತಶೆಂ ಜಾಲೆಂನಾ. ತಿಂ ಅನಾಥ್ ಜಾಲಿಂ.
ಸಿಜ್ಯೆಸ್ ತಾಕೊಡೆನ್ ಸಮಕಾಳೀನ್ ವಿಶಯಾ ಭೊಂವ್ತಿಂ ಕವಿತಾ ವಿಣ್ಲ್ಯಾ. ಸಿಜ್ಯೆಸ್ ತಾಕೊಡೊನ್ ಆಪ್ಣಾಚ್ಯೆ ಸದಾಂಚೆ ವಾಟೆರ್ ಚಲನಾಸ್ತಾಂ, ವೆಗ್ಳೆಚ್ ವಾಟೆರ್ ವಚುನ್ ಹಿ ಕವಿತಾ ದಿಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸ್ಟ್ರೋ ಆನಿ ಸಿಪ್ಪರ್
ಖುರ್ಸಾರ್ ಉಮ್ಕಳ್ಚ್ಯಾ ಕ್ರೀಸ್ತಾನ್
ಆಪುಣ್ ತಾನೆಲಾಂ ಮ್ಹಳೆಂ
ಉಬೊ ಆಸಲ್ಲ್ಯಾ ಸೊಜೆರಾನ್
ಶಿರ್ಕ್ಯಾ ಆಳ್ಮೆಂ ದಿಲೆಂ.
ಹಾತ್ ಕಾಂಪ್ಚ್ಯಾ ಸ್ಟೇನ್ ಸ್ವಾಮಿನ್
ಸ್ಟ್ರೋ ಆನಿ ಸಿಪ್ಪರ್ ಮಾಗ್ಲೆಂ
ವೀಸ್ ದಿಸಾಂನಿ ಕಳಯ್ಜೆ ಮ್ಹಣ್
ನಿತಿಕರ್ತಾನ್ ಜೈಲರಾಕ್ ಸಾಂಗ್ಲೆಂ.
ಕಾನೂನಾನ್ ಕೆಲಿ ಖುನ್
ಸ್ಟೇನ್ ಸ್ವಾಮಿಚೆಂ ಮಾಡ್ತಿರ್ ಮೋರ್ನ್!
ಆತಾಂ
ಸಿಪ್ಪರಾಂತ್ ಭರ್‍ಲಾಂ ರಗತ್
ಹಾತ್ ಧುತಾತ್ ಪಿಲಾತ್
ಸ್ಟ್ರೋ ಆನಿ ಸಿಪ್ಪರ್
ದೊನೀ ಜಾಲ್ಯಾಂತ್ ಅನಾಥ್!
-ಸಿಜ್ಯೆಸ್ ತಾಕೊಡೆ
संपादकीय:
अनाथ जाल्लीं स्ट्रॉ आनी सिप्पर!
स्टेन स्वामीच्या मरणाच्ये फाटभुंयचेर ही कविता उदेल्या. ताणे ताच्या जिविताच्या निमाण्ये घडये, तांड-वोडी हळू करुंक स्ट्रॉ आनी सिप्पर मागल्लें. ती दोनी ताच्या हातांक पावलींनांत. धन्य तीं जातीं जरी ताच्या तांड वोडींक हळू करुंक सकल्लीं तर. पूण तशें जालेंना. तीं अनाथ जालीं.
सिज्येस ताकोडेन समकाळीन विशया भोंवतीं कविता विणल्या. सिज्येस ताकोडोन आपणाच्ये सदांचे वाटेर चलनासतां, वेगळेच वाटेर वचून ही कविता दिल्या.
- मेल्विन रोड्रीगस
कविता:
स्ट्रॉ आनी सिप्पर
खुरसार उमकळच्या क्रीस्तान
आपूण तानेलां म्हळें
उबो आसल्ल्या सोजेरान
शिरक्या आळमें दिलें.
हात कांपच्या स्टेन स्वामीन
स्ट्रॉ आनी सिप्पर मागलें
वीस दिसांनी कळयजे म्हण
नितिकर्तान जैलराक सांगलें.
कानूनान केली खून
स्टेन स्वामीचें माडतीर मोर्न!
आतां
सिप्परांत भरलां रगत
हात धुतात पिलात
स्ट्रॉ आनी सिप्पर
दोनी जाल्यांत अनाथ!
-सिज्येस ताकोडे