ಸಂಪಾದಕೀಯ್:
ಸಾಂಗನಾಸ್ತಾನಾ ಯೆಂವ್ಚೆಂ ಸುಖ್ ಕೊಣಾಕ್ ಕೊಡು ಜಾಲಾಂ?
ಜಿವಿತಾಂತ್ಲೆ ಧಾಗ್ ಸೊಸುಂಕ್ ಜಾಯ್ನಾಸ್ತಾಂ ಕಡೊನ್ ಗೆಲ್ಲಿ ಕವಿತಾ ನಾಯಕಿ ಹಾಂಗಾ ಕೊಣಾಚ್ಯಾ ಪಾಯಾಂ ಮುಳಿಂ ಸರ್ಪಡ್ಲ್ಯಾ ಮ್ಹಣ್ ಸಾಂಗೊಂ? ಮೊರ್ನಾಚ್ಯಾ ಕಾಂಯ್? ಯಾ ಹೆರ್ ಕಿತೇಂಯ್ ತಿ ಸಾಂಗೊಂಕ್ ಆಶೆತಾ? ಏಕ್ ಗಜಾಲ್ ಮಾತ್ರ್ ಖಂಡಿತ್, ಹೆ ಕವಿತೆಂತ್ಲಿ ನಾಯಕಿ ಸಗ್ಳಿಚ್ ಲಾಚಾರ್ ಜಾಲ್ಯಾ. ಮೊಗಾಚಿಂ ಮನ್ಶಾಂ ಎಕಾನೇಕ್ ಸಾಂಡುನ್ ವೆತಾನಾ, ತಿಚೆಂ ಬಳ್ ಸಗ್ಳೆಂ ಆಟೊನ್ ಖಿರೊನ್ ಗೆಲಾಂ. ಆತಾಂ ಹೊ ಗ್ರಾಚಾರ್ ತಿಕಾಯ್ ವೆಡೊ ಘಾಲಿತ್ ಮ್ಹಳ್ಳಿ ಭಿರಾಂತ್ ಉಟ್ಲ್ಯಾ.
ಕಸಲಿ ಏಕ್ ನಿರಾಶಾ ಸಾಂಗ್ಚಿ! ಕಾಂಯ್ ನಿರಾಶೆಚ್ಯಾ ಕುಂಡ್ಲ್ಯಾಂತ್ ಶಿಜೊನ್ ವೆತಾನಾ, ಆಪುರ್ಬಾಯೆಚ್ಯೊ ಕವಿತಾ ಭುಂಯ್ ಪಡೊಂಕ್ ಸಾಧ್ಯ್ ಆಸಾ ಮ್ಹಳ್ಳ್ಯಾಕ್ ಹಿ ಕವಿತಾ ಗೊವಾಯ್ ದಿತಾ. ಲವೀನ್ ಫುರ್ತಾದೊ ಪಯ್ಲೆಚ್ ಪಾವ್ಟಿಂ ಕವಿತಾ ಕುಳಾರಾಕ್ ಆಯ್ಲ್ಯಾ. ಪುಣ್ ತಿಚಿ ತಾಂಕ್ ವ್ಹರ್ತಿ ತಿ, ತಿಣೆ ಗುಂತ್‌ಲ್ಲ್ಯಾ ಉತ್ರಾಂನಿ ಝಳ್ಕೆಕ್ ಯೆತಾ, ತಿಣೆ ಚಿಂತ್‌ಲ್ಲ್ಯಾ ಠರಾವಣೆಂತ್ ಭೊಗುಂಕ್ ಮೆಳ್ತಾ.
ಸಾಂಗನಾಸ್ತಾನಾ ಆಯಿಲ್ಲ್ಯೊ ಜಾಯ್ತ್ಯೊ ಸಂಗ್ತಿ ಲೊಟ್ರಿ ಲಾಗ್‌ಲ್ಲೆಬರಿ ಸುಖಾಚ್ಯೋಯ್ ಆಸ್ತಾತ್, ದುಕಾಚ್ಯೊ ಮಾತ್ರ್ ನ್ಹಯ್ ಮ್ಹಳ್ಳೇಂಯ್ ಆಮಿ ಸಮ್ಜೊಂಕ್ ಫಾವೊ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಯೆತಾಯ್ ತುಂ ಸಾಂಗನಾಸ್ತಾನಾ
ಸಂಸಾರಾಂತ್ಲ್ಯಾ ಹರ್‍ಯೆಕಾ ಕೊನ್ಶಾಕ್
ಪಾವ್ತಾಯ್ ತುಂ ಎಕೆ ಘಡಿಯೆಕ್
ವ್ಹರ್‍ತಾಯ್ ತುಜ್ಯಾ ಸಾಂಗಾತಾ ತುಕಾ ಜಾಯ್ ಆಸ್ಲ್ಯಾಂಕ್
ದೀನಾಯ್ ಆವ್ಕಾಸ್ ಪಳೆಂವ್ಕ್ ಪುಣ್‌ಯ್ ಮೊಗಾಚ್ಯಾಂಕ್
ಘರ್‍ಚ್ಯಾಂಕ್, ಮೊಗಾಚ್ಯಾಂಕ್, ಮಿತ್ರಾಂಕ್ ಅಸನಾ ಖಬರ್
ವ್ಹೆಲ್ಲಿ ತಿ ಘಡಿ ತುಂವೆಂ ತಾಕಾ ವಾರ್‍ಯಾರ್
ಯೆತಾ ಮ್ಹಣ್ ರಾಕೊನ್ ಆಸ್ತಾತ್ ದಾರಾರ್
ಆವ್ಚಿತ್ ಯೆತಾ ಖಬರ್ ಸಾಂಡುನ್ ಗೆಲೊ ಮ್ಹಣ್ ಸಂಸಾರ್
ಹೊ ಕಸಲೊ ಗುಟ್ ತುಜೊ ಸಾಂಗನಾಸ್ತಾಂ ಯೆಂವ್ಚೊ
ದೀ ಪುಣ್‌ಯ್ ಆವ್ಕಾಸ್ ಪಳೆಂವ್ಕ್ ತೊಂಡ್ ಘರ್‍ಚ್ಯಾಂಚೆಂ
ಉಲಂವ್ಕ್ ಸೊಡ್ ಮೊಗಾನ್ ದೋನ್ ಉತ್ರಾಂ ಆಕೇರಿಚಿಂ
ಉಪ್ರಾಂತ್ ದಿ ವಿಶೆವ್, ಸುಖ್, ಸಮಾಧಾನ್ ಸಾಸ್ಣಾಚೆಂ
ಸುಖಾಂತ್, ದುಖಾಂತ್, ಆಸೊನ್, ಖೆಳೊನ್ ಆಸ್ತಾನಾ
ಯೆತಾಯ್ ತುಂ ಸಾಂಗನಾಸ್ತಾನಾ
ವ್ಹರ್‍ತಾಯ್ ನೆಣ್ತ್ಯಾ-ಜಾಣ್ತ್ಯಾಂಕ್ ತಫಾವತ್ ಕರಿನಾಸ್ತಾನಾ
ಹೊ ತುಜೊ ಕಸಲೊ ಇರಾದೊ? ಆಮ್ಕಾಂ ಕಳನಾ
-ಲವೀನಾ ಫುರ್ತಾದೊ