ಸಂಪಾದಕೀಯ್:
ಕೊಂಕಣಿ ಕಾವ್ಯಸಂಸಾರಾಂತ್ ಕಾಯಾಮಾಚೆಂ ಠಿಕಾಣೆಂ ಬಾಂಧುಂಕ್ ಸಕ್ಚೊ ಕವಿ
ಮ್ಹಾಕಾ ಏಕ್ ಗಜಾಲ್ ಆತಾಂ ಖಂಡಿತ್ ಜಾಲ್ಯಾ! ಕೊಂಕಣಿ ಸಂಸಾರಾಂತ್ ಕವಿಂಕ್, ತೇಂಯ್ ಬರ್‍ಯಾ ಕವಿಂಕ್ ಬರ್‍ಗಾಲ್ ನಾ. ಕೊಣಾಯ್ಚ್ಯಾ ಪಾವ್ಲಾಂಚ್ಯೊ ಕುರ್‍ವೊ ವೊಳ್ಕನಾಸ್ತಾಂ, ಆಪ್ಲಿಚ್ ಪಾಂಯ್‌ವಾಟ್ ರುತಾ ಕರ್‍ಚಿ ಸಕತ್ ಭೋವ್ ಥೊಡ್ಯಾಂಕ್ ಮಾತ್ರ್ ಆಸಾ. ಹೆಂ ಕಾಮ್ ಕಷ್ಟಾಂಚೆಂ ಜಾಣಾಸೊನ್‌ಯ್ ಕವಿ ಎರಿಕ್ ಸೋನ್ಸಾನ್ ಅಸಲ್ಯಾ ಕಾಮಾಕ್ ಖಾಂದ್ ಮಾರ್‍ಲಾ. ವಿಷಯಾಕ್ ಲಾಗೊನ್, ಶೈಲೆಕ್ ಲಾಗೊನ್, ಉಬಿಂ ಜಾಲ್ಲ್ಯಾ ಪ್ರತಿಮಾಂಕ್ ಲಾಗೊನ್ -ಹಿ ಕವಿತಾ ಸಂಪೂರ್ಣ್ ವೆಗ್ಳಿ ಉರ್‍ತಾ ಆನಿ ಕೊಂಕಣಿ ಕಾವ್ಯ ಸಂಸಾರಾಂತ್ ಆಪ್ಲೆಂಚ್ ಠಿಕಾಣೆಂ ಬಾಂಧುಂಕ್ ಸಕ್ತಾ.
ಎರಿಕ್ ಸೋನ್ಸ್ ಎಕ್ಲೊ ಪ್ರಬುದ್ಧ್ ಬರವ್ಪಿ ಮ್ಹಣ್ ಹಾಂವ್ ಸಮ್ಜಲಾಂ. ಕೊಂಕಣಿಂತ್ ಜಾಂವ್, ಕನ್ನಡಾಂತ್ ಜಾಂವ್ ಬರಯಿಲ್ಲೆಂ ಥೊಡೆಂ ಜಾಲ್ಯಾರ್‌ಯ್ ತೆಂ ಮಹತ್ವಾಚೆಂ, ಲಾಂಬ್ ಕಾಳ್ ಕಾಳ್ಜಾಂನಿ ಉರ್‍ಚೆ ತಸಲೆಂ ಮ್ಹಣ್ ಹಾಂವ್ ನಖ್ಖಿ ಜಾಣಾಂ. ಕನ್ನಡ ಸಾಹಿತ್ಯಾಚೊ, ಕವಿತೆಂಚೊ ಬರ್ಪೂರ್ ಪ್ರಭಾವ್ ಹೆ ಕವಿತೆಚೆರ್ ಪಡ್ಲಾ ತೊ ಝಳ್ಕತಾ. ಹಿ ಕೊಂಕಣಿಚಿ ಗಿರೇಸ್ತ್‌ಕಾಯ್.
ಏಕ್ ಸಮಕಾಲೀನ್ ವಿಷಯ್ ಘೆವ್ನ್, ಸರ್‍ವಾಂಚಿಂ ಭೊಗ್ಣಾಂ ಖಿಣಾಭಿತರ್ ಪಾಜುನ್ ಸೊಡ್ಚಿ ತಾಕತ್ ಎರಿಕ್ ಸೋನ್ಸಾಕ್ ಖಂಡಿತ್ ಜಾವ್ನ್ ಆಸಾ. ಕವಿತಾ ಕುಳಾರಾಕ್ ತಾಕಾ ಸ್ವಾಗತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಭೊಗ್ಣಾಂ ಬದಲ್ಲ್ಯಾಂತ್
ವಿಕೆಟ್ ಉಬ್ಲಿ... ಸಿಕ್ಸರ್...
ಬೊಲ್ ಉಡ್ಲೊ ಬಾಂವ್ಡ್ರಿ ಲಾಯ್ನಿರ್
ವ್ಹಾವ್! ವೊಟ್ ಎ ಕ್ಯಾಚ್!
ಬ್ಯಾಟ್ ಖಾಂದಾರ್, ಕ್ಯಾಪ್ ತಾಳ್ವೆರ್
ಹ್ಯಾವ್ ಎ ಬ್ರೇಕ್, ಹ್ಯಾವ್ ಮಿನರಲ್ ವೊಟರ್!
