ಸಂಪಾದಕೀಯ್:
ಮನ್ಶಾಚೆಂ ಸ್ವಾರ್ಥಿ, ಹಂಕಾರಿ ರೂಪ್ ಕಶೆಂ ಆಸ್ತಾ?
ಮನ್ಶಾಚೆಂ ಏಕ್ ಘೋರ್ ಕಠೋರ್ ರೂಪ್ ಹಾಂಗಾಸರ್ ಸೊಭಿತ್ ಕರುನ್ ಸಲೀಸ್ ಪ್ರತಿಮಾ ರಚುನ್ ಚಿತ್ರಿತ್ ಜಾಲಾಂ. `ಮ್ಹಜಿ ಭುಕ್ ಲಾಸೊಂಕ್ ತುಂ ಲಾಸ್' ಮ್ಹಣ್ತಾನಾ ಎಕೆ ಕುಶಿನ್ ಸ್ವಾರ್ಥಾಚಿ ಧೊಮಸ್ ಉಜಳ್‌ಲ್ಲಿ ದಿಸ್ತಾ ತರೀ, ಆನ್ಯೇಕೆ ಕುಶಿನ್ ಸ್ವತಾಚೆ ಅಸ್ತಿತ್ವಾಚಿ ಖಂತ್ ಉಮಾಳೊನ್ ಉಟೊನ್ ಉಬಿ ರಾವ್‌ಲ್ಲಿ ಝಳ್ಕತಾ. ಮಾಗೀರ್ ಹಿ ಏಕ್ ಆಡಾಂವ್ಕ್ ನಜೊ ಜಾಲ್ಲಿ ಗಜಾಲ್ ಮ್ಹಣೊನ್ ಕೊಣ್‌ಯ್ ಮ್ಹಣೊಂಕ್‌ಯ್ ಪುರೊ.
ಪಯ್ಲೊ ಕಡ್ವೊ ಉತ್ರೊನ್ ಮುಕ್ಲ್ಯಾ ಕಡ್ವ್ಯಾಕ್ ಪಾಂಯ್ ತೆಂಕ್ತಾನಾ, ಹೊ ಜಿವೊಚ್ ಉರ್‌ಲ್ಲೊ ಝಳ್ಕತಾ. ಜಿವೊ ಉರ್‌ಲ್ಲ್ಯಾಕ್ ಆಸಜಾಯ್ ಆಸ್‌ಲ್ಲೆಂ ಧನ್ಯ್ ಕಾಳೀಜ್ ಹಾಚೆಲಾಗಿಂ ನಾ. ತಾಂತುಂ ಹಂಕಾರ್ ಭರೊನ್ ವೊಮ್ತಲ್ಲೊ ದಿಸ್ತಾ. ಆತಾಂ `ತುಜ್ಯಾನ್ ಜಾತಾ ತುಂ ಕರ್, ಮ್ಹಜ್ಯಾನ್ ಜಾತಾ ಹಾಂವ್ ಕರ್‍ತಾಂ' ಮ್ಹಣ್ಚೆಂ ಮನ್ಶಾಚ್ಯಾ ಕುಸ್ಡ್ಯಾ ಕಾಳ್ಜಾಚಿ ವೊಳಕ್ ದಿತಾ.
ಆರ್. ಎಸ್. ಭಾಸ್ಕರನ್ ಗಾಂವಾನ್ ಕೊಚ್ಚಿಚೊ. `ಅಕ್ಷರಾಂ', `ನಕ್ಷತ್ರಾಂ' ಆನಿ `ಅಕ್ಷತಾಂ' ತಾಚಿಂ ಕವಿತಾ ಪುಸ್ತಕಾಂ. ಹಿ ಕವಿತಾ ಭಾಯ್ಲ್ಯಾನ್ ಸಲೀಸ್ ದಿಸ್ತಾ, ಪುಣ್ ವಾಚುನ್ ಗುಂಡಾಯೆಕ್ ಗೆಲ್ಲ್ಯಾಬರಿ ಪಿಯಾವಾಚ್ಯಾ ಸರ್ಲಾಂಬರಿಂ ಸೊಲುನ್‌ಚ್ ವೆತಾ. ಹೆಂ ಲಾಂಕೂಡ್ ತುಂ ಯಾ ಹಾಂವ್ ಜಾಲ್ಯಾಂವ್ ತರ್?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ರಾಕ್‌ಡಾ ತುಂ ಜಳ್
ರಾಕ್‌ಡಾ
ತುಂ ಜಳ್
ಆನಿ
ಮ್ಹಜಿ ಪೇಜ್ ಶಿಜಯ್
ತುಂ ಲಾಸ್
ಆನಿ ಮ್ಹಜಿ ಭುಕ್ ಲಾಸ್.
ರಾಕ್‌ಡಾ
ತುಂ ಜಳ್
ತುಂ ಸ್ವಯ್ ಜಳ್
ನಾ ತರ್
ಮ್ಹಜೆಂ ಪೊಟ್ ಜಳ್ತಲೆಂ
ಆನಿ ಮ್ಹಾಕಾಚ್ ಭಾಜುನ್ ಕಾಡ್ತಲೆಂ.
ರಾಕ್‌ಡಾ
ತುಂ ಸ್ವಯ್ ಲಾಸ್ತಾ
ಮಾಗೀರ್ ಕಿತೆಂಚ್ ಲಾಸ್ತಾ
ತುಜ್ಯಾನ್ ಜಾತಾ ತುಂ ಕರ್‍ತಾ
ಹಾಂವ್ ಪುಣ್ ಬರಯ್ತಾಂ
ಮ್ಹಜ್ಯಾನ್ ಜಾತಾ ಹಾಂವ್ ಕರ್‍ತಾಂ.
ರಾಕ್‌ಡಾ
ತುಂ ಸ್ವಯ್ ಲಾಸ್
ಮಾಗೀರ್ ಕಿತೆಂಚ್ ಲಾಸ್
ಮ್ಹಾಕಾ ಪುಣ್ ಜಿವೊಚ್ ಸೊಡ್
ತುಜ್ಯಾನ್ ಜಾತಾ ತುಂ ಕರ್
ಮ್ಹಜ್ಯಾನ್ ಜಾತಾ ಹಾಂವ್ ಕರ್‍ತಾಂ.
(ರಾಕ್‌ಡಾ=ಲಾಂಕ್‌ಡಾ; ಸ್ವಯ್=ಸ್ವತಾ; ಕಿತೆಂಚ್=ಕಿತೇಂಯ್)
-ಆರ್. ಎಸ್. ಭಾಸ್ಕರನ್