ಸಂಪಾದಕೀಯ್:
ಸಲ್ವಣೆಂತ್‌ಯ್ ಕವಿತಾ ಬರವ್ನ್ ಜೀಕ್ ಆಪ್ಣಾಯಿಲ್ಲೊ ಮನೀಸ್
ಕವಿತಾ ಬರಯ್ತಲೊಂ ಸಾಂಗೊನ್ ಸಾಂಗೊನ್ ಸಲ್ವಲ್ಲೊ ಮನೀಸ್ ಸಲ್ವಣಿ ಮಾಂದುನ್ ಘೆನಾಸ್ತಾಂ ವಾಚ್‌ಪ್ಯಾಂಕ್ ಎಕಾ ನಮುನ್ಯಾಚ್ಯಾ ಚಕ್ರವ್ಯೂಹಾಂತ್ ಶಿರ್‍ಕಾಂವ್ಚೆಂ ಆಪುರ್ಬಾಯೆಚೆಂ ಚಿಂತಪ್ ಹೆ ಕವಿತೆಂತ್ ಸಾದರ್ ಜಾಲಾಂ. ಹಿ ಕವಿತಾ ಸಾದಿ ಜಾವ್ಯೆತ್, ಸಂಪಿ ಜಾವ್ಯೆತ್. ಪುಣ್ ಪಯ್ಲೆಪಾವ್ಟಿಂ ಕವಿತಾ ಬರಯ್ತಲ್ಯಾಚಿ ಉರ್ಬಾಚ್ ಹೆ ಕವಿತೆಕ್ ಘಟ್‌ಮೂಟ್ ಕರ್‍ತಾ ಆನಿ ನಿಮಾಣ್ಯಾ ಪಂಗ್ತಿಂನಿ ವಾಚ್‌ಪ್ಯಾಂಚ್ಯಾ ಕಾಳ್ಜಾಮನಾಕ್ ರೆಂವೊಡ್ ಘಾಲ್ನ್ ಬಸ್ತಾ.
ಸ್ಟೇನಿ ಮೆಂಡೊನ್ಸಾ ಉರ್ಬೆವಂತ್ ಕೊಂಕಣಿ ವಾವ್ರಾಡಿ. ಯುಕೆಂತ್ಲ್ಯಾ ಕೊಂಕಣಿ ಹಿಂಡಾಚೊ ಗೊವ್ಳಿ. ತಾಕಾ ಅಸಲಿಂ ಭೊಗ್ಣಾಂ ಯೆಂವ್ಚ್ಯಾಂತ್ ನವಲ್ ನಾ. ತಸಲ್ಯಾ ಭೊಗ್ಣಾಂನಿ ಮಾತ್ರ್ ಕೊಂಕಣಿಚೆಂ, ಕೊಂಕಣಿ ಕವಿತೆಚೆಂ ಬರೆಪಣ್ ಜಾತಲೆಂ. ಪಯ್ಲೆಪಾವ್ಟಿಂ ಕವಿತಾ ಕುಳಾರಾಕ್ ಆಯಿಲ್ಲ್ಯಾ ತಾಕಾ ಹಾಂಗಾ ಸದಾಂಚ್ ರಾಂವ್ಚಿ ಉರ್ಬಾ ಯೇಂವ್ದಿ ಅಶೆಂ ಆಮ್ಚೆಂ ಮ್ಹಣಪ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕವನ್ ಏಕ್ ಬರಯ್ಜೆ
ಕವನ್ ಏಕ್ ಬರಯ್ಜೆ ಮ್ಹಣ್
ಹಾತಿಂ ಘೆತ್ಲೆಂ ಕಾಗದ್, ಪೆನ್
ತಕ್ಲಿ ಆಟಯ್ಲಿ, ಭೊಗ್ಣಾಂ ಸುಟಯ್ಲಿಂ
ತರೀ ತಯಾರ್ ಜಾವ್ನಾ ಮ್ಹಜೆಂ ಮನ್
ಹಾಚೆವಿಶಿಂ ಚಿಂತ್ಲೆಂ, ಚಿಂತ್ಲೆಂ ತಾಚೆವಿಶಿಂ
ಚಿಂತುನ್ ಸಭಾರ್ ದೀಸ್ ಸಂಪ್ಲೆ
ಕಿತೆಂ ಆರಾಯ್ತಲೊಂ ಕಿತೆಂ ಬರಯ್ತಲೊಂ
ಕೊಣೆ ಕಿತ್ಯಾಕ್ ಮ್ಹಜೆ ಸಬ್ದ್ ಧಾಂಪ್ಲೆ
ದರ್ಯಾ ವೆಳೆರ್ ವಚೊನ್ ಬಸ್ಲೊಂ
ಘುಸ್ಲೊಂ ಉದ್ಯಾನ್ ರಾನಾಂತ್
ವಿಷಯ್ ಆರಾಂವ್ಕ್ ಮೊಡ್ಲೆ ರಸ್ತೆ
ನಾಚ್ಲೊಂ ಪಾರ್ಟಿಂತ್, ಬಾರಾಂತ್
ಪಿಶೆಂ ಮ್ಹಾಕಾ ಮನಿಂ ಹಾಸ್ಲೊಂ
ಧೈರ್ ಸಗ್ಳೆಂ ಪೊಟ್ಲುನ್ ಧರ್‍ಲೆಂ
ಕೆದಿಂಚ್ ನಿರಾಶಿ ಜಾಯ್ನಾಸ್ತಾಂ
ಪ್ರೇತನ್ ಮ್ಹಜೆಂ ಚಾಲುಚ್ ಉರ್‍ಲೆಂ
ಆಶಾವಾದಿ ಮ್ಹಜೇಯ್ ದೀಸ್ ಯೆತಲೆ
ಕವಿತೆಚೆಂ ಸಪಣ್ ಜ್ಯಾರಿ ಜಾತಲೆಂ
ತುಕಾ ಮ್ಹಜಿಂ ಭೊಗ್ಣಾಂ ರುಚ್ತಿತ್
ಹೆಂಚ್ ಕವಿತಾ ಜಾಲ್ಯಾರಿ ಜಾತಲೆಂ
-ಸ್ಟೇನಿ ಮೆಂಡೊನ್ಸಾ, ಯುಕೆ