ಪಾಂಯ್ ಕುಸ್ಕಾಲೊ, ಮಸಾಜ್ ರೆಡಿ ಸರ್
ಟ್ರೋಫಿ ಜಿಕ್ಲಿ ತರ್, ಕಾಳ್ಜಾಂ ಹಾಂತುಳ್ಳಿಂ ಏರ್‌ಪೋರ್ಟಾರ್
ಒಟೋಗ್ರಾಫ್ ಪ್ಲೀಜ್, ಸಾಂಗಾತಾ ಏಕ್ ಫೋಟೊ
ಮ್ಯಾನ್ ಒಫ್ ದ ಮ್ಯಾಚ್? ಸೀರೀಸ್?
ಲಾಕೊಂ ರುಪಯ್ ಬಗ್ಲೆಕ್
ಐ ಲವ್ ಕ್ರಿಕೆಟ್! ವಿ ಲವ್ ಕ್ರಿಕೆಟರ್‍ಸ್!
ಉರಯ್ಲ್ಯಾ ದೇಶಾಚಿ ಮರ್ಯಾದ್ (!)
ದುಸ್ಮಾನಾಂಚ್ಯಾ ಟೀಮಾ ವಿರೋಧ್ ಜಿಕ್‌ಲ್ಲೊ ತುಂ
ರಿಯಲಿ ಎ ಸೋಲ್ಜರ್!
ಸೋಲ್ಜರ್? ಸೊಜೆರ್? ಶಿಪಾಯ್?
ನಾಂವ್ ನಾತ್‌ಲ್ಲೊ ಅನಾಮಿಕ್?
ಗಡಿರ್ ಝುಜ್ಚೊ ಜವಾನ್? ಫಾಮಾದ್ ನ್ಹಯ್!?
ತಾಕಾ ಸರಿ ಕರ್‍ತಾತ್? ಛೀ,
ಇಕ್ರಾ ಜಣಾಂಚ್ಯಾ ಬಳಿಷ್ಟ್ ಪಂಗ್ಡಾ ಮುಕಾರ್
ತೆ ಇಕ್ರಾ ಹಜಾರ್ ತರ್‌ಯ್, ಲೆಕಾಕ್ ನಾತ್‌ಲ್ಲೆ
ಕಾಶ್ಮೀರ್ ಗಡಿಯೆರ್ ಮುಯಾಂಬರಿ ಮೊರೊನ್ ಪಡ್ಚೆ?
ಮೋವ್ ತಣಾಚ್ಯಾ ಸೊಭಿತ್ ಮಯ್ದಾನಾಂಚಿ ರೂಚ್ ನಾತ್‌ಲ್ಲೆ?
ತಾಂಕಾಂ ಸರಿ ಕರಾತ್? ಓಹ್ ನೊ..
ಪಾವ್ಸ್ ಶೆಣಾಯ್ಲೊ, ಮ್ಯಾಚ್ ಪೋಸ್ಟ್‌ಪೋನ್ಡ್
ಪಾಂಚ್ ತಾರಾಂಚ್ಯಾ ಹೊಟ್ಲಾಂತ್ ಆರಾಮ್
ಹಾಡಾಂ ಚಿರ್‍ಚೆ ಥಂಡಿಯೆಂತ್, ಕಾತ್ ಹುಲ್ಪಾಂವ್ಚ್ಯಾ ವೊತಾಂತ್
ವೊಳ್ವಳ್ತೆಲ್ಯಾಂಕ್ ಸರಿ ಕರ್‍ಚೆಂ? ಅಕ್ಮಾನ್!
ಹೆ ಜಿಕ್ಲೆ, ಮುಕ್‌ಪಾನ್ ಸಗ್ಳೆಂ ರಂಗಾಳ್
'ವಾದಾಳಾ ವೇಗ್', 'ರೊಕೆಟಾಬರಿ ಉಸ್ಳಾಲ್ಲೊ ಬೊಲ್'
ತಕ್ಲೆನಾಂವಾಂಕ್ ನಾ ಬರ್‍ಗಾಳ್
ತೆ ಝುಜಾಂತ್ ಮೆಲೆ, ಕೂಡ್ ಭೆಸಾಂ ಜಾಲಿ
ವಯ್ಲ್ಯಾ ಹುದ್ದ್ಯಾಚೊ ತರ್ ಭಿತರ್‍ಲ್ಯಾ ಪಾನಾರ್
ಏಕ್ ವಾಕ್ಯ್, ನಾ ತರ್ ತೇಂಯ್ ನಾ!
ನಿಮಾಣ್ಯಾ ಸಾತ್ ಬೊಲಾಂನಿ
ಫಕತ್ ಚ್ಯಾರ್ ರನ್ ಕರುಂಕ್ ಜಾಂವ್ಕ್ ನಾಂತ್?
ಛೆ, ಬೆಜಾರ್, ವಿರಾರಾಯ್, ಖಂತ್
ಮಾಂಯ್‌ಭುಂಯ್ಕ್ ರಾಕ್ತಾಂ, ರಾಕ್ತಾಂ ಜೀವ್ ಗೆಲೊ
ಡ್ಯಾಮಿಟ್, ಹೂ ಕೇರ್‍ಸ್?
ಆಮ್ಕಾಂ ಕ್ರಿಕೆಟ್ ಜಾಯ್
ಗಡಿರ್ ಝುಜ್ತೆಲ್ಯಾಂಕ್ ಉಜೊ ಲಾಯ್!
-ಎರಿಕ್ ಸೋನ್ಸ್, ಬಾರ್ಕುರ